الخرتـــــوم قفل
سمعت جزءاً من المؤتمر الصحفي للسيد والي الخرطوم بمناسبة تشكيل الحكومة الجديدة.. لم أتمكن من سماع خطاب السيد الوالي.. لظروف أملتها على شهلتة المعايش.. عجبني في السيد عبد الرحيم محمد حسين تلقائته في المخاطبة والإجابة علي أسئلة الإعلاميين.. وهو بتلقائيته وبساطته يفتح الباب مشرعا أمام أسئلة الإعلاميين.. ويزيل حاجز الرهبة.. والتردد في طرح بعض الأسئلة التي ربما تجيب هوا.. للسائل والمسؤول.. الواحد يتوكل علي الله ويسأل وهو يتوكل علي الله ويجاوب.. لفت نطري سؤالين من الإعلاميين.. أو هي ما أسئلة بقدر ما هي اقتراحات.. أو تحريش.. أو تحميش نيران.. أو محاولة للفت الأنظار.. تحدث أحد الإخوة بعد ما بارك الحكومة تحدث طالبا من السيد الوالي قفل الخرطوم.. لأنها اتملت ناس.. وكترة الناس بقت مشكلة لإدارة الولاية.. ولحل المشكلة دي يقفلو الخرتوم (كركرب).. قفل الولاية بمعنى انو مافي زول تاني يجيها داخل.. وضرب مثل بنميري إنو كان فكر يقفل الخرتوم.. مستغلا سفر بعض الناس لقضاء عطلة عيد الأضحى مع أهلهم.. يخليهم يسافرو والبرا برا والجوا جوا.. شخصيا اعتبرت الموضوع دا موضوع هظار وونسة.. وفعلا ونسة لكن ما كان محلها.. صراحة هو مقترح لا يخلو من طرافة.. ولا يخلو من استفزاز للناس الجاين من برا.. وأنا أحدهم.. وفكرت عشان نملا الخرتوم جد جد ونكاوي الزول دا، كرد فعل، نرسل لي اهلنا ونعزمهم يجو يعيدو هنا (ويقعدو بي وشيهم) بدل نمشي نحن وأي زول يرسل لي أهلو.. نملاها ليكم لمن تدفق.. ونقول ليكم أخف انتو إن ما دايرننا.. وصاحب المقترح ناسي انو السيد الوالي من نواحي دنقلا ويمكن يمشي يعيد الضحية هناك ويعقبوهو الجماعة يقفلو الخرتوم عليهو!! برضو اقتراح تاني من أحدهم “تحت عنوان الونسة برضو” حريص على نضافة العاصمة.. وكلنا حريصين.. قال تتعمل غرامة.. الزول لو جدع ورقة يغرموهو خمسمية درهم.. أنا سمعتها درهم.. ما مشكلة درهموها زي ما دايرين.. لكن مبدأ الغرامة نفسو.. بدري عليهو.. البلود البرا دي أصلا بتنضفها الدولة وتسلمها للمواطن نضيفة.. وتخليها تلمع حتى بعد كدا يغرمو الناس.. أول حاجة نضفو الخرتوم كويس.. وبعد داك غرمو.. وما تنسو ان المواطن يشارك ماديا في نضافة العاصمة من حر ماله.. والما بيدفع وا سجمو ووا رامدو.. حكمة الله الوسخ يكون قاعد جنب خشم الباب يزحو بي كرعيهم و يدقو الباب دايرين حق النفايات.. سالت أحدهم مرة بعد العربية فاتت.. لملمو النفايات الفي الأكياس.. والشتتو الكدايس ما اشتغلو بيهو “حسي الكدايس البشتت الوسخ دي ، يغرموها واللا يسو شنو؟”.. قلت ليهو دا ما تلموهو يا جماعة ؟ قال لي لا دا تدفع عشان يجو ناس غيرنا يلموهو.. يلموهو في اكايس يقعد أسبوع لمن العربية تجي.. ولحدي ما العربية تجي.. تجي الكدايس تبحتو وتشتتو تاني.. ويجو هم يلملمو تاني!! وبعدين نحن عندنا كدايس مهندسين جلوجيا.. كوم الزبالة لو ارتفاعو عشرين متر.. تبحت العشرين متر ديل وتجي شايلة ليها عضم من جوا!!
