> ليه وأد الفرحة فينا يا والينا!!!!
> موضوع الاستقالات اتضح انو فشنك ساي
> لأن المنطق يقول إن الضباط الاربعة لو بقوا اعداء للمريخ
> لن يترجلوا في هذه المرحلة
> فالمعركة حامية الوطيس
> والترجل في هذا التوقيت خيانة عظمى
> وعدم وطنية
> وتخابر مع جهات اجنبية
> ولان الضباط الاربعة ليسوا بهذه الصفات
> كنا نستبعد امر الاستقالة
> ولكن بداخلنا سؤال
> من الذي اثار هذا الموضوع في هذه المرحلة؟؟؟
> وما هي مصلحته في ذلك ؟؟؟؟
> بالتأكيد من اثاره
> اما ينتمي للجهات الاجنبية
> او يتخابر مع جهات اجنبية
> المهم
> امامنا معركة مصيرية
> واصر اصراراً شديداً
> سنتخطى الترجي في عقر داره
> ومن عقر داره سنعلن تأهلنا
> لنغني
> الليلة جينا وكية للمابينا
> غنيناها قبل كده
> في سيكافا
> كنا في مجموعة مدني
> والمابينا كان في مجموعة الخرطوم
> تأهلنا بشق الانفس تاني للمجموعة
> وقادنا تأهلنا ذلك لمواجهة المابينا
> وجينا
> طيرناهو زي الماحاصل شيء
> ولان جماهير المريخ خلاقة
> ولأنها مبدعة
> كانت تغني منذ يوم التأهل من مجموعة مدني
> الليلة جينا وكية للمابينا
> والآن نرددها
> الليلة جينا وكية للمابينا
> ايها الناس
> المابينا البطولات الجوية مابياهو
> المهم
> نعطي الترجي حقه من الاهتمام والاحترام
> لنعطيه بطاقة لعب الدور المكرر في باب سويقة
> ايها الناس
> اخطاء صاحبت مشروع 2870
> المشروع يقوم على الاشتراك سنتين
> فجأة اصبح تبرع لا اشتراك
> قلت اخطاء صاحبت المشروع
> ولم اقل فشل المشروع
> الجهود تجري على قدم وساق لتصحيح الخطأ
> وضم شفوت الخارج ضرورة
> ناس قطر والامارات والسعودية
> عمان واليمن (يا حليل اليمن) وليبيا
> ليبيا واليمن ما ضياع زمن
> برضو برغم الظروف شفوتهم حاضرين
> ناس امريكا (كديس ورفاقه) وكندا (ناس سلطان) وانجلترا (ناس اكرم زكي و خالد سلك)
> وناس فرنسا يا ابا سفيان
> هولندا وبلجيكا والمانيا والسويد (ناس شوقي بدري) والنرويج
> استراليا (الكنغر حقها مريخابي)
> وكل دول العالم
> لازم يشملهم المشروع
> لانهم ينتظرون ضربة البداية
> يا ادروووووووووووب
> مادايرين نقول الروووووب
> ايها الناس
> اكتب قبل مباراة المابينا واهلي الخرطوم
> واهلي الخرطوم ليس سانغا
> لان فريق في مستوى سانغا لو لعب معانا الممتاز
> اكيد بهبط قبل السنتر ليق
> بهبط مباشرة
> وبالمناسبة
> فرق كتيرة بعد شافت سانغا
> فكرت تتطلب من الاتحاد العام ترشيحها للعب ببطولة الابطال
> الاشاوس الثورة وسط والثوار رابطة المهدية والهدف العرضة
> شايفين سانغا ده ما اخير منهم في شيء
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> والينا
> ليه يعني يا والينا
> انتوا عارفين الامة دي حزينة
> ولما تجي الحزينة تفرح تقفلوا عليها المطرح يا والينا !!!!
> ليه تتعمدوا تقتلوا الافراح فينا
> ليه توأدوا الفرحة في جوانا يا والينا !!!!!
> تقبروها قبل ترتسم بسمة في شفاه اطفالنا وفينا
> معقولة يا والينا
> وزير تربية حكومة ولايتك عملها فينا
> معروف انو الاسر تنتظر النتيجة عشان تفرح وتحتفل وتدعينا
> سعادتو قافل النتيجة في درجوا ومشى تركيا ولا قال لينا
> واصدر قرار غريب يا والينا
> منع المدارس والمعلمين من حضور مؤتمر النتيجة الليهو سنة رجينا
> ده يوم الحصاد يا والينا
> القبائل بتحتفل بيوم الحصاد رقيص وغنا وبضبحوا السمينة
> المعلمين يا والينا
> حافز سنة بالنسبة ليهم هو دعم معنوي يجعلهم يختالوا فينا
> يجعلهم يتميزوا علينا
> يجي وزير تربيتك في راسنا يقطعها لينا ؟؟؟
> الحكومات بتحتفل باليوم ده يا والينا
> بالناجحين والمعلمين والمتفوقين فينا
> مية ستة وتلتين الف ممتحنينا
> اذا كل زول عشرة انفار راجين نتيجتوا يا والينا
> يبقوا تلطاشر مليون وستمائة الف يا والينا
> دحين السوطوا كم يا والينا ؟؟
> نناشدكم يا والينا
> بالتدخل (السريع) وإعادة البسمة لينا
> نتوقع حضوركم مؤتمر النتيجة وتكريمكم للمتفوقينا
> والغاء قرار وزير تربيتكم الوأد الفرحة فينا
> مادياً قنعنا
> ادعمونا معنوياً يا والينا
سلك كهربا
ننساك كيف وزمان التعليم الخاص كان لاولاد الاغنياء الاغبياء اسي بقي استثمار الفقراء في اولادهم ليوم باكر
والي لقاء
سلك
(أرشيف)
