شهـــر العســـل

جاء في الموسوعة الحرة “شهر العسل هي الفترة الزمنية التي يقضيها عريسان بعد إتمام مراسم الزواج وسكنهم في بيت واحد، ومدتها شهر واحد. تلقب بشهر العسل بسبب أن كل منهم يتفرغ للاستمتاع بالآخر. وكيفية قضاء شهر العسل تختلف من شعب إلى آخر ومن مجموعة إلى أخرى مثلاً الأثرياء يفضلون السفر مباشرة بعد حفلة العرس إلى منطقة سياحية، وفي بعض المناطق الزراعية يبقى العريس وعروسه في البيت لاستقبال المهنين والزوار بينما تتكفل أم العروس بإرسال الطعام لبيت الزوجية” هنا عندنا مؤخرا ظهر فطور العريس ومويات رمضان العريس وشاي لبن العريس كلها قبل شهر العسل.. الفطور أريتو كان صحن واحد بس.. دفاااااار مليان أكل وحلل ومزيكة وراهو وزغاريت.. يعني فطور ما للعريس براهو للعريس وحلة العريس وكل الحلال المجاورة سلوك يضيف أعباء إلى مصاريف الزواج ويثبت إنو نحن مجتمع استهلاكي من الدرجة الأولى.. سمعت أنو مرة فطور العريس قام من الخرطوم لحدي ما وصل مدني العروس في الخرطوم والعريس في مدني.. الساعة أربعة صباحا اتحرك موكب الفطور عشان يصل في مواعيد مناسبة!! كان بإصرار من أم العروس عشان تثبت لاهل العريس انهم ناس ما ساهلين وفطور العريس ح يصلو حتى لو كان في كندا.. خلومدني كلها تعاين للزلط الفطور جا والفطور ما جا.. وتستمر الموسوعة الحرة وتورينا أصل شهر العسل شنو.. “يعتقد أن أصل هذا التقليد يعود لأكثر من 4000 سنة، ويقال بأن عند البابليون كان يتوجب على أب الزوجة تقديم للزوج، طيلة شهر قمري، كميات من الجعة مصنوعة بالعسل.. هذا لاعتقاد أن هذا النوع من الجعة يرفع درجة الخصوبة الجنسية والقدرة الجنسية”.. الجعة منقوع الشعير المخمر يعني بيرة.. شهر بي حالو العريس يجغم في البيرة أم عسل والشراب إسكوب.. وبعد داك يمرق من خلوة شهر العسل مدوعل.. وبعد كدي الولادة قسمة من الله.. ما كان عندنا شهر عسل….جانا جديد.. العريس يقعد عند ناس العروس اسبوع بي حالو ومعاهو اصاحبو ويضبحو عتان.. ودلاليك.. وغنا.. وكل يوم يسو للعريس خفجة الضريرة في راسو.. ويكحلوهو.. وممكن يطبقو ليهو الحنة كم مرة.. وفي نهاية الأسبوع الدخلة.. وبعد داك الناس يفرتقو وكل قرد يشوف شغلتو.. والعريس براهو يقوم على شغلتو.. والعروس تدخل على تكلها وتعوس كسرتها.. وبعد شهرين يجو يلقوها تبصّق.. إيذانا بقدوم بني آدم جديد إضافة لتعداد سكان الكرة الأرضية ومساهمة منهم في بقاء الجنس البشري والمحافظة عليه من الانقراض!!
نسي يوم عرسو:-
قيل إن أديسون عالم الفيزياء الذي اخترع المصباح الكهربائي.. كان نساي جدا جدا جدا.. لدرجة انو بينسى أكل واللا لا.. نسى يوم عرسو.. الناس في الحفلة يجبجبو وهو غاطس في معملو.. كاسوهو مشو جابوهو.. وقاعد مع العروس وكل مرة يقبل عليها ويسألها “انتي منو؟…والهيصة دي شنو؟”
علا ما بعرفها قتلت قلبها وعاشت معاهو، واللا رمت طوبتو؟!!