قدر ما أقول أتضاير.. وازوغ من السياسة.. وامشي جنب الحيطة ومرات جوّة الحيطة القى السياسة لحقتني جوة الحيطة.. وهبشتني.. هي حلقة.. السياسة- الوضع الاقتصادي- الوضع الاجتماعي.. مربوطة في بعض..
إن سكتّ من السياسة الرغيف ينضمك تقول بقى صغير تتلفت تلقى واحد يصر ليك كيف تقول الرغيف صغير ويديك محاضرة في الوطنية وربما يتهمك إنك طابور خامس وداير تستغل الرغيف لإثارة جماهير الشعب.. أحمد ربك اللقيت رغيف الناس في الصومال رغيف ما لاقنو.. ويقعد يباريك باقي سنتك كلها تحسبا لأي تحرك رغيفي تخريبي منك..
تنضم في النفايات يعاين لك شديد ويقول لك: شنو؟ أها؟.. كمان النفايات جابتها الحكومة؟ دي ما نفاياتكم إنتو.. توسخوا وكمان تجوا تقولوا الحكومة مقصرة؟ يا زول هوووووي فتح عينك وارعى بي قيدك!!!؟..
إن سكت من النفايات والرغيف تلقى واحد من المسعولين إتلوم.. يخليك تنقنق.. إن سكت من المسعولين.. كمساري الحافلة ينوم بالباقي حقك ويخليك تنق وتنق وتنق لمن بي نقنقتك تصل البرلمان.. وتقيف في خشم باب البرلمان وتلقاهم عوتهم رابطة لي رب السما.. ويهرجوا وحسهم مارق للشارع.. ويلوموا في الإعلاميين كيف ينصبوا الفاعل ويرفعوا المفعول به.
تخلّي ناس البرلمان يحاموا للفاعل.. ويحاولوا يرجعوا ليهو هيبتو بأن ينصبوهو.. تسمع إنو ناس دارفور اتلاقطوا في فندق السلام روتانا.. وكفت ولفح.. قدام الله وخلقو.. الناس ديل وقت ناوين يتضاربوا.. مأجرين صالة في فندق وأكل وشراب وخسارة لشنو؟.. كانوا يمشوا ميدان الربيع والسمين بيقع والضعيف بقيف.. ويوفروا حق الفندق يتقاسموهو.. زمان لما ناس يتشكلوا الواثق من نفسو وعاجباهو يقول للتاني كان راجل طالعني الخلاء النضم دا زمن البلد فيها خلا.. وبفضل مشكلة دارفور بقت: كان راجل طالعني الفندق..
غايتو ناس دارفور إن بقوا الناس الفي راسهم نوع العنقالة ديل.. واطاتهم أصبحت وكزمو حجر..!!!.
وزير ولائي خرتومي ما نفض كرسي مكتبو عديل وصنقر.. الجماعة وقفوا ليهو في خشم باب المكتب.. وقعدوا يشتموا فيهو.. فعلتو وتركتو وباع القضية.. المحيرني ناس الحكومة يقولوا فلان باع القضية.. وناس المعارضة يقولو علان باع القضية.. ولا شفنا قضية اتباعت ولا شفنا قضية اشتروها.. الحاجة الوحيدة الشايفنها قاعدة تتباع الأراضي..!!!!.. وأي واحد يجينا ويعضي السبابة من الغيظ ويقول لنا “ناس اللراضي ديل اصبروا لي فيهم.. تاني مافي لعب في اللراضي”.. أها سمح.. الإتلعب فيهن كيف الشورة معاهن؟.. نقنع منهن؟.. تمسك خشمك عليك وتقول أصلي داير لي شبر بس واندفن فيهو..
تشوف الجرايد تلقى نضم واااااحد في كل جريدة مانشيت باللحمر “كديسة قبضت فار”.. في جريدة تانية “فار يتقبض بواسطة كديسة”.. في جريدة تالتة “كديسة تقتنص فار”.. وقت خلاااااااااص يجيبو خبر قنبلة وخبطة صحفيه يكتبو ليك “فار يعضي إعلامية شهيرة وتنقل إلى المستشفى”.. مع انهم ما ورونا الفار المعتدي خبرو شنو؟.. قبضوهو؟ واللا شرد..؟ بعد بكرة نسمع بيهو عمل حركة مسلحة وما عارف نفسو داير شنو؟؟..!!!!!
كان راجل طالعني الفندق
