السبت بداية حملة مقاطعة شركة زين.. الحملة القومية لمقاطعة شركات الاتصالات السودانية

السلام عليكم يا شباب.
في ناس كاتبة عن انو شركة زين عاملة مشاريع خيرية ضخمة،، يا ريت يقرأ ردنا ويا ريت تشوفوهو انتوا كمان:
وماتنسوا انو يوم السبت البداية لحملة مقاطعة شركة زين لمدة ثلاثة ايام

‫#‏نحن_مقاطعين‬

تحية طيبة:

اولا: لو أنا محل شركة من شركات الاتصالات دي وعندي الارباح بتاعتها دي،، المشاريع اللي قلتها دي بعملها في أقل من سنتين،، وممكن كل سنة أبني مستشفى كامل مكمل وعشر مدارس، وجامعة..

بس المشكلة ويييين؟؟

المشاريع اللي عملتها الشركات دي عملتها من ويين؟؟ من قروشنا صح؟؟
يعني انا بشتري اسكراتش عشان اتكلم وعشان افعل نت،، الشركة بتشيل القروش دي وتمشي تعمل بيها مشاريع أخرى وهي خدمتها اﻷساسية ما موفراها بالصورة المطلوبة،،

بالنسبة لعمل الخير ف دي حاجة مهمة جدا، والشعب السوداني معروف بعمل الخير،، مش شركة زين بس،، و هو الدولة الوحيدة اللي ممكن تعيش فيها فترة طويلة بدون مايكون عندك ولا فلس، ماكل شارب نايم، لانها البيوت مفتوحة للكل والأعمال الخيرية كتيرة،، ومافي زول بيقول ليك انا عملت وانا سويت ﻷنو عمل خير.

بس شركة الاتصالات مافي داعي تشيل قروشنا وهي ما موفرة الخدمة اﻷساسية، ولما نسألهم وين الخدمات يقولوا لينا احنا عندنا أعمال خيرية،، كان تسموا نفسكم منظمة خيرية.

خليهم يجربوا شركة تعمل ليها فرع خاص بالأعمال الخيرية ويطلبوا من الناس تساعدهم و حتلاقي الناس كلها بتساعد لانو دة طبعنا،،

أو عادي يرسلوا للناس في التلفونات انو للتبرع بالمبلغ الفلاني ارسل للرقم الفلاني وحتلاقي انها كل الناس حتشارك معاهم.

بالإضافة ﻷنو اغلب المشاريع دي هي دعاية وبس،، ونتحداهم يعملوا المشاريع دي ويكتبوا “فاعل خير”.

اذن يا عزيزي كونها بتعمل اعمال خيرية ما بيبرر ليها ما تستخدم أموالنا في تطوير الشبكة وتوسعتها والاستفادة منها، وكلنا عارفين يعني شنو شركة زين ، الشركة الضخمة ومابيغلبها تدخل أرقى الخدمات لينا في السودان زي ما بيحصل في الدول التانية اللي فيها زين، يعني ماغالبهم يشغلوا لينا الجي فور ويكون عندنا أحسن خدمات في العالم،،
يعني من الاخر شركاتنا عندهم طمع وجشع،، ومابيشبعوا،، وهم بيتنافسوا فيما بينهم واحنا ندفع التمن.

الدليل على الجشع: الرسوم اللي بيفرضوها في تحويل الرصيد وباقي الخدمات، انا احول رصيد يخصموا ضريبة، اجي افعل النت يخصموا برضوا،
الرسوم اللي بتتأخد من التحويل قيمتها كبيرة شديد وغير مبررة أبدا .. وبإمكانهم يشغلوا خدمة الجيل الرابع دي من ارباح شهر او اقل.

تالتا: شركات الاتصالات عموما بتصرف كمية هائلة من المبالغ على الإعلانات وبرضو خدمة اسوأ من سيئة.

سواء كان إعلان أو أعمال خيرية ف كلها مهمة، لكن بما إنها شركة اتصالات ف لازم تراعي موضوع “اﻷهم ف المهم”

ودمتم

صفحة
الحملة القومية لمقاطعة شركات الاتصالات السودانية