(نيودلهي – قرر زوجان ليس لديهما أبناء في الهند ترك كل ممتلكاتهما من منزل وأرض وودائع مصرفية، لقردهما الأليف.).. جابو قرد ربوهو وكان مونسهم.. ولما حسو إنهم ح يموتو وقروشهم الكتيرة دي، مافي وريث ليها.. ورثوها القرد (تشونومون) دا اسمو.. البالغ من العمر خمسطاشر سنة.. ويوصف بالرومانسية حيث أنه يحب الفلي.. يعني يقعد للراجل يفليهو أو المرا تفليهو.. (الفلي= هو قتل القمل يديويا.. من غير استعمال مستحضرات كيمائية.. ويعتبر الفلي صديقا للبيئة).. وقد درج أهل القرد (تشونومون).. إقامة الحفلات على شرفه.. وعزم كمية من القرود المشردة.. وتمد الموائد بكل ما لذ وطاب.. وتاكل القرود المشردة.. وتنتهي وهي تدعو لتشومون (إن شاء الله خيرا دائم).. ويظهر الدعوة صادفت.. وقرر أهلو أن يورثوهو المال اللحمر دا.. هذا القرد المحظوظ خلاني أفتش عن أغنى حيوانات في العالم.. لقيت تمانية بهائم تستحق الحسادة.. وهي بالترتيب من حيث الرصيد:
الكلب (جانثر الرابع).. يظهر كان قبالو في جانثرات.. جانثر الأول والتاني والتالت.. جانثر الرابع دا قدرت ثروتو بـ224 مليون دولار.. ورثتها ليهو مرا اسمها (كارلوتا لبينستين).. يمتلك الكلب جانثر الرابع بالإضافة إلى المنتجعات.. يمتلك قصر في ميامي أجرتو منو مادونا.. بس إنشاء الله ما تكون اتلومت معاهو.. ودفعت الإيجار!!.. يا حليلنا نحن فرحانين نغني لي سيد الحيشان التلاتة.. غنا وزغاريد كمان.!!
الشمبانزي (كالو).. يعتبر أغنى قرد في العالم.. وأغنى من تلتين سكان العالم.. ثروتو 53 مليون دولار.. أدتها ليهو السباحة العالمية باتريشيا أونيل.. بعد ما انفصلت من زوجها كتبت ليهو القروش دي.. مكاواة لي راجلها.. شفت القروش دي أديها للقرد دا وما أديك ليها يا المقطع.. وأنا خايف القريشات دي تبقى حقت الراجل.. وبعد المحاكم والانفصال حكمت المحكمة ليها.. وهي قامت أدتها القرد العواليق المحظوظ دا.!!
الكلب (توبي ريميس).. أها دا قالو ورث خمسطاشر مليون دولار سنة 1930.. ولما مات كانت 30 مليون دولار.. مات خلاها.. خلاها لمنو يا ربي.؟
كلب أوبرا وينفري.. المذيعة المشهورة.. عندها كلب ثروتو تلاتين مليون دولار..!!؟؟ أوبرا دي أصلها عندها قدر شنو؟.. لمن الكليب حقها يكون عندو تلاتين مليون.. الرزق دا غايتو عند رب العالمين.!!
الجدادة المحترمة (جيجو).. أها ثروتها عشرة مليون دولار.. جدادة وعندها عشرة مليون دولار.. تركها ليها واحد غنيان عديم صوب.. اسمو مايلز بلاكويل.. سنة 2000!!.. جدادة.. ونحن كان في دولة اتفنجرت علينا وادتنا عشرة مليون نقعد ننضم فيها ونشكرها سنة للحول.. وفي دول تشيل حالنا بيها.. النشرة والتانية (في إطار التعاون المشترك اتوكلنا على الله وادينا السودان عشرة مليون.. غايتو ما معروف يرجعوهن لينا متين؟)..
الكديسة (بلاكي).. دي ثروتها تسعة مليون دولار..
الكلب (ترابل).. ورث عام 2007.. سبعة مليون دولار.. ويعتبر من أغنى الكلاب في ولاية نيويورك الأمريكية.. يعني في كلاب تانية غنيانة زيو.. (معليش).. الله في.!!
أما الكلب (فلوسي).. دا ستو الممثلة الأمريكية (درو باريمور).. دا مسيكين يحنن.. عندو تلاتة مليون ونص.. بس!!.. لكن إن شغلن بيزيدين ويلحق رفاقتو الكلاب الغنيانة دي.. فهمي ليهو يشغلن ما يختهن ساكت ويقعد يعاين لهن.!!
