سموحة وسنوحة

> اراد الله ان يرحل عنا القامه السامقه استاذنا داؤود مصطفى
> الرجل عاش سمحاً متسامحاً
> كان قدوه
> كان علماً من اعلام الصحافة الرياضية
> كان قمة تتواضع امام الجميع
> كان لا يحب الأنا
> ولا يعرف الانانيه
> كنا نريده بيننا
> ولكنها ارادة الله
> ما كتير علي ربو
> والعزاء لنا قبل اهله وقبل الاهله
> اللهم ارحم عبدك داؤود مصطفى واجعل الجنة مثواه
> المهم
> بحب الأهله شديد
> وبعشق مكابراتهم وتناقضاتهم
> بالذات لما يكون المريخ في العلالي
> والسنه دي ما شاء الله المريخ في العلالي طوالي
> واستمتعت بتبريراتهم لهزيمتنا للوفاق
> بعضهم قال
> ما ممكن لاعب سوداني يجري تسعين دقيقه
> القصه فيها منشطات
> فيها يا صاحبي
> لانو جري بكري ده جري زول منشط
> الزول ده نشيط خلاص
> الدقيقه اتنين وتسعين جاري زي الدقيقه اتنين
> واجمل حاجه الباص جاهو من عمر بخيت المنشط شديد
> وبكري حسب نشاطو ومنشطاتو جري لحقها
> واداها لي اوكره
> التقول اوكرة باب
> توش دخلت
> تاني فيكم زول بقول اوكرة باب؟
> البقصد اوكرة الباب وبقول ليك البتاعه دي
> طوالي اعرفو تطواني
> بكري غايتو لو منشط
> الا يكون باقي نشاط قديم
> باقي الحاجات دي بتقعد في الجسم كتير
> لكن ظهرت المنشطات في المدرجات
> لاقاكم جمهور في السودان ده تسعين دقيقه بشجع؟
> مفروض الكاف يعمل فحص منشطات في المدرجات
> القصه دي ما طبيعيه
> المهم
> واحدين قالوا الحكم ظلم
> وده كلام صاح
> لأنو في القون التاني الحكم شال بكري وجري بيهو
> لما فات بيهو ناس الوفاق
> نزلو وقال ليهو اديها لي اوكرا
> وقال لي اوكرا شوت تحت الحارس ده تحت كعب
> والحكم خاين شديد
> لانو قال لي بكري اجري بيهم الحارس ده مطرطش بضبك
> الحكم بالغ عديل كده
> اما الفئه التالته فقالت
> الوفاق حمام
> ديل التجاني الماحي ما بمسكهم
> بقول حاله متاخره
> يا سلام
> غرزه يخت الخطه
> بكري يجري يتعمل معاهو بلنت
> يشوت علولو تدخل قون
> الله يبارك فيك يا كردنه
> وبالذات لو عرفنا انو عمر بخيت هو من لعب الباص لبكري في القون التاني
> كردنه احبك
> يا كردنه
> الجنينه ما فيها شيء نجض تاني!!
> واتنجضي
> ايها الناس
> لوحة رسمها جمهور المريخ ادهشت العالم
> لوحة رسمها لاعبو المريخ شرقت الناس
> لوحة رسمها غرزه ابدع فيها
> لوحة صنعها التراس الجوارح خلت خشوم الناس فاتحه لي اسي
> فيها تاريخ المريخ
> فيها حاضر المريخ
> فيها مستقبل المريخ
> فيها كاس الابطال
> بس نسوا كاس السوبر
> بعد نجيب كاس الابطال ان شاء الله موش بنقابل بطل الكونفدراليه في السوبر؟
> باقي ليكم المجموعتين بتاعت الكونفدراليه ديل لو دخلوهم ضدنا كلهم الميدان في السوبر ما بنغلبهم؟
> ديل كاسين بي حجر
> واخوي عراقي التزم بي مشية المطار الاولى
> وانا بلزموا بي مشية المطار التانيه
> وبقول ليهو المشية التالته بتاعت كأس العالم للانديه خليها علي
> صل على الرسول
> المهم
> التراس اولمبيا ابدع
> والتراس الأسود بالغ
> وجماعة ابدعت
> تورنيدو ومريخاب اوفياء وساس وتجمع الروابط
> اما مريخاب دبي والامارات الشرقيه
> فكانت اسهاماتهم واضحه في تيفو الجوارح
> ومريخاب دار السلام ناس عبد الاله ما قصروا
> اما مريخاب مدني فجونا كلهم
> رابطة مريخاب الجزيره
> ومن ارض المحنه من قلب الجزيره انطقلت زغرودة الفرح
> والشفوت جوا من اي مكان
> من كل فج عميق
> ابدعوا لدرجة اجبرت السطايفه يصوروا المشهد غير المسبوق بموبايلاتهم
> بي موبايلاتهم دي بتجيب لينا الكلام
> بكره ينط ليط تطواني يقول ليك ادوا لاعبي الوفاق موبايلات جلكسي
> واتجلكسي
> المهم
> امس في الجبال
> كل قرداً طلع جبلو
> واتقردي
> ايها الناس
> لوزان ما بتحل القصه
> قلنا ليكم اسجدوا وابكوا
> ختوا نخرينكم دي في الواطه وابكوا
> ربنا براهو بعرف شكيتكم وبقدرها
> تبكوا بس
> المهم
> مريخابي عسل
> امس الصباح ضرب يسألني
> زولك الداير تكلكلو عشان يضحك لميت فيهو؟
> قلت ليهو لسه والله
> المغرب ضرب لي تاني
> قال لي زولك ظهر في كادوقلي
> واتكدقلي
> المهم
> المريخ كبير ما من الزناطير
> والكاس ده كبير
> والكبير للكبير
> مجلس جدير
> جهاز فني خبير
> لاعبون عندهم من المهاره القدر الكبير
> وجمهور خطير
> الصفوة كانت في الميعاد
> لذا الاحمر الوهاج قدل
> ايها الناس
> كلو قرداً طلع جبلو
> ولا علي كيفو
> ولسه باقي الجبال كتيره
> ولا ندري لماذا استغنى هلال التبلدي عن مدربو القدير الكبير
> لكن بي شرف هلال التبلدي بقدر يواصل بصورة طيبة بالممتاز
> ايها الناس
> كلو شيء كان تمام
> فقط بعض الاستهتار من ناس خط الدفاع في الشوط التاني
> يعني تمريرات عرضية بيناتهم في منطقة خطيرة
> بثقة مفرطة
> ما صاح الكلام ده منهم
> والحته دي قربت تفقد الجمهور تركيزو
> حقو اللاعبين زي ما نحنا بنعمل على عدم توترهم
> ما يوترونا بارجاع الكرة لجمال سالم وهو مضايق بمهاجم
> يا مصعب ويا علولو ويا امير ويا رمضان
> اللعب لي قدام
> ونحنا على العهد
> من عزام ولي قدام
> المهم
> نحنا بره شامين ريحة مطار مطار
> والناس الجوه المطار شامين ريحة مريخ مريخ
> تاني الفضل شنو؟!!
> محمد عبد الماجد احتجابك كتر
> المره الجايه بعد كملت الكلام عن عثمان حسين
> خش لينا في موضوع عشه الفلاتيه
> ابداها من أنا والكاشف اخوي
> الجبال كتيره
> ومع طلوع القرد الكتير ده كلو يوم في جبل
> حاتختفي موش تحتجب
> واتحجبي
> ايها الناس
> بيني وبينكم
> جري بكري المدينه دي جري نصاح؟؟؟
> الزول ده نشيط طبيعه ولا منشط الطبيعه ؟؟؟
> الزول ده بي نشاطو ده فرطوا فيهو كيفن ؟؟؟
> وما أجمل هتاف الاهله حينما طالبوا بعودة بكري
> وعائد عائد يا السماني
> بكري زاتو عندهم اسمو السماني
> في عقرب ما عندها سم دحين ؟؟؟
> ايها الناس
> السنه دي شعارنا لاتطوان في السودان
> قابلني داخل الاستاد بعد الكورة واحد
> قال لي الحكم ضغط الجماعه ديل شويه
> قلت ليهو عمل شنو؟؟
> قال لي ما كان يطرد الزول ده
> قلت ليهو الزول ده موش منذر قبلها؟
> قال لي ايوه
> قلت ليهو موش بسوء اخلاق شات الكورة بره بعد الحكم صفر؟
> قال لي ايوه
> قلت ليهو موش بستحق الكرت التاني؟
> قال لي ايوه.. لكن الحكم كان يمشيها ليهو
> فاجأتو
> انت تطواني ؟؟؟
> قال لي ايوه تطواني وضحك حتي بانت نواجذه
> ايها الناس
> تصدقوا التطوانيون زعلانين اكتر من السطيفيين
> تطوان السودان ديل اغرب تطوان
> واتطتوني
> ايها الناس
> قال ليك صفر كبيييير بتاع بحر شال عودو وقعد في بمبر جمب البحر يدندن
> اها جا تطواني جاب بمبرو وقعد قدام الصفر يستمع
> الصفر غني
> كضاب ما بتسيبني ما بتسيبني ما بتقدر
> بتريدني بتريدني ميت فيني ومكسر
> وصدق الصفر
> الكلمات لشاعر تطواني
> الالحان لملحن تطواني
> الاداء صفر تطواني
> المستمع تطواني
> التطوان ملو السودان
> ايها الناس
> خلونا من سموحه وسنوحه
> المطار قرب
> والمجموعه البهناك دي
> بصعد منها مازيمبي ضمان
> ومعاهو ما بصعد لا سنوحه ولا سموحه
> احتمال يصعد براهو
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> لو شغلت في النفايات بكري المدينه
> قبل الكلب ضمان بجينا
> الزول ده نشيط ومنشط يا والينا
> قبل نرمي الورقه من ايدينا
> يختفها ويلمها لينا
> ده نشاط نصاح يا والينا
سلك كهربا
ننساك كيف والكلب كان لقى حاجة تخفف همومو بكري يختفها من قدومو
والى لقاء
سلك