ودع هريرة أن الركب مرتحل
وهل تطيق وداعا أيها الرجل؟
كأن مشيتها من بيت جارتها
مر السحابة لا ريث ولاعجل
تسمع للحلي وسوسا إذا انصرفت
كما استبان بريح عشرق زجل
زهير بن أبي سلمى وهريرة دي محبوبتو.. هُريرة تصغير ودلع لهرة.. والهرة هي الكديسة.. وتصغيرها كديسونة.. يعني ودع كديسونة.. إتكلم عن مشية هريرة.. براااحة وبرواقة.. يعني ما بتكشت وما بتمشي براحة تتمحرك.. قال ود السافل “في المشي ما بنيش يملا قدمو تراب”.. يعني يرفع القدم براحة ويختو براحة وسمحة المهلة.. دا معناه في نسوان بيمشن وينيشن.. الواحدة تجيك عجاجتها تلوي.. والكريعات مليانات واطا.. وحالتها حالة.. تجي جارية علي الماسورة تفتحها فوقن.. وتمرقن وتخبط بهن الواطا “طااااخ.. طاااااخ” عشان ينشفن.. وتجي داخلة وأردلب تقعد فوق العنقريب وتقول “ووووب علي غايتتو جنس شمش”!!.. والظاهر والله أعلم زهير بن أبي سلمى خابر لو نسوان مشلهتات غير هريرة.. عشان كدي ورانا إنو هريرة “كديسونة” ماهلة في المشي مر السحابة لا ريث ولا عجل.. ما حضر زمن مر الرصاصة فوووووو تجي ماشة فيك.. تسلم من دوب ما إنت رديت السلام تكون قطعت ليها نص كيلو.. ولو داير ما تتلوم و ترد السلام تضرب ليها تلفون “وعليكم السلام”!! تسمع للحلي وسوسا إذا انصرفت.. الوسوسة الصوت الخفي أقل من الكشكشة.. الحلي يعني الدهب والفضة أصلن القاعدات يكشكشن هن.. وخصوصا الدهب لما يكون لابساهو ذات بوبار.. لو اتصلت بالموبايل علي واحدة تقربو من ايدها الفيها القويشات وتكشكشن وديك تقول ليها “الكشكشة دي شنو؟ الشبكة دي كعبة؟”.. دي هنا طوالي.. تقول لها وبي ضحكة وهي جذلة “بري ما الشبكة.. ديل غويشاتي الجداد ديل.. يا هناية دهب اليومين ديل بري منو.. كشكاش جنس كشكشة”.. أما هريرة تقوم براحة “إذا انصرفت”.. والدهب بدل يكشكش يوسوس.. حتى القومة من الغنقريب بي حساب دقيق.. واضعة في الاعتبار الجاذبية ومقاومتها وكتلة جسدها.. يعني ما بتخفس فنترب.. وآخر اليوم تشتكي ضهرها داير يتقصا.. من أهم ميزات جمال المرأة عند العرب “هيفاء مقبلة.. عجزاء مدبرة..لا يشتكي قصر منها ولا طول”.. يعني لما تجي ماشة عليك تشوفها هيفاء.. ولما تديك قفاها تحمد سيدك.. لا قصيرة مدردمة ولا طويلة بعد سنة سنتين مع (العجزاء) دا، تقعد تتشكا من القضروف..!! الدهب من أهم المعادن النفيسة البتتزين بيهو المرا.. وتحب تغتنيهو.. وتسوي ليهو عليبة وتدسدسو.. لكن أقول لهاويات اقتناء الذهب:- “أكد علماء جامعة كارلتون الكندية أن للذهب تأثير نفسي سلبي على من ترديه حيث أنه قد يزيد من نسبة الانفجارات العاطفية السلبية لمن ترتديه”..
كدي لاحظي أول ما تلبسيهو.. تلقي روحك اتشحتفت وطوالي تشبي في حلق راجلك وخصوصا لو كنتو طالعين.. وتحردي.. ولو مشيتو طول الدرب مطرمة وزهجانة.. ولما ترجعي وتملصيهو.. تلومي نفسك يا ربي أنا مالي مسخت علي الراجل دا وعلي رقبتي؟
عزيزتي لو كنتي حريصة على حياتك الزوجية.. أمرقي الدهيبات وأديهن الراجل يبيعن.. الدهب طاير في القبل الأربعة!!
