البيريسترويكا.. و.. حقوق الكدايس

قامت الثورة البلشفية في العام.. 1917.. معلنة قيام الاتحاد السوفيتي وولادة المعسكر الشيوعي وانقسام العالم إلى معسكرين رأسمالي وشيوعي.. وكان التوازن العالمي لوجود قطبين قويين متنافرين.. جاء ميخائيل غروباتشوف إلى الحكم في الاتحاد السوفيتي.. اتلفت جاي واتلفت جاي.. وقال النظام الاقتصادي دا ما نافع.. وعمل حاجة اسمها البيريسترويكا.. ومعناها “إعادة البناء”.. ويقصد إعادة بناء الاقتصاد الروسي.. ومعاها حاجة اسمها “الغلاسنوست” ومعناها الشفافية.. والشفافية يعني كل شي يبقى وااااضح وفي السهلة.. وأي زول يشوفو.. يعني بالواضح كدي “كشف حال” وشر غسيل.. وما في دسديس وغتغيت.. السياستين البيريسترويكا والغلاسنوست.. غتسن حجر غروباتشوف قبال ما يغتسن حجر الاتحاد السوفيتي ويفرتكنو ويبقى كل ستة في حتة.. وكل جركانة في مكانها.. ودخلت الرأسمالية.. واتربعت واستفاد من استفاد منها.. حتى الكدايس استفادت منها.. في الأخبار تعاقدت شركة (إنكور ديفولبمنت) الروسية.. تعاقدت مع الكديس “بلين” على أن يقوم الكديس المذكور بمحاربة ومساككة الفيران والجرذان الموجودة بمباني الشركة مقابل أجر شهري مقداره 120 علبة أكل كدايس.. وأصرّت الشركة على توقيع العقد.. لكنني أنا أعتبر العقد دا غشة للكديس المسكين دا.. هو أصلاً ح يسك الفيران وح يقبضن وياكلن.. علب الأكل لزومها شنو؟.. ويوديها وين؟.. غايتو إلا يكسرها في السوق.. وقبال ما ناس حقوق الحيوان ياخدو خبر، حقو الشركة تسرع وتغير العقد دا بدل علب أكل.. إلى قروش كااااااش.. يسلموها لـ”بلين”.. في إيدو.. في ضنبو في لسانو في أي حتة يمدها ليهم عشان يشيل القروش.. غايتو يا الروس أنا أحبطت فيكم ما قايل يصل بيكم الفساد لحدي ما تدقسو ليكم كديس؟.. لكن برضو فيكم الخير.. دايرين تشغلوهو بي مقابل.. عندنا نحن وليدات وبنيات الخدمة الإلزامية تلقى الواحد شايل كل شغل المحل البيشتغل فيهو.. وآخر الشهر يدوهو خمسين جنيه.. وفي محلات يدوهو الفاتحة بس.. وفي خبر آخر في بريطانيا الكلاب البوليسية الاشتغلت في الشرطة وخدمت دايرين يدوها معاش قدره 1500 جنيه إسترليني.. (أستغفر الله العظيم.. الواحد بعد مرات بفكر أفكار بايخة خلاص.. لكن أرجع أقول كل حاجة قسمة ونصيب).. قالوا عشان خدمت ووقتها كلو تشمشم.. وتقبض في المخدرات وفي الحرامية والمجرمين.. معاش للكلاب.. وفي بلادي ناس المعاشات قاعدين يدوهم صح لكن ما قدر حق الكلاب.. يمكن الكلب من ديل معاشو يساوي معاش سبعين معاشي من عندنا.. الأسبوع الفات.. معاشي زهجوهو ناس المعاشات في أحد دواوين المعاشات بالخرتوم.. امشي وتعال.. وتعال وامشي.. وورقك وين؟.. وورقك هناك.. زهج واتوكل على الله وملّص هدومو جت.. كما ولدته أمه.. وقعد يحوم قدام الناس.. كابسوهو ضايروهو وستروهو.. الواحد عمرو كلو عايش مستور بعد يكبر، يكشفو حالو ناس المعاشات؟.. يزهجوهو لحدي ما يمرق من هدومو؟.. ولو انتشرت ثقافة احتجاج “الميطي” دي.. أدونا ستة شهور بس.. وتعالو اتفرجو.. إن لقيتو زول لابس لوموني!!!!!!