> متعه نعيشها في رمضان
> «ري فرش» للنفوس
> واعادة ضبط مصنع السلوك
> وتغيير «الباس ويرد»
> قفل ملفات لا تفيد
> وفتح ملفات رائعه
> كنا نحتفظ بها وتظهر في «الديسك توب»
> ولكن حداشر شهراً لا تحظي بدبل «كليلك» منا لنتفحصها
> فرصة في رمضان
> لتنزيل «ويندوس» جديد
> يتناسب مع المرحله
> ويساعدنا علي سرعة تصفح المفيد
> رمضان رائع
> ننشط النت
> ونسأل عمك قوقل
> عن الحديث الصحيح
> عن سلوك الصحابه
> عن المطلوب منا
> عن حقوق الغير علينا
> عن والدينا
> هل قمنا بواجبنا تجاههم
> عن اهلنا
> عن امتنا
> عن اوطاننا
> عن عقيدتنا
> وعن وعن
> ثم عن عن وعن
> فرصة يجب ألا نفوتها
> المهم
> كي نستفيد من رمضان يجب ان نصوم صاح
> قيام ليل صاح
> صلاة زي الصلاة
> والقرآن بتمعن علنا نعود لجادة الطريق ونكفر عن ما اتلفه الحريق
> ونخفف الضيق
> ورمضان بكون صاح
> لما نصوم في الميعاد
> ونفطر في الميعاد
> لنعيد في الميعاد
> أيها الناس
> الهلال الشفناهو أمس بعد الافطار ده
> هلال ربنا
> ده ما هلال تمهيدي
> ده هلال فاينال عديل كده
> هلال كبير شديد
> ما هلال يوم واحد
> يعني في يوم راح مننا في حساب الله
> عشان كده رمضان السنه دي حايبقي تسعه وعشرين.
> نحنا ما بنعرف احسن من الحكومه
> الحكومه قالت رمضان بالخميس
> وهلال ربنا في مغرب الخميس كان بتاع يومين
> لولو ما اخاف الكضب بتاع تلاته
> وبرضو ما بنعرف اكتر من الاجهزه الحديثه
> الاجهزه القالت لينا رمضان بالخميس لا محاله
> لكن نطالب الحكومه والاجهزه بالدقه
> الدقه الشديده
> القصه ما لعب
> القصه شهر ننتظره سنه
> الصحابه رضوان الله عليهم كانوا سته شهور بعد رمضان يدعون الله ان يتقبل صيامهم
> والسته شهور البعدها يدعون الله ان يبلغهم رمضان
> شهر ما ساهل
> حقو ما نتساهل فيهو
> المهم
> هلال ربنا الشفناهو امس هلال فاينال
> مازي هلال كردنه الشفناهو اول امس
> هلال تمهيدي
> التمهيدي عليهو كتير
> ايها الناس
> البعض انزعج يوم مباراتنا ضد الاهلي
> ونسوا انها المباراه الاولى بعد المعسكر
> وان المدرب جرب فيها عناصر كتيره
> وان معظم التشكيله الاساسيه لم تشارك
> وان ديديه مكسب كبير
> وشيبون مجنون مجنون مجنون
> بس الباب البجيب «الريح» ما زولنا تب
> ايها الناس
> لا داعي للشفقه
> لا داعي للتردد
> شعارنا من عزام ولي قدام
> وقدام تعني المطار
> وريحة المطار فاحت وعمت القرى والحضر
> فقط مطلوب من الجمهور
> ان يؤدي بمستواه امام عزام وكابو والترجي
> جمهور تمام مريخ تمام
> المهم
> ابو الهل بالشفناهو ده ما بمشي لي قدام
> بمشي الحتانه طوالي
> اول فرق المجموعات البتمشي الحتانه
> لأن جوليام طلع حمام
> وابو اسرة كريمه بتاع النص
> طلع اصابتو فريده
> والبقيه لن تقوي على مصارعة مازيمبي في نهار رمضان بالكنغو.
> صدقوني يا اهله يا شرفاء
> ان غم عليكم في المجموعات
> فتشوهوا في الحتانه
> تلقوهوا قاااااااعد
> اقعدوا في الحتانه وقولوا ما بنطير برانا
> لمن نجي المطار شايلين كاسنا معانا
> المهم
> أين النشاط الثقافي الرمضاني يا هاشم يا زبير؟
> دايرين السنه دي برنامج متفرد
> يدي الدين حقو
> ويدي الابداع حقو
> ويدي المريخ حقو
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> امس صمنا وشيء ما حصل لينا
> رحمة من ربنا كريم علينا
> لا الكهربا قطعت ولا المويه ابت تجينا
> لكن الحاله دي بتستمر لينا؟
> ولما يدخل في العضم يا والينا
> ندخل المواسير والمويه ما تجينا؟
> اضغطهم يا والينا
> وقرط علي كده ترضينا
سلك كهربا
ننساك كيف وصايمين يوم والهلال قدر ده.
وإلى لقاء.
سلك
