جنون العظمة.. الله يكفينا شرو.. يصيب بعض الناس.. في ناس بيكون فيهم خفيف.. يفتكر نفسو زول مهم في حدود ما بيتعداها.. يعني مثلا في تجمع ناس ويجي داخل يغير مشيتو.. يقعد ينطط وهو ماشي كأنو بيقدل.. أو واحدة برضو تجي داخلة لتجمع تغير مشيتها وتقعد تتدلع وتعتر وكراعها تتلوي وتتشنقل علي قفاها.. وتمسخ عليها اللمة.. وتقصف كل أركان العظمة عندها.. وبعضهم يكون جنون العظمة شوية زايد.. دا يعتبر نفسو شاعر أو فنان.. أو كاتب خطير.. ويعذب خلق الله.. وإن دايرو يكجنك ليوم القيامة أطراهو وللا وريهو ساكت إنو لا شاعر ولا فنان ولا كاتب ولا زول خطير إنو زول عادي وجنس شعرو وغناهو وكتابتو دي أي حِمْبِرّة ممكن يعملها.. والمصيبة لو لقى هواهو وقعد يضري (كلمة يضري دي بعض القوم بينطقوها بقلب الياء طاء للضرورة).. أقصد بي جملة لقى هواهو إنو لقى ناس تطبل ليهو.. ويقعدوا ينفخوا فيهو.. ويورم ويدردم ويقعد.. ويقدموهو ويسوقوهو على أساس إنو عظيم وخطير ومافي منو اتنين ح يضري مظبوط..
وأخطر أنواع جنون العظمة البيصيب الزعماء.. دا الموت اللحمر.. تصل بيه مرحلة يفتكر إنو الكون معمول عشانو.. والناس البتزعمهم ديل لو هو فات ح ياكلو نيم ويتجهجهو.. زي دا بس إن بقيت من ناسو.. يا تشكرو يا تبقى زول الخمسة فوق الاتنين.. بس ما يعرف إنك برضو خاتي الخمسة فوق الاتنين.. إن زنقك في حتة ضيقة شكرو.. ولما ترجع اهلك تستغفر ربك علي الكضب الكضبتو دا!!!!!..
وخلطة جنون العظمة مع انفصام الشخصية.. تبقى مصيبة كبيرة.. الزول لا يفكر في شعر ولا يفكر في غنا ولا يفكر في كتابة.. يفكر إنو نبي عديل.. ربنا بعثو رحمة للعالمين.. وعشان يمشي الناس عديل.. ويقعد ينشر دعوتو.. ويلقى ليهو أتباع ومريدين.. وهلولة.. أول من ادعى النبوة في الإسلام هو مسيلمة الكضاب.. ومعاهو مرا اسمها السجاح.. قامو اتغالطو.. وعشان يصلو لحل يرضي جميع الأطراف مسيلمة فكر يعرس السجاح.. عزمها وأكرمها و”واقعها” قبال يعرسها.. لما صبحت الواطا والشمش شرقت قالت لو “الرسالة طايرة في بلد الله خليتا ليك.. بس تعرسني” مسيلمة دا اظنو كان مطيميس!!!.. وعرسها وتلاقحت الديانتان..
في العصر الحديث ظهرو ناس كتار قالوا هم انبياء.. في ناس سمعنا بيهم.. وناس ما سمعنا بيهم..
حسي ظهرت مرة في اليمن.. زمان قالت أنا نبية.. أخدت لها سكتة وقامت الأيام دي تاني علي جنها.. اليمن تقول ناقصة..!!!! حرابة وقتل وموت.. والمرا دي جات تتم الناقصة.. لكن باقي لي إن اتلقى راجلا مطموس زي مسيلمة وعرسها بي تخلي الرسالة وتخت لها القدرها!!!
قايل نفسو نبي
