أولها.. و.. آخرها

الموبايلات.. الانترنت.. تكنلوجيا الاتصلات.. قدر ما في شي ماشة على كراعيّن.. عملت موبايل.. وناس الاتصالات ما شاء الله.. يغرو فينا بالإعلانات.. وخلونا ننضم بي سبب وبلا سبب.. إعلانات إعلانات.. شافع لاقيتو ماشي ويغني “الرغيف بي جنيه.. والفول بي خمسة”.. ركزت معاهو.. وفجاة دقت في أضاني.. إعلان “اليوم بجنيه واللسبوع بي خمسة”.. إعلان واحدة من شركات الاتصالات تعلن عن تخفيضات. غنية راسا عديل.. وأغاني الإعلانات وحات الله فيهن واحدات أحسن من الأغاني البنسمع فيهن الأيام دي.. يعني ممكن مطرب طفاشي يحفظ ليهو أغاني خمس دعايات يحي بيهن حفلة في الحلة زي العجب والجماعة يجبجبو ويحتو النبق وكل واحد يشيل أهلو.. ومافي زول ح يشتكهيو يقول دي أغاني حقتنا.. لأنو ناس الشركة من مصلحتهم الدعاية تنتشر فتخدم غرض الانتشار.. وفي أغاني إعلانات لو رقاصات العروسات غسلن وشيهن بي مرقة يرقصّن بيها عروس.. أما الانترنت والفيس بوك.. الوتس أب.. وبرامج التصفح للموبايل.. تشوف أي زول طول الوقت مدنقر ويعفص في الموبايل.. كبير علي صغير.. ضكر على انتاية.. مدنقرين وشغالين.. الفيسبوك.. في المكتب في الجامعة في المدرسة في الشارع في المواصلات في الحواشة.. راقد قايم حايم.. مشغولية وربنا سلطها علينا.. وحكاوي ما عندها حد.. وكضب فايت الحد…. ثم إحباط يقود إلى الاكتئاب.
عيـنة:-
تعرفت عليهو في الفيس.. معلق صورة أحد الممثلين الأجانب.. حكى ليها عن وسامتو.. وقيافتو.. وانو زول فنجري.. وأفنجر زول في الدنيا دي.. وانو زول اوتكيت.. وظريف ونكتنجي.. تعلقت به اسفيريا.. كانت تنتظر رسائلو بفارغ الصبر.. ربطت بين شكلو وشكل الممثل المعلقو في صفحتو.. . تواعدا.. تقابلا..
تاني يوم.. لاقت صاحبتا
(امأ.. امأ.. امأ)
سلمن على بعض.. سلام جضامي..
( قلت ليكي يا شوشو.. الزول اللاقاكي في الفيس.. قابلتيهو؟) سالتها صاحبتها :-
ردت عليها وهي ترسم علي وشيها كل علامات القرف….
“يااااااااي.. يااااااااااي.. قابلتو.. يااااااااي ياااااااي (عشر يايات).. اسكتي يا انتي.. متخلف.. أوفر أوفر أوفر.. يا انتي كباية الجوس (الشربات).. في جغمة وااااااحدة شالها ومداها على خشمو.. ختاها فااااااضية.. يااااااااي ياااااااااي يااااااي (تاني عشر يايات).. ودخل أصبعو جوا الكباية وقعد يصوط.. قلت ليهو في شنو؟ مالك؟.. قال لي يكون في عقاب سكر في قعر الكباية.. عاوز يلحسو يا انتي.. . ياااااااااي يااااااااي يااااااااي (برضو عشر يايات).. وبعدين يا انتي ما شفتي شرابو للشاي؟؟ ووووووب علي.. فظيع.. فظيع.. الكباية بعيدة من خشمو خمسة سنتمتر.. ويمد شلاليفو ياااااااااااي يااااااي.. وتسمعي شيييييييييييط…. شييييييييط.. شييييييط.. ياااااااااااااااااااااااااااااااي لمن الياي يقيف لو حد.. مع كل شييييييييط انا اتخلع انط.. وبعدين كل شيييييط جديدة بنغمة مختلفة.. ومد شلاليف مختلف.. درجة تطريب عالية وحضور عالي يا انتي.. وووووووووب علي.. فظيع فظيع.. الولد دا يكون مركب دينمو موية في خشمو يا هناية؟”