كمان جانا قرقراب النسوان

من أكتر أعضاء الجسم.. نال اهتمام الجنسين من البشر ضكور وأناتي.. هو الشعر.. وخصوصا عند النساء يعتبر تاج الجمال.. وتتفنن النساء في طريقة تسريحتو.. والاهتمام بيهو.. عندنا بعد الثورة علي المشاط.. ظهرت التسريحة.. وأخدت تاخد أسماء لشغفنا بالأسماء ولتمييز تسريحة عن الأخرى.. لكن قوبلت التسريحات باستهجان زيها وزي اي حاجة جديدة عاوزة تكسر طوق الموروث.. فكانت قلة أدب د تصل حافة الانطلاقة.. الانطلاقة هي خروج البنت عن التقاليد.. وعدم السوعال لافي ولي ولا في مجتمع.. وتسوي الفي راسا.. حتى أنه في حقبة من حقب شكم المرا.. كان الضحك بصوت عالي للمرا كان يعتبر علامة من علامات الانطلاقة.. مسموح ليها تضحك لكن ما تقرقر.. تكتم الضحكة.. وتمشي أي حتة بعيد عن العين وتقرر لمن الله يغفر لها.. .بعد ما تنتهي من قرقرابها تركّب وش الككو وتجي راجعة.. ممكن في الليل تتضحك بصوت عالي نوع ما لكن ما قرقراب.. وتضحك مع رفيقاتها.. ما وسط رجال.. الحمد لله ثارت المرا وناضلت حتى ننالت حقها في القرقراب.. وبقت تقرقر مع الراجل وترصعو في كتفو كمان ان ما عجبو.. .غايتو لو في راجل من رجال زمن القرقراب الممنوع وحاضر حسي.. كانت سكينو حمرا سنة للحول.. يمشي ويضبح.. يا هو يا قرقراب النسوان.. وحياةَ تقرقر فيها الحروم اريتا حياةً طايرة! ولو مرا قبضوها بتقرقر مع راجلا وتدمع وتقشقش في دموعها.. دي يا ها قلة اللدب الما بعدها قلة ادب.. وممكن يعملو مجلس للزول المقرقر والذي سمح لمرتو تقرقر.. يعملو ليهو مجلس ويتهموهو بانو داير يخرب عليهم النسوان ويعلمن القرقراب ودموع كمان ؟والله كويس!! وممكن ابوها يمشي ليها ويقول لها “علي بالطلاق تاني أسمعك واللا أسمع بك قرقرتي علا أزين لك راسك دا صلعة” وقد يفي بوعده.. وقد يكون زوجها متحرر يسمح بالقرقراب للمرا وهو يعتبر من مهددات الامن الاجتماعي.. يقعدو يتونسو وتهاجمهم قرقرابة المرا تقول لو “كدي أصبر ننخل علي العوضة دي اقرقر واجيك” تقرقر وتجي مارقة بي عقاب قرقرابها تقول لو “الله يجازيك هادي انت لي نضمك السمح دا.. لكن فد يوم بتجيب لنا نصيبة.. وحات أبوي”..

قلت إن شعر الراس للراجل وللمرا يجد اهتمام.. الراجل اكتر شي بتقلقو الصعلة.. والمرا اكتر شي بي يقلقها تجي تسرح وتخمش خمشة خمشة وتجدع وتنقنق “يخربو عدم الصويفاية”.. عشان كدا اي حاجة بتنفع الشعر يكوسو ليها.. في التسعينيات ظهرت إشاعة خواجات إنو لعاب البقر بي يققوم الصلعة.. بقو قدر ما في زول عندو ضلعة يمشي يدنقر تحت بقرة وهي تلحس ليهو صلعتو!! وطلع كلو نضم الطير في الباقير.. وربنا كاتب للبقر لحس صلع.. .. ومؤخرا شايف البنيات والنسوان عاصرات علي بول الابل للشعر.. وبول الابل بقى غالي.. وكل زول شايل معاونو وحارس الجمل متين يبول.. وقبل فترة في جدة قبضو واحد باكستاني قاعد يبيع بولو علي أساس انو بول ابل!! اها شفتن خبر الشوم وخير الروم دا؟!