نهائي بدون بلايلي

> الأخبار امس افادتنا بايقاف البلايلي لثبوت تعاطيه المنشطات المحظوره
> قالوا فحصوا ليهو في كورة الاتحاد والعلمه
> بدري الكلام ده
> والنتيجه طلعت اسي
> قبل لقاء الاتحاد بالهلال بايام
> وفقد البلايلي كبير للاتحاد الجزائري
> ولكنه خبر مفرح بالنسبه لينا كمريخاب
> هذا اللاعب المهول نضمن عدم مشاركته ضدنا في النهائي
> فهو مهاجم جيد
> على الرغم من انه ما قدر يتعبنا يوم لاقيناهم في الجزائر
> بالله شوف
> بلايلي منشط
> وحكم ينقض هدف شيبون
> كم انت كبير يا مريخ
> المهم
> اتحاد الجزائر ليس بالفريق الذي يعتمد علي بلايلي واحد
> عندهم بلالي كتيره وسيور كمان
> وعلى الرغم من ان حرب حياتو وروراوه بدت تظهر نتائجها في هذه المرحله بالذات
> الا ان اتحاد الجزائر لا يعتمد علي روراوه وحده
> اعتماده على مهارات داخل الملعب في المقام الاول
> بعدين ممكن تدخل حكاية حكم زي ما حصل في كورتنا
> ايها الناس
> مسارات بعض الانديه في هذه البطوله
> اثبتت ان كفة حياتو واعوانو داخل الاتحاد الافريقي هي الارجح
> ولكن ان صنعوا للميزان الف كفه
> كفة المريخ سترجح بالكأس عنوة واقتداراً
> المهم
> نهائي بدون بلايلي فرصة طيبه لقهر اتحاد الجزائر والظفر بالاميره السمراء كبطولة افريقيه ثانيه للمارد الاحمر
> المهم
> واحد قريبنا
> ماشي في الشارع
> المواصلات صعبه
> سايق ولدو الصغير من يدو وماشين
> كلما يجوا جمب محليه
> الولد يتلفت يعاين ليها ويتقل مشيتو
> ابوهو لو فكاهو بمشي المحليه عدل
> قام ابوهو قال لي الولد ده معاينتو لاي محليه بفرحه كده طالع ضابط اداري خلي بالك
> قلت ليهو طالما مغرم بالمحليه يمكن طالع هلالابي
> من حقو
> ايها الناس
> كديابا كمل رقصاتو الخمسه في المقبره
> ما فضل ليهو ولا رقصه يرقصها
> عشان كده ان شاء الله سنستمع بعذرية شباكنا علي ارضنا
> وسنتخطي مازيمبي
> طالما الشفوت في الموعد
> المهم
> اتصل بي الاخ محجوب كرار رئيس المراسم بتشريعي النيل الابيض
> الراجل ما داسيها
> هلالابي كبير
> قال لي المريخ افضل مننا
> وانا من قلبي بتمني المريخ يشيل كاس افريقيا لانو بستحقو
> وقال لي فريقنا السنه دي ضعيف
> وما قدر مقام الهلال
> سواء كتب الاعلام كلام غير كده
> او طمبروا
> ماشين بكراكة البليله
> لكن المريخ يستحق البطوله
> الراجل عجبني كلامو
> انتمائه للهلال لم يفقده صوابه وقوميته
> احييك اخي محجوب على هذه الروح
> واتمنى ان تسود كل الجمهور الرياضي
> لأن الحسد الرياضي هو سبب تحطيم الرياضه في البلد دي
> ناس خمسه وعشرين سنه
> عينهم لي مانديلا
> يقولوا ليك ما كاس
> لا تبخسوا اشياء الناس يا ناس
> وكيف يعمل الحاسد مع الرازق؟
> ايها الناس
> قرار عقوبة لاعب أمل عطبره من اتحاد القضارف
> ان كانت قد صدرت عقوبه فعلا
> وان كان قد تم اخفاؤه
> يبقى الموضع يا سعادة الفريق طارق
> ما محتاج لي لجنة تحقيق من الاتحاد العام
> محتاج لبلاغ جنائي
> والشاهد الوحيد هو رئيس النادي الذي كان يلعب به اللاعب بالقضارف
> علي اليمين
> اخطروهو بعقوبة لاعبو فلان ولا لأ ؟
> لو قال اخطروني وسلموني صورة القرار
> يبقي المتهم الاول طوالي هو المسؤول عن حفظ المستندات باتحاد القضارف
> وعشان يبرئ نفسو يوري منو السحب القرار
> لأن مجرد الاهمال يعتبر جريمه
> الموضوع ده لازم يتسكه ويتحكه شديد
> المهم
> نقابل الاتحاد في النهائي بدون البلايلي مكسب كبير
> الله ادانا قدر نوايانا
> وحادثة البلايلي لاعب الاتحاد الجزائري هذه
> ذكرتني بحادثة لاعب الهلال السوداني في البطوله العربيه
> الاحداث الزي دي ما بتتنسي
> وانديه بعينها هي التي تنشط الشرائح بالمنشطات المحظوره
> نحمد الله انو سمعتنا في الحته دي زي الورد
> المهم
> اعجبتي حكمه جميله
> لو كنت ما عارف عنوان رزقك لا تقلق فرزقك يعرف عنوانك
> سبحان الرازق الباسط
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> العيد قرب علينا
> السنه دي الخروف الا تاجروهو لينا
> نصوروا مع الشفع ونرفعها في الفيس يقولوا خروف جابوهو لينا
> ونرجعوا لي سيدو يا والينا
> الخوف الخروف برضو يتصور معانا ويرفعها في الفيس يا والينا
> يكتب المفلسين ديل قاشرين بينا
سلك كهربا
ننساك كيف والكلب راااااااقد عارف خروف بزعجو مافي
والى لقاء
سلك