ﻧﻀﺎﻝ ﺣﺴﻦ ﺟﺎﻧﺴﻲ

*ﺍﻳﻬﺎ ﺍﻟﻨﺎﺱ
* ﺍﻟﺮﻳﺎﺿﻪ ﺗﺴﺎﻣﺢ ﻭﻣﺤﺒﻪ
*ﻻﻃﻌﻢ ﻟﻬﺎ ﺍﻥ ﺧﻠﺖ ﻣﻦ ﻣﺪﺍﻋﺒﺎﺕ ﺑﺮﻳﺌﻪ
*ﺑﺸﺮﻁ ﻋﺪﻡ ﺗﻌﺪﻱ ﺣﺪﻭﺩ ﺍﻻﺩﺏ ﻭﺍﻟﻠﻴﺎﻗﻪ
*ﻣﺎ ﻣﻄﻠﻮﺏ ﻣﻦ ﺯﻭﻝ ﻳﺸﺠﻊ ﻓﺮﻳﻖ ﺗﺎﻧﻲ ﻏﻴﺮ ﻓﺮﻳﻘﻮ
* ﻻﻧﻬﺎ ﺿﺮﺏ ﻣﻦ ﺿﺮﻭﺏ ﺍﻟﻤﺴﺘﺤﻴﻞ
*ﻟﻜﻦ ﺍﻟﻤﻄﻠﻮﺏ ﺍﻟﺤﺪﺍﻻﺩﻧﻲ ﻣﻦ ﺍﻻﺣﺘﺮﺍﻡ ﺍﻟﻤﺘﺒﺎﺩﻝ
* ﺧﺪﺵ ﺣﻴﺎﺀ ﺍﻟﻨﺎﺱ ﻭﺍﻟﻤﺴﺎﺱ ﺑﻬﻢ ﻟﻴﺲ ﻣﻦ ﺍﻟﺮﻳﺎﺿﻪ ﻓﻲ ﺷﺊ
* ﻭﺍﻻﺳﺘﻤﺮﺍﺭ ﻓﻲ ﺍﻟﺨﻄﺄ ﻣﻜﺎﺑﺮﻩ ﺳﺎﻱ
* ﺧﻠﻮﻧﺎ ﻧﺘﻔﻜﻔﻚ ﻋﻦ ﺍﺧﻄﺎﺀ ﺗﺸﻮﻩ ﺍﻟﻮﺳﻂ ﺍﻟﺮﻳﺎﺿﻲ
*ﻭﻫﻲ ﺩﺧﻴﻠﻪ ﻋﻠﻴﻪ
*ﻭﺍﻟﺘﺨﻠﻲ ﻋﻦ ﺍﻻﺧﻄﺎﺀ ﻧﺒﻞ ﻭﺗﻌﻘﻞ ﻛﺒﻴﺮ
*ﺍﻳﻬﺎ ﺍﻟﻨﺎﺱ
*ﻣﺎﻗﺎﺩﻧﻲ ﻟﻬﺬﻩ ﺍﻟﻤﻘﺪﻣﻪ
* ﻣﻮﻗﻒ ﺍﻻﺳﺘﺎﺫﻩ ﻧﻀﺎﻝ ﺣﺴﻦ ﺍﻟﺤﺎﺝ
* ﻫﻲ ﺷﺎﻋﺮﻩ ﺻﺎﺣﺒﺔ ( ﺑﺎﻉ )
* ﺑﺎﻉ ﺩﻱ ﻣﺎ ﺑﺘﺎﻋﺖ ﺍﻟﺨﺮﻭﻑ
*ﻭﻫﻲ ﺷﺎﻋﺮﻩ ﻣﺠﻴﺪﻩ ﻭﺗﻤﺘﻠﻚ ﻧﺎﺻﻴﺔ ﺍﻟﻘﻮﺍﻓﻲ ﺍﻣﺘﻼﻛﻬﺎ ﻟﻠﻨﺒﻞ ﺍﻟﺬﻱ
ﺗﺮﺑﺖ ﻋﻠﻴﻪ
* ﻧﻀﺎﻝ ﻣﺴﺖ ﺍﺣﺘﺮﺍﻡ ﺍﻟﻜﻴﺎﻥ ﺍﻟﻤﺮﻳﺨﻲ ﻓﻲ ﻟﺤﻈﺔ ﺗﻨﺎﻓﺲ ﻋﻠﻲ ﻣﺴﺮﺡ
ﺟﺎﻣﻌﻲ
* ﻭﻋﺎﺩﺕ ﻭﺍﻋﺘﺬﺭﺕ ﻓﻲ ﻛﺜﻴﺮ ﻣﻦ ﺍﻟﻤﺤﺎﻓﻞ
* ﺑﻞ ﻭﺳﻄﺮ ﻗﻠﻤﻬﺎ ﻧﻈﻤﺎ ﻓﻲ ﺍﻻﻋﺘﺬﺍﺭ ﻣﻨﻈﻮﻣﺎ ﺑﺪﻗﺔ ﻭﺗﺠﻮﻳﺪ
* ﻭﻋﺎﺩﺕ ﻭﻛﺘﺒﺖ ﻋﺒﺮ ﻋﻤﻮﺩ ﻟﻬﺎ ﻋﻠﻲ ﺻﻔﺤﺔ ﺍﻟﺴﻮﺩﺍﻧﻲ ﻋﻠﻲ ﻣﺎ ﺍﻋﺘﻘﺪ
*ﺍﻳﻬﺎ ﺍﻟﻨﺎﺱ
*ﺍﻻﻋﺘﺬﺍﺭ ﺷﺠﺎﻋﻪ ﻣﺘﻨﺎﻫﻴﻪ
* ﻻﻳﻌﺮﻓﻪ ﺍﻻ ﺍﻟﺸﺠﻌﺎﻥ
*ﻭﻟﻢ ﺍﺳﺘﻐﺮﺏ ﺗﺤﻠﻲ ﻧﻀﺎﻝ ﺑﺘﻠﻚ ﺍﻟﺸﺠﺎﻋﻪ
*ﻭﻫﻲ ﺍﺑﻨﺔ ﺍﻟﺒﻄﺎﻧﻪ ﺍﻟﻜﺮﻳﻤﻪ ﺍﻟﻤﻀﻴﺎﻓﻪ ﺍﻟﺸﺠﺎﻋﻪ
* ﻭﻣﺎ ﺍﺩﺭﺍﻙ ﻣﺎ ﺍﻟﺒﻄﺎﻧﻪ ﻭﺷﺠﺎﻋﺔ ﺍﻫﻞ ﺍﻟﺒﻄﺎﻧﻪ
*ﻓﻔﺎﻗﺖ ﻧﻀﺎﻝ ﻓﻲ ﺷﺠﺎﻋﺘﻬﺎ ﻣﻠﻜﺔ ﺟﺎﻧﺴﻲ
* ﻃﻠﻌﺘﻲ ﺍﺭﺟﻞ ﻣﻦ ﻣﻠﻜﺔ ﺟﺎﻧﺴﻲ ﻳﺎ ﻣﻠﻜﺔ ﺍﻟﺒﻄﺎﻧﻪ
* ﻭﻻﻥ ﺍﻟﻤﺠﺘﻤﻊ ﺍﻟﺮﻳﺎﺿﻲ ﻣﺘﺴﺎﻣﺢ ﻭﺟﻤﻴﻞ
*ﺑﺎﻟﺘﺄﻛﻴﺪ ﺍﻋﺠﺒﺘﻪ ﺷﺠﺎﻋﺘﻚ ﻓﻲ ﺍﻻﻋﺘﺬﺍﺭ
*ﻭﻧﺴﻴﻨﺎ ﺗﻠﻚ ﺍﻻﺑﻴﺎﺕ ﻳﺎ ﻧﻀﺎﻝ
* ﻭﺍﻵﻥ ﺗﺪﺍﻋﺐ ﻣﺴﺎﻣﻌﻨﺎ ﺍﺑﻴﺎﺕ ﻗﺼﻴﺪﺗﻚ ﺍﻟﺠﺪﻳﺪﻩ
*ﺍﻟﺘﻲ ﻣﺠﺪﺗﻲ ﻓﻴﻬﺎ ﺍﻟﻤﺮﻳﺦ ﻭﺟﻤﺎﻫﻴﺮﻳﻪ ﻭﺍﻧﺖ ﺗﻔﺨﺮﻱ ﺑﻮﺍﻟﺪﻙ ﺍﻟﻤﺮﻳﺨﻲ
* ﻫﻴﻴﻴﻴﻴﻴﻴﻴﻴﻴﻴﻴﻴﻴﻴﻊ
*ﻋﻤﻚ ﺣﺴﻦ ﺍﻟﺤﺎﺝ ﺍﻟﻀﻜﺮ
* ﻭﻟﺪﺕ ﻭﺍﻟﻠﻪ ﻳﺎ ﺣﺎﺝ
*ﺍﻟﻤﻬﻢ
-*ﺗﻌﺎﻟﻮﺍ ﻧﻌﺘﺬﺭ ﺑﺸﺠﺎﻋﻪ ﺯﻱ ﺷﺠﺎﻋﺔ ﻧﻀﺎﻝ
*ﻭﺍﻥ ﻧﻘﺼﺘﻨﺎ ﺗﻠﻚ ﺍﻟﺸﺠﺎﻋﻪ
*ﺗﻌﺎﻟﻮﺍ ﻧﻜﻒ ﻋﻦ ﺍﻟﻤﺴﺎﺱ ﺑﺎﻟﻨﺎﺱ ﺑﺼﻮﺭﺓ ﺗﺨﻠﻮ ﻣﻦ ﺍﻟﻤﺪﺍﻋﺒﺎﺕ ﺍﻟﺒﺮﻳﺌﻪ
* ﺷﻜﺮﺍ ﻧﻀﺎﻝ
* ﺷﻜﺮﺍ ﻣﻠﻜﺔ ﺍﻟﺒﻄﺎﻧﻪ ﺍﻻﺭﺟﻞ ﻣﻦ ﻣﻠﻜﺔ ﺟﺎﻧﺴﻲ
*ﺍﻟﻤﻬﻢ
*ﺍﻟﻴﻮﻡ ﻧﻠﺘﻘﻲ ﻫﻼﻝ ﺍﻟﺮﻣﺎﻝ
* ﻓﻲ ﺍﻟﺬﺍﻛﺮﻩ ﺍﻧﻬﻢ ﻓﺎﺯﻭﺍ ﻋﻠﻴﻨﺎ
*ﻻ ﻧﻘﺎﺑﻠﻬﻢ ﺑﺤﻘﺪ
* ﻭﻟﻜﻦ ﻟﻦ ﻧﻨﺴﻲ ﻟﻬﻢ ﺍﻧﻬﻢ ﺍﻧﺘﺼﺮﻭﺍ ﻋﻠﻴﻨﺎ
*ﻳﺒﻘﻲ ﺩﺍﻓﻌﻨﺎ ﻟﻠﻨﺼﺮ ﻛﺒﻴﺮ
* ﻭﺣﻘﻮ ﻣﺎﻧﺮﻓﻊ ﻗﺪﺭ ﻣﺎ ﺍﻟﻠﻪ ﻳﺪﻳﻨﺎ
* ﻓﻘﻂ ﻧﺮﺟﻮﺍ ﺍﻥ ﻻﻳﺼﺎﺏ ﺳﻼﺡ ﻣﻦ ﺍﺳﻠﺤﺘﻨﺎ
*ﻓﻠﺪﻳﻨﺎ ﻣﻮﻗﻌﺔ ﺍﺑﻌﺎﺩ ﻣﺎﺯﻳﻤﺒﻲ ﻋﻦ ﻃﺮﻳﻖ ﺍﻟﻤﻄﺎﺭ ﺑﻌﺪ ﺍﻳﺎﻡ
* ﻻﻧﻔﺮﻁ ﻓﻲ ﻛﻮﺭﺓ ﻫﻼﻝ ﻋﺮﻭﺱ ﺍﻟﺮﻣﺎﻝ
*ﻭﻻﻧﻔﻘﺪ ﺳﻼﺡ ﻣﻦ ﺍﺳﻠﺤﺔ ﺍﻟﻘﺘﺎﻝ ﻓﻲ ﺩﺭﺏ ﺍﻟﻤﻄﺎﺭ
* ﺍﻟﻘﺼﻪ ﺩﻱ ﺩﺍﻳﺮﻩ ﺷﻔﻮﺕ ﻳﻤﻠﻮﺍ ﺍﻻﺳﺘﺎﺩ ﻟﻲ ﻋﻴﻨﻮ
* ﻣﻨﻬﺎ ﺗﺸﺠﻴﻊ ﻭﻣﻨﻬﺎ ﺑﺮﻭﻓﺔ ﻻﻗﺼﺎﺀ ﺍﻟﻐﺮﺑﺎﻥ
*ﺍﻳﻬﺎ ﺍﻟﻨﺎﺱ
* ﺍﻟﺨﻴﺮ ﺭﺍﻗﺪ
* ﺍﻻﻳﺎﻡ ﻣﺒﺎﺭﻛﺎﺕ
*ﺍﻟﻌﻴﺪ ﺍﻟﻜﺒﻴﺮ ﺑﻴﻨﻨﺎ
* ﻭﺍﻟﺨﺮﻓﺎﻥ ﺗﻄﺎﻗﺶ
* ﺑﺎﻉ ﺑﺎﻉ ﺑﺎﻉ
* ﺗﺠﻴﻚ ﻣﻦ ﺍﻱ ﻣﻜﺎﻥ ﻓﻲ ﺍﻟﺒﻠﺪ
* ﺑﺎﻉ ﺑﻮﺿﻮﺡ ﺑﺘﺘﺴﻤﻊ ﻓﻲ ﻛﻞ ﺷﺎﺭﻉ
* ﻛﻞ ﺣﻠﻪ
* ﻛﻞ ﺯﻗﺎﻕ
*ﺑﺘﻄﻠﻊ ﻣﻊ ﻛﻞ ﻧﻔﺲ
* ﺑﺘﻈﻬﺮ ﻓﻲ ﻛﻞ ﻫﻤﺲ
* ﺑﺎﻉ ﺑﺎﻉ
*ﺍﻟﻤﻬﻢ ﺍﻥ ﻳﻀﺤﻲ ﺍﻟﺠﻤﻴﻊ ﺍﻣﺘﺜﺎﻻ ﻻﻣﺮ ﺍﻟﺪﻳﻦ
*ﻻ ﺍﻥ ﻧﻀﺤﻲ ﻛﻌﺎﺩﺓ ﺍﺟﺘﻤﺎﻋﻴﻪ ﺷﻮﻓﻮﻧﻴﻪ
*ﺍﻟﻤﻬﻢ
*ﻣﺎﺯﻳﻤﺒﻲ ﻳﺪﻭ ﻓﻲ ﻗﻠﺒﻮ
*ﻗﺮﺏ ﻳﻄﻴﺮ
*ﻭﺣﺎﻳﻄﻴﺮ ﺑﺎﺫﻥ ﺍﻟﻠﻪ
* ﻃﺎﻟﻤﺎ ﺷﻌﺎﺭﻧﺎ ﻣﻦ ﻋﺰﺍﻡ ﻭﻟﻲ ﻗﺪﺍﻡ
*ﻟﻦ ﺗﻌﺘﺮ ﻟﻨﺎ ﻗﺸﻪ ﻓﻲ ﻣﺴﻴﺮﺗﻨﺎ ﻟﻠﻤﻄﺎﺭ
* ﺑﺎﻟﻘﺮﺁﻥ ﻣﺮﻳﺨﻨﺎ ﻣﺼﺎﻥ
* ﺑﺎﻻﺻﺮﺍﺭ ﻣﺮﻳﺨﻨﺎ ﻓﻲ ﺗﻘﺪﻡ
*ﺍﻟﻤﻬﻢ
* ﺟﻤﻌﺘﻨﺎ ﻋﻠﻲ ﺷﺎﺷﺔ ﺍﻟﻨﻴﻞ ﺍﻻﺯﺭﻕ ﺳﻬﺮﻩ ﺭﺍﺋﻌﻪ ﻟﻼﺳﺘﺎﺫﻩ ﺍﻟﺮﺍﺋﻌﻪ
ﻣﻴﺮﻓﺖ ﺣﺴﻴﻦ
* ﻣﻤﺎ ﺯﺍﺩ ﺭﻭﻋﺔ ﺍﻟﺴﻬﺮﻩ ﺍﺷﺮﺍﻗﺔ ﺍﻻﺳﺘﺎﺫ ﺍﻟﻘﺎﻣﻪ ﺷﺠﺮﺍﺑﻲ
* ﻭﻋﻄﺮ ﺳﻤﺎﺀ ﺍﻻﺑﺪﺍﻉ ﻓﻴﻬﺎ ﺍﻻﺳﺘﺎﺫ ﺳﻴﻒ ﺍﻟﺠﺎﻣﻌﻪ ﻭﺍﻻﺳﺘﺎﺫﻩ ﺣﺮﻡ
ﺍﻟﻨﻮﺭ
* ﻭﻣﻦ ﺍﺟﻤﻞ ﻣﺎ ﻓﻲ ﺍﻟﺴﻬﺮﻩ
* ﺍﻧﺪﻣﺎﺝ ﺍﻟﻤﺸﺠﻌﻴﻦ ﺍﻟﺤﻤﺮ ﻭﺍﻟﺰﺭﻕ ﻣﻊ ﺑﻌﻀﻬﻤﺎ ﺍﻟﺒﻌﺾ ﻓﻲ ﻣﺤﺒﻪ
ﻭﻣﻮﺩﻩ
* ﻛﻠﻮ ﺯﻭﻝ ﺑﻲ ﺷﻌﺎﺭﻭ ﻭﺷﻌﻮﺭﻭ
*ﻟﻜﻦ ﺍﻻﺣﺘﺮﺍﻡ ﻭﻗﺒﻮﻝ ﺍﻵﺧﺮ ﻛﺎﻥ ﻓﻘﻬﺎ ﻟﻠﺠﻤﻴﻊ ﻭﻗﻨﺎﻋﺔ ﺭﺍﺋﻌﻪ ﻭﺩﻟﻴﻞ
ﻋﻠﻲ ﺍﻥ ﺍﻟﺘﻔﻠﺘﺎﺕ ﺩﺧﻴﻠﻪ ﻭﻟﻴﺴﺖ ﺍﺻﻴﻠﻪ ﻋﻠﻲ ﻣﺠﺘﻤﻊ ﺍﻟﺮﻳﺎﺿﻪ
*ﻭﻟﻮ ﻣﺸﻴﻨﺎ ﻋﻠﻲ ﻛﺪﻩ ﺑﻨﻤﺸﻲ ﺻﺎﺡ
* ﻧﻤﺎﺭﺱ ﺍﺩﺏ ﺍﻟﻌﻜﻨﻨﻨﻪ ﺑﺎﺩﺏ
* ﻭﻧﺘﺒﺎﺩﻝ ﺍﻻﺣﺘﺮﺍﻣﺎﺕ ﺑﻜﻞ ﻭﺩ
*ﺍﻳﻬﺎ ﺍﻟﻨﺎﺱ
* ﻳﺤﺼﻞ ﺍﻳﻪ ﻟﻮ ﺍﻟﻤﺮﻳﺦ ﺷﺎﻝ ﻛﺎﺱ ﺍﻓﺮﻳﻘﻴﺎ ؟؟
* ﻻﺟﺪﻳﺪ ﻻﻥ ﺍﻟﻤﺮﻳﺦ ﺍﺳﺎﺳﺎ ﻣﻮﺟﻮﺩ ﺑﻠﻮﺡ ﺍﻟﺸﺮﻑ ﺍﻻﻓﺮﻳﻘﻲ
* ﻃﻴﺐ ﻳﺤﺼﻞ ﺍﻳﻪ ﻟﻮ ﺍﻟﻬﻼﻝ ﺷﺎﻝ ﺍﻟﻜﺎﺱ ؟؟؟
* ﺑﺤﺼﻞ ﺟﺪﻳﺪ
* ﻳﺪﺧﻞ ﺍﻟﻬﻼﻝ ﻻﻭﻝ ﻣﺮﻩ ﻓﻲ ﺣﻴﺎﺗﻮ ﻟﻮﺡ ﺍﻟﺸﺮﻑ ﺍﻻﻓﺮﻳﻘﻲ ﺑﻌﺪ ﺗﺴﻌﻴﻦ
ﺳﻨﻪ
*ﻭﻳﺮﺍﻓﻘﻨﺎ
*ﻗﺎﻋﺪﻳﻦ ﺑﺮﺍﻧﺎ ﻭﺳﻂ ﺍﻻﻓﺎﺭﻗﻪ ﺩﻳﻞ ﺧﻤﺴﻪ ﻭﻋﺸﺮﻳﻦ ﺳﻨﻪ
* ﻭﻟﻜﻦ ﺭﻳﺤﺔ ﺍﻟﻤﻄﺎﺭ ﺗﺄﺑﻲ ﺍﻻ ﺍﻥ ﺗﻌﻄﺮﻧﺎ ﻫﺬﺍ ﺍﻟﻌﺎﻡ
*ﻣﻊ ﺗﻤﻨﻴﺎﺗﻨﺎ ﻟﻼﺧﻮﻩ ﺍﻻﻫﻠﻪ ﺑﺎﻟﻠﺤﺎﻕ ﺑﻨﺎ ﻣﺴﺘﻘﺒﻼ
* ﻭﺭﺍﻧﺎ ﺷﻨﻮ!
* ﺑﻨﺮﺟﺎﻛﻢ ﺗﺎﻧﻲ ﺗﺴﻌﻴﻦ ﺳﻨﻪ
*ﻟﻜﻦ ﺍﻟﻘﻴﺎﻣﻪ ﺑﺘﺮﺟﺎﻛﻢ ؟؟؟
*ﺍﻳﻬﺎ ﺍﻟﻨﺎﺱ
*ﺍﻥ ﺗﻨﺼﺮﻭﺍ ﺍﻟﻠﻪ ﻳﻨﺼﺮﻛﻢ
* ﺍﻫﺎ
* ﻧﺠﻲ ﻟﻲ ﺷﻤﺎﺭﺍﺕ ﻭﺍﻟﻲ ﺍﻟﺨﺮﺗﻮﻡ
*ﻛﺎﻥ ﺷﻔﺖ ﻳﺎ ﻭﺍﻟﻴﻨﺎ
*ﺍﻟﻤﻄﺮﻩ ﺍﻣﺲ ﺟﺎﺕ ﻟﻴﻨﺎ
*ﻧﻔﺲ ﺍﻟﻤﻨﻈﺮ ﺑﺘﺎﻉ ﺍﻟﺴﻨﻴﻦ ﺍﻟﻘﺒﺎﻟﻬﺎ ﻳﺎ ﻭﺍﻟﻴﻨﺎ
*ﺍﻟﻮﺍﻟﻲ ﻣﻜﻔﻜﻒ ﺑﻨﻄﻠﻮﻧﻮ ﻭﻣﺎﺷﻲ ﻭﺳﻂ ﺍﻟﻤﻮﻳﻪ ﻳﺘﺼﻮﺭ ﻟﻴﻨﺎ
*ﻧﻔﺲ ﺍﻟﻤﻮﻳﻪ ﻭﻧﻔﺲ ﺍﻟﻤﻜﺎﻥ ﻭﻧﻔﺲ ﺍﻟﻄﻴﻦ ﺑﺲ ﺑﺘﻐﻴﺮ ﻭﺍﻟﻴﻨﺎ
*ﻭﺍﻟﺤﺎﺷﻴﻪ ﺩﺍﺧﻠﺦ ﺍﻟﻤﻮﻳﻪ ﺑﺪﻭﻥ ﻣﺎ ﺗﻜﻔﻜﻒ ﺑﻨﺎﻃﻠﻴﻨﺎ
* ﺣﺒﺎ ﻓﻲ ﺍﻟﻮﻃﻦ ﻛﺪﻩ ﺧﺎﻳﻀﻴﻦ ﺍﻟﻤﻮﻳﻪ ﺑﻲ ﻃﻴﻨﺎ
*ﻭﻟﻮ ﺍﺻﻠﻮ ﺍﻟﻮﻃﻦ ﻫﺎﻣﻴﻨﺎ
*ﻛﺎﻥ ﻛﻔﻜﻔﻨﺎ ﻗﺒﻞ ﺍﻟﻤﻄﺮﻩ ﺗﺠﻴﻨﺎ
ﺳﻠﻚ ﻛﻬﺮﺑﺎ
ﻧﻨﺴﺎﻙ ﻛﻴﻒ ﻭﺍﻟﻜﻠﺐ ﺭﺍﺍﺍﺍﺍﻗﺪ ﻓﻲ ﺍﻟﻤﻮﻳﻪ ﻭﻳﻌﺎﻳﻦ ﻟﻴﻨﺎ
ﻭﺍﻟﻲ ﻟﻘﺎﺀ
ﺳﻠﻚ