حتقول علي.. ما بستحق خيرك علي!!
تقعد تعد في كل جميل سويتو لي..
وتقول: “محال ما بتبقي أصلاً إلا بي “!
لو كنت ناوي تذلني.. مااااا بهمني
**
أنا برضي أديتك زمان..
علمتك الريد والوفا.. ووريتك الحب والحنان..
رشيت طريقك بالرذاذ.. سكنتك الروض والجنان
دافعت عنك في الغياب.. جنبتك الذل والهوان
أديتك الضل والمكان..
لو قلبك المستغني خان.. ماااابهمني
***
عليت مراتبك بالنجاح.. شديت سواعدك للفلاح
في ضل مودتنا الوريف.. قلبك من الأسف استراح
نسيتك الحزن القديم.. والحيرة.. والأسى.. والجراح
بالبسمة ضويت الطريق.. بالضحكة بدلت النواح
بي حبنا الصافي النبيل.. رجعت كل القايلو راح
الدنيا ضاقت يا ما بيك.. وبقت معانا براح براح
ضوت نجومنا طريق هواك.. والبدر في دنياكا لاح
والليلة لو كايس السماح!! مااابهمني
***
أنا ياخ نسيت قصة هواك..
وبديت حياتي مع سواك..
ده الجننك والزاد أساك..
خلاك تغالط في رؤاك..
والمستحيل أصبح جزاك..
أنا تاني ما برجع معاك..
ولو قلت إني سبب أذاك..
أو إني شيطان.. ما ملاك.. مااااا بهمني!
تلويح:
العواطف الحقيقية لا تعرف المن والأذى.. فلاتهتموا لعاطفة مريضة يأكلها الحقد.
ماااااابهمني
