• الما اشترى (الخروف) منو؟.
• ما تنكروا.
• امس (وقفة) يوسف بلايلي.
• وقفو الاتحاد الافريقي.
• العيد جاء خلاص.
• زمان العيد كانوا بيدردقوا لينا في (هدوم الشفع).
• نشيل ملامحو في (علبة الحلاوة).
• وفي عودة الناس المهمين من الخرطوم – ننتظر (القطر).
• ونقيف للباصات.
• عودة (الغائب)…متل القميص المكرفس …وقت يشم ليه ريحة (مكوة).
• الزول كان برجع من الخرطوم للعيد ..وشايل ليه (كرتونة) فيها حاجات سمحة.
• ما كان عندنا تعبير اكتر من ان نقول حاجات (سمحة).
• ما بنعرف اكتر من كدا.
• ما بنعرف غير (سمحة) دي.
• عشان كدا اي حاجة تعجبنا بنقول عليها : (والله سمحة خلاص).
• بس كدا.
• العيد كان (طعمو) زي (الخبيز).
• كان في اي عيد عندنا (عرس).
• العيد ما بمرق ساكت مننا….عرس يعني عرس.
• اقل حاجة بتعمل ليك (خطوبة) – يقولوا ليك ود الترسيبي خطب بنت الكلس.
• هي البنت دا متين بقت للعرس؟ – اول امس كانت شايلة بنت لعابها.
• الزمن مشى ..والناس كبرت.
• والتوم ود الكتم بقى ما بشوف ..ولا بطلع من البيت ..كبر.
• العيد اتخلى من عاداتو.
• الشعيرية بقى طعمها ما شعيرية.
• والشاي بقى ما زي شاي زمان – البنشربو قبل المغرب – عشان نلحق المسلسل العربي.
• نتقطع نحن في الموضوع دا.
• هسع بدون مناسبة كدا يقولوا ليك (الكهربة) انتهت.
• والغاز قطع.
• زمان (تلجة) في (كوز) ممكن تفرحك.
• ما اكتر من كدا.
• الناس بسيطة – ما عاوزين اكتر من (الموية الباردة).
• وكان ود التوتلي ..وقت يشرب ليه موية باردة – يقول ليك ..يا سلام موية سمحة خلاص.
• الواحد ما عاوز حاجة غير العافية والموية الباردة.
• قناعات الناس كانت كدا.
• ما اكتر من كدا.
• طموحاتها ما اكتر من (الموية الباردة).
• الواحد وقت يتغدي ..يقول لينا الموية دي لو لقت ليها (تلجة)…امنيتو كدا بس.
• هسع (التلجة) بقوا ما بعملوها في الموية – (التلجة) بعملوها بقوا في حاجات تانية.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• الاطفال – بفتكروا العيد (لبسة جديدة).
• وفرحة تطلع لغاية الشارع التاني.
• ومرجيحة.
• وزول يديك قروش كتيرة كدا.
• اكتر حاجة زمان ممكن تعملها ..وتحسب (جرأة) منك وثقافة ..تكتب ليك مقطع من اغاني عثمان حسين في (حيطة).
• بتجدع وقت تكتب (كيف لا اعشق جمالك) وتعمل رايح.
• ولو بالغت كدا تكتب اسمك مع (ذكري خالدة).
• دي قوة عين عديل كدا.
• لو عملت الحاجات دي بتعتبر نفسك اتقطعت.
• بتعتبر نفسك ما خليت حاجة.
• زمان العيد – بتشوفو في عيون (الشفع) – قبل ما تطمس ملامحهم (طيور الجنة).
• هسع الشافع ..الشكل سوداني واللغة (اردنية).
• متفلهمين جنس فلهمة.
• يغالطوك في (موبايلك).
• اتغيرت حاجات كتيرة.
• سوق ليك (طفل) صغير وامشي بيه السوق.
• تفتش السوق دا كلو عشان تلقى ليك (شبط) قدر كراع الطفل ما بتلقاهو.
• ما كان بتلقى – ما عارف السر شنو؟.
• وكانت ريحة (الخبيز) بتطلع في الحلة كلها …هسع (الخبيز) الجاهز بقى ما فيه ريحة.
• طمسوا ريحة الخبيز.
• لكن العيد دا رجّع لينا (كوتة) من الافراح.
• العيد دا فيه العديد من الافراح.
• فيه (شعيرية) السماية ديك ..طعمها بكون مختلف.
• وزلابية الصباح (المنفخة)..وكبيرة.
• العيد السنة دي مختلف.
• عيد السنة دي جاب (مازيمبي).
• وجاب ايقاف (يوسف بلايلي).
• وجاب (الخروف).
• يعني (الكعك) السنة دي معاهو ايقاف بلايلي.
• واللحمة معاها مازيمبي.
• العيد بقى حقنا عديل كدا.
• حقنا رسمي.
• جهزوا جلاليبكم البيضاء ..عشان تطلعوا تعيدوا على الناس – تحوموا الحلة بيت – بيت.
• ما تخلوا ليكم زول.
• عاوزين العيد يكون بالزي الابيض الكامل.
• جلاليب ساكت.
• الما عندو جلابية ..يلبس جلابية ابوه – ما في زول بلاحظ ليها.
• اتحرفنوا.
• فتحوا عيونكم.
• العيد دا حقكم.
• جربتوا الزول وقت يكون لابس ليه (نعال) اكبر منو.
• شبط ما حقو.
• بتحس الشارع كلو بكورك فيك.
• تدخل في النعال للركبة.
• وقت تقعد تلم كرعيك لي جوة.
• احساس بي (غربة).
• بي (خوفة).
• شفتوا الزول وقت يلبس ليه (نعال) ما حقتو – بحس بدون مناسبة كدا بي حصة (احراج).
• وبي لجنة تحقيق.
• ومحاسبة.
• في العيد ممكن تحصل نوع الحاجات دي.
• بلايلي وقفوه ..(طلع بتاع منشطات ساكت).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• نحن فرحتنا ما بنتخلي عنها..ولا بنكضب.
• جهزوا الجلايب البيضاء.
• ما في زول بيلبس ليه حاجة حمراء في العيد.
• بتبقى زول اشتر ساكت.
• ولا في زول بيلبس ليه حاجة صفراء.
• لو عملت كدا بطلعوك (مجنون).
• بقولوا فكت منك.
• حوموا بي جلاليبكم البيضاء.
• اي واحد تباركوا ليه العيد قولوا ليه كل سنة وانت طيب …السنة دي الهلال بطل افريقيا.
• كل سنة والهلال بطل.
• كل سنة والهلال بخير.
• كل سنة والله بطل.
• بطل اي منافسة يشارك فيها.
• اتبادلوا التهاني بالطريقة دي العيد مبارك عليكم ..وكأس الاندية الافريقية للابطال.
• وكيبي هداف للبطولة.
• والسنة القادمة عريس.
• والسنة القادمة خريج.
• او السنة القادمة في الجامعة ان شاءالله.
• والسنة دي ان شاءالله وبى اذن الله وتوفيقه الهلال بطلا لافريقيا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• هلت قبايل (العيد)…لا اسامة عطا المنان ولا لجنة الاستئنافات عندهم رأي.
• ح تقولوا شنو يعني؟.
• ح تقولوا ما شفتوا (الهلال).
• مريخاب الجنوب ما شافوه.
• تقرير الحكم قال شنو؟.
• ح تطلبوا طلب فحص تاني.
• تمثيلياتكم البياخة دي.
• مسرحياتكم بقت مكشوفة – ومحفوظة – ومعروفة.
• لو على اسامة عطا المنان يقول ليكم العيد يوم الجمعة.
• ما خميس.
• الامة الاسلامية كلها معيدة يوم الخميس.
• لو علي لجنة الاسئتنافات تقول ليكم هلال ذو الحجة لغاية الآن ما ظهر.
• الجماعة ديل لا عندهم قانون.
• ولا عندهم ضماير.
• ولا عندهم نظر.
• اي حاجة فيها (هلال) عندهم فوقها رأي.
• الغريبة بسافروا للحج في طيارة واحدة.
• بتعملوها ظاهرة.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• هلال العيد ظهر ..وفرحتو لاحت.
• نحن اصلنا كدا – في (الاعياد) دائما افراح (الهلال) بتزيد – في المناسبات الدينية …امة الهلال وشعبه بفرح.
• دي من نعم الله علينا.
• عشان كدا بعد كدا ادخلوا السوق بي قلب قوي.
• اي حاجة تمام.
• ما تخافوا.
• اشتروا اي حاجة.
• العيد السنة دي عيد الهلالاب ان شاءالله.
• الفرحة فرحتنا.
• …………..
و
• بكرة (الوقفة) الحقيقية.
• ربنا يحقق الاماني.
• وان شاءالله ونحن في هذه الايامات المباركة – الهلال بطلا للاندية الافريقية.
• سمير فضل زول ما عندو علاقة بالكورة ولا عندو علاقة بالقوانين.
• الظاهر كدا الزول دا بتموا بيه (الطيارة).
• يكون عاوز يلحق السوق.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ……….
• السيدة (ل) – من هسع بدرب على هذه الجملة (خبيزكم خطير والله)…وخايف تكونو ما خبزتو!!…جملتي تروح ساكت.
• وقرّض على كدا.
-
-
-
-
-
-
-
-
