طقس من الطقوس اليومية التى اعتدت عليها منذ سنوات لا أعرف كم عددها .. أن أقوم بعد توصيل الأولاد للمدارس وأغشى(كشك الجرائد) أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !
درجت جارتنا الحاجة (صفية) على شرب القهوة الصباحية معي بين الحين والآخر ،طالبة مني أن اقوم بقراءة الأخبار الهامة لها إذ أنها أمية (جيل ما قبل المدارس) ، ما أن حملت فنجانى القهوة ووضعتهما بيننا على التربيزة الحديدية وأمسكت بعدد الأمس من صحيفة التيار والذي يقول ( الاتحادي يطالب بنائب الرئيس ورئاسة البرلمان ووالي الخرطوم) حتي صرخت بصوت عال :
• خلاس الإنتخابات انتهت وعاوزين يتقاسموا الكيكة !!
• (الحاجة صفيه في إستغراش) : هم عندهم عيد ميلاد وللا شنو؟؟؟
• والله يا حاجه ده مش عيد ميلاد ده مووولد عدييييل !
• مولد النبي محمد؟
• لا لا ده مولد وصاحبو غايب !
• عليك الله أقرأ ليا الخبر :
• الخبر بيقول ليك يا حاجة (علمت التيار من مصادرها إنو الحزب الإتحادي الأصل بزعامة السيد محمد عثمان الميرغني
• (مقاطعة) : ديل مش ياهم ناس (الفتة لو حارة؟)
• (مواصلاً) : طالبوا المؤتمر الوطني !
• (مقاطعة) : ديل مش ياهم ناس (أنتا أمشي القصر رئيس وأنا بمشي السجن حبيس؟)
• (مواصلاً) : أها يا حاجه بقولوا ليكي الجماعة ديل طالبوا المؤتمر الوطني يديهم موقع نائب الرئيس ومنصب والي الخرتوم وكمان رئاسة البرلمان !
• إنتا يا أخوي زمااان مش أداهم منصب (مساعد رئيس جمهورية) عملو لينا بيهو شنووو ! تتذكر لمن كنتا بشرب معاك في القهوة ووريتني صورتو !!
• بتذكر يا حاجة بتذكر خلاس أقيفي لحدّة هنا …(مواصلاً) : أها يا حاجة بيقولو ليك في مشاورات (سرية) بين (الطرفين) عشان يحددوا ناس (الفتة لو حارة؟) يشيلو ياتو (وزارات) وناس (أنا بمشي القصر رئيس وأنا بمشي السجن حبيس؟) يشيلو ياتو وزارات !
• (مقاطعة) : واشمعني مشارورات (سرية) هي الحاجه دي ما بتهمنا ؟؟ وللا ده سر بيناتم براااهم .. والله زي ما قلتا يا أستاذ ياهم قاعدين يتقاسمو في الكيكة وبالدس كمان !
• (مواصلا) : أها يا حاجة الخبر بيقول ليك ناس (أنا بمشي القصر رئيس وأنا بمشي السجن حبيس؟) اعترضوا على حصة ناس (الفتة لو حارة؟) لكن ناس (الفتة لو حارة؟) قالو ليهم تعترضو شنوووو .. حقو النقولوا ليكم تدونا ليهو ..هسه كان ما أنحنا كان الإنتخابات دي نجحت ؟ ما عملنا ليكم ليها (زخم) وعضدنا ليكم بي مشاركتنا دي (الشرعية) وكده
• يعني معني كلامهم ده عاوزين (التمن) ؟
• بالحيل … والله ياهو ذاااتو يا حاجه عاوزين التمن !
• يعني هسه باقي ليك يا استاذ الناس ديل عاوزين التلاته مناصب دي عشان يطوروا البلد !
• يا حاجه تلاته مناصب شنووو البيطورو بيها البلد .. والله دي (ويندوز) ما تطوروا
• طيب ما كان واحد فيهم يترشح لرئاسة الجمهورية !
• ههههههه دي يا حاجه ما الفتة الحارة ذاااااتا
• كيفن … هم ما (حزب معارض) !
• شوفي يا حاجه ناس (الفتة لو حارة؟) ديل أنا لا بعرفهم معارضين وللا موالين لكن عمرنا ما سمعنا لينا بي واحد منهم طلع في مظاهرة وللا أخد ليهو سوط سوطين وللا عيونو دمعت من البمبان !
• يعني ما عندهم خطورة على الحكومة ؟؟
• خطورة شنوووو يا حاجة … والله (قرفنا) دي أخطر على الحكومة منهم
• طيب ما عشان كده ح يدوهم (وزارات ومناصب) قدر خطورتهم !!
• ودي يا حاجه عاوزه ليها كلااااام !!
كسرة :
ناس (الفتة لو حارة) ديل لو عملو للواحد (عصابة سوداء) في عيونو وودوهو الحارة 97 وفكوهو هناك وقالو ليهو أرجع (الجنينة) علي باليمين بي (قوقل أيرث) GOOGLE EARTH ما يقدر يرجع !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و
