ملح.. و.. ملاح

الملح والملاح.. يخففن ما بين الناس من توتر.. ناس اتشاكلو تلقى واحد قال للتاني نحن بينا ملح وملاح.. وما داير اتلوم فيك.. أو يذكرو بأنو (النضم دا عيب نحن بينا ملح وملاح).. (يا ناس إنتو بيناتكم ملح وملاح)..
والملح والملاح بين الناس بتخليهم يقدموا تنازلات كتيرة.. لاستمرارية علاقتهم.. الملح براهو ما هين.. بالرغم من أنه مادة متوفرة ورخيصة.. الملح للكائنات الحية ضروري.. لتوازن السوائل في الجسم والخلايا.. وقصة الأمير القال لأبوهو الملك أنا بريدك زي الملح معروفة ومشهورة.. وفي نهايتها الملك اعترف بضرورة الملح.. وزول (ملح مجالس) يعني طاعم ووناس.. بس أحيانا الملح الزيادة.. يسبب مشاكل.. وعشان كدي يقولو زول مسيييييخ ملح بس!..
والملح اقتصاديا هو المجاني.. أي حاجة مجانية فهي ملح.. وهي دلالة على رخص الملح.. لو دخلت أي مطعم وشلت ملح مافي زول بيقول شي.. لكن لو شلت شطة ممكن ينضموا معاك.. ويوروك إنو الشطة غلت وبقى الكيلو بالشي الفلاني.. لكن نحن حاقرين بالملح..
لو قلت لي زول إنت ملح بيزعل لكن لو قلت ليهو إنت عسل يتبسط وكلما يلاقيك يتبسّم في وشيك.. حقارتنا بالملح لا تعادلها إلا حقارتنا بالحمار..
للملح فوائد كتيرة منها ما هو للنضافة بصورة عامة ومنها ما هو صحي.. غير فائدة الأكل.. الملح ممكن ينضف النحاس، ويزيل الصدأ، والريحة الكعبة في العدة، ويحفظ اللحم من التعفن.. وممكن يحفظ الجزم والنعلات من الريحة دعك بطن الجزمة بقطعة مبلله بملح وإن الشغلة كترت عليكم ألبسو شباشب وسفنجات، فوق كم؟.. ويثبت طعم الأكل.. ويعوض الأملاح البتتبخر أثناء الطبخ..
أما النواحي العلاجية.. فيعتبر الملح أبو المطهرات.. ولكتير من أنواع الميكروبات شايل ليها مقلاع.. قال العلماء إن للملح 1400 فائدة.. بعضها:
الملح ينفع التهابات اللثة.. يعني ممكن الزول يتمضمض بيهو.. أو يتسوك بيهو عديل.. بس يعمل حساب الكمية..
الملح مع العجين المر ينفع التهاب الحلق وأب عديلات واللوز.. لبخة ملح..
الملح غرغرة لالتهاب الحنجرة.. وشوية ملح شراب مع موية بينفع نزيف الفشفاش
غسيل الكرعين بموية الملح.. بينفع الفتر.. وورم الكرعين.. وخصوصا للناس الديمة دايحة وتلقى الواحد لافي البلد بكراع كلب.. واقول للزوجات “ربات البيوت”.. عليكن الله رجالكن إن جاكن الواحد فتيراااان.. غسلن الكرعين بموية ملح.. منها أجر ومنها الزوج بيتبسط منك.. ويبقى بينكم ملح وكرعين.. وإن بقى داير يتلوم فيكي يتذكر غسيل الكرعين بموية الملح.. وبيضّن النية الواحدة ما تجي تشطفو بالملح وتنقنق: “تعال اشطف لك كريعاتك ديل.. عملاً لي الله”.. وما تحفظها لحين شكلة وترميها في وشيهو: “خااااااتية انا.. المقابلة كدارينك ديل كل يوم واشطف فيك”..
الملح مع الزيت مسوح.. للنزلة والتهاب الصدر.. وخاصة للشفع.. وأخير من الأدوية الكيماوية.. والحقن.. وغرغرة الشافع الدواء نص الدواء يبلعو والنص التاني يشرشر من خشمو يملا هدومو..
وأخيرا يقول علماء الكواديك ان شتيت الملح حول البيت.. بيبطل مفعول الكادوك.. مهما كانت قوته.. احتياطا كل مرة شتتو ملح حول البيت.. والله يكفيكم شر خلقو!!!!!!!