والعقرب بتاعنا بيعض برضو
شفتوا ليكم عقرب بيلدغ ويعض
ده عقربنا
شكيناه علي لوزان
اشكوه علي لوزان
لوزان عملت اتفاق ما بين ايران والقوى الكبرى
في موضوع النووي.
بكري (النووي).
غايتو الزول ده مشع.
كان في الهلال اشاعة.
وبقي عندنا مشع.
*كانو
لم يفعل المريخ شيئاً سوى ان حمل النقطة من تحت لفوق
بدل كابو عملها كانو
كانو مشاركين في البطولة الافريقية
اما لعيبة المريخ
فلقد كانوا أبطالا
كالعهد بكل من يلبس النجمة
البلبس النجمة زي الببلع النجمة
بيكون سمين
والمريخ سمين وثمين
صعد الى الستاشر وجماهيره تتباشر
وكيف لا تفعل وهي اول من لبس الحريرة وعمل الضريرة
وآخر
البقية عزابة
لم يتذوقوا جديدا
ااه أيها المريخ
لو عرفت كيف ترقبنا فجرك
وكيف ان الف ديك قد ارسلت البشارات
من هنا سافر المريخ فائزا ومتأهلا
ويوم السبت الماضي كان غارزيتو معنا
وصرح لنا انه لا يخاف علي المريخ الا من التحكيم
لم نستطع ان نسقه قصيدة الدكتور عمر محمود
بأن المريخ يهزم التحكيم والتنجيم
وفي انغولا أحرز المريخ هدفه
وحقق هدفه.
وجا لكي يستعد للبعدو.
تبقت للمريخ خمس أندية فقط قبل البطولة
والمريخ هو عاصمة كرة القدم.
والميناء الرئيس
سواه منسي يتلحف الأسى ويتنهد النسيان
الواحد الصحيح جاء بالصعود الصريح
ونعتذر لعشرات الصفوة ممن هاتفنا ولم نستطع الرد
ما كنا لنستطيع ان نرد على الجميع
لكن الفرحة كانت واحدة والتهاني واصلة
وها نحن نسوقها لخمسة وعشرين مليوناً مريخابياً
ان مريخهم قد خرج بازا عشه تحت ابط الشمس
وتمساحا حبس الدرب
له الغابة والغايات
الجو والجوى
الحب والريد
عطر الأماسي ونسائم الدغش
وحده من يعطي هذه البلاد رضاها عنها
ويضبط ايقاع أوتار القلوب
وبفرح خرافي نكتب
لأنه أعقب توتراً كبيراً خليق بالعشاق
ولساعتين كان السودان مخدرا
ثم انطلق مهرجان التهاني
وانفتح باب الاماني
وهذه الرمية
فانتظروا في غد الاغنية كاملة
عسى ان نضيف في الغد بيتا غير مرجوء
مين عارف
الله بيدي الجنة
