عشان كدا (الجاز) بقوا يصرفوه لينا بـ (البزازات)

فجر ليهم (عاصفة الحزم) في التسجيلات يا الكاردينال ..خلي الجماعة يقعدوا يتلفتوا متل كراسي الخيزران
نحن (الجوهرة الزرقاء) دي عاوزين ندخلها الموسم القادم بي فريق يهز الارض…ما عاوزين اي خسارة في الجوهرة الزرقاء
الجوهرة الزرقاء دي ..لو جاءت في وقت الهلال متراجع فيه …كنا يمكن ان نقول (تصبيرة)..لكنها جاءت والهلال متقدم في كل المجالات
الكاردينال هو رئيس نادي الهلال ..عمل (الجوهرة الزرقاء) او لم يعملها..يعني ما محتاج يغش ليه زول

يتخيل لي كدا ان السودانيين ديل جوا على تلاتة دفع.
الدفعة الاولى ..دفعة غالاطة شديد.
والدفعة الثانية ..دفعة غالاطة شديد.
والدفعة الثالثة ..برضو غالاطة شديد.
طيب من البداية جايننا على تلاتة دفع ليه؟.
قامت الدفع التلاتة دي اتلاقوا – وقعدوا يتغالطوا لينا.
غلاط صاح.
محل ما تقبل غلاط.
في السودان لو فتحت ليك (محل غاز)..ممكن من صباح الرحمن يجيك زول ويقول ليك المحل الفاتحو دا ما محل غاز.
تقول ليه محل شنو؟.
يقول ليك (براويز).
في الوقت الذي يكون المحل (صورة) ما فيه.
ما بتقدر تقول ليه اي حاجة من الصباح – براويز – براويز (اصلو بيني وبينكم غاز مافي).
وممكن.
ما في حاجة بعيدة في السودان دا.
ممكن تكون قاعد في (خشم الباب) وبتغني لمحمد الامين في (الحب والظروف) متصعبة معاك خالص.
ممكن يجيك واحد من ناس الحلة ويقول ليك انت ما قاعد تغني لمحمد الامين انت قاعد تغني لعائشة الفلاتية.
ولا بتقدر تقول حاجة.
تقول ليه انا بغني لمحمد الامين تبقى في سين وجيم…وما تعرف البتمرقك.
عائشة الفلاتية – عائشة الفلاتية.
يعني بقت على دي.
عادي – في السودان الحاجات دي تحصل.
ممكن.
تكون راكب مواصلات الكلاكلة تلقى نفسك في ابوروف.
تقول للكمساري دا شنو البتعملوا فيه دا؟.
يقولوا ليك غيروا الليلة الصباح سير المواصلات.
عادي.
ولا تزعلوا.
ولا في حاجة بتستاهل.
ممكن تشتري ليك (بطيخة) قدر الكتلة ..وتشيلها وانت فرحان بيها وتمشي على البيت.
يلاقوك (الشفع) في الشارع متل (كتاب المطالعة) بتاع سنة تالتة.
قبل ما تدخل البيت ..ممكن يثبتك زول يقول ليك الشايلها دي ما بطيخة ..تقول ليه طيب دي شنو؟.
يقول ليك (جدادة).
ولا تتعب تغالطو..ولا تحرق معاه دمك.
جدادة …جدادة ..يعني بقت على (البطيخة).
انتوا ما قايلين (البطيخة) ممكن تعملها ..وتقوم (تكاكي).
ممكن.
بطيخ البلد دا عندو جن في رأسو.
كمان البطيخة عندها حصانة.
نرشها زي ما عاوزين.
البطيخة والمروحة.
ممكن تجيب ليك (لوري طوب) ..وتنزلو قدام البيت ..والحلة كلها تشهد بي ذلك.
لوري الطوب تنزلو طوبة – طوبة.
يقوم يوم الجمعة العصر ..يجيك واحد من الجيران ويقول ليك (الطوب) النزلتو قدام البيت حقكم دا ..ما طوب.
تقول ليه شنو؟.
يقول ليك : (عدس).
عدس الزمن دا غريب.
عدس كلكي.
ممكن.
ممكن العدس ذاتو تعملوا في الغداء ..يقولوا ليك عدسك دا ما عدس.
تقول ليهم شنو؟.
يقولوا ليك (برسيم).
تكتلها في قلبك.
ناس مزمل ابوالقاسم..الهلال جاب ليه شركة صينية لبناء (الجوهرة الزرقاء)..قالوا الشركة الصينية دي ما شركة معمار وبناء ومقاولات ..قالوا الشركة دي شركة (مستلزمات اطفال).
نحن في الشتاء يا ربي.
نحن في الربيع.
نحن اللخبطة حصلت عندنا للمستوى دا.
عشان كدا.
عشان كدا شنو؟.
عشان كدا مبنى وزارة (النفط) بشارع النيل الذي نفذته الشركة الصينية بتاعة (مستلزمات الاطفال) مبني اطفالي اطفالي.
وعشان كدا (النفط) ذاتو بقوا يصرفوا لينا بالبزازات.
الواحد بقى يقيف في الطرمبة يصرفوا ليه (الجاز) بالبزازة.
نحن شفع.
الحالة بقت صعبة.
انتوا موش يا مزمل قلتوا الشركة الصينية التى نفذت مبني وزارة النفط بتاعة (بزازات)..وانا اقول الحصل في (النفط) شنو؟.
اتاريها الحكاية من بدايتها بتاعة اطفال.
باللـه المواضيع وصلت الحد دا.
نحن خلونا …اعتبروا ناس الهلال اتغشوا.
ناس الحكومة ديل مغشوشين بالشركة دي ليهم اكتر من عشرين سنة.
عشرين سنة بعملوا في الصروح والمؤسسات الحكومية بواسطة شركة مستلزمات اطفال.
نحن طلعنا اي كلام يا جدعان.
نحن اشترينا الترام.
نحن ما نحن.
المواضيع اتشقلبت.
ادمنّا (الغلاط).
بقينا من نشوف لينا موضوع نقعد (نتغالط) فيه.
الاساس عندنا (الغلاط).
يعني ممكن عادي جدا – الزول يعمل ليه (شوربة فراخ) من كترة الغلاط شوربة الفراخ تبقى (شوربة عدس).
نحن بقينا فاقدين للثقة للدرجة دي.
ثقة بقت مافي.
الكاردينال اعلن عن توقيع عقد الجوهرة الزرقاء ..وجاب الشركة الصينية ووقع العقد في حضور اعلامي كبير وفي وجود وزير الشباب والرياضة ورئيس المجلس التشريعي لولاية الخرطوم محمد الشيخ مدني.
وحضر حفل التوقيع حسن هلال رئيس الهلال السابق ووزير البيئة الحالي والفريق ركن عبدالرحمن سر الختم رئيس نادي الهلال السابق والسفير والوالي.
الجماعة مع الحاجات دي قالوا ابدا ..ما في حاجة اسمها (جوهرة زرقاء) والكاردينال بغش في الناس.
بغشهم ليه؟.
في زول عاوز منو حاجة؟.
وإلا جابرنو.
الكاردينال هو رئيس نادي الهلال ..عمل (الجوهرة الزرقاء) او لم يعملها..يعني ما محتاج يغش ليه زول.
لا الكاردينال داخل على انتخابات…ولا على الكاردينال ايصالات امانة.
الكاردينال براهو منو وليهو ..ولا في زول قال ليه ..قال عاوز يعمل (الجوهرة الزرقاء).
الجماعة قالوا العقد الذي وقعه الكاردينال دا ما عقد ..دي عقد (وهمي) ساكت ..وقالوا الشركة الصينية دي ذاتها ما شركة صينية للمقاولات.
دي شركة مستلزمات اطفال.
الكاردينال اليوم التاني كما اعلن في حفل توقيع العقد دشن العمل في الجوهرة الزرقاء.
الجماعة قالوا التدشين دا ..حركات ساكت.
دي تمثيلية.
طيب وين احمد بدير؟.
وين خالد يوسف؟.
انتوا عاوزنو يعمل ليكم شنو؟.
يختصر ليكم العام الذي تحتاجه الشركة الصينية من اجل اكمال المشروع في (24) سنة.
يجر ليكم السنة.
يفتتح ليكم الجوهرة الزرقاء قبل التدشين.
انتوا عاوزين شنو؟.
نحن ما فاهمين.
يبدأ ليكم من الطابق التاني طوالي.
يا كاردينال ..الجماعة ديل بقتنعوا بي حاجة واحدة.
الجماعة ديل عاوزين ليهم (قنبلة) في التسجيلات.
فجر ليهم (عاصفة الحزم) في التسجيلات ..خلي الجماعة يقعدوا يتلفتوا متل كراسي الخيزران.
منطقهم بي قنبلة في مايو.
السنة كتيرة.
نحن ما بنقدر ننتظر سنة كاملة.
خلينا نقزقز ونمزمز لينا بي (قنبلة في التسجيلات).
بعدين يا جماعة بدون (تريقة)..الكاردينال الجابرو على الكضب شنو؟.
محتاج يكضب.
محتاج يغش الناس بالجوهرة الزرقاء.
الهلال حسم موضوع التأهل الافريقي باذن اللـه بنسبة 90%.
والهلال يتصدر الدوري الممتاز بفارق 4 نقاط من المريخ.
الهلال تعاقد مع المدرب التونسي الشاب الطموح نبيل الكوكي.
الجوهرة الزرقاء دي ..لو جاءت في وقت الهلال متراجع فيه …كنا يمكن ان نقول (تصبيرة)..لكنها جاءت والهلال متقدم في كل المجالات.
عاوزين من الكاردينال عشان امورو تظبط ..والحاجات كلها تمشي مية المية ..ينجز ملف تسجيلات مايو.
عاوزنو يضرب على تقيل.
نحن (الجوهرة الزرقاء) دي عاوزين ندخلها الموسم القادم بي فريق يهز الارض.
ما عاوزين أي خسارة في الجوهرة الزرقاء.
ما عاوزين اي هدف تستقبله شباك الهلال في الجوهرة الزرقاء.
لذلك دعموا فريقكم من الان ..عشان نصل للمستوى المطلوب ..ونخلق فريق يهز الارض.
…….
ملحوظة : الخريف لو سمع كلامكم دا ما بتنزل عليكم مطرة.

هوامش

الاتحاد اقتنع.
جماعتكم طلعوا ليهم بيان مشترك مع الهلال.
انتوا بتديروا ليكم (لجنة).
شنو كل ما تحصل ازمة يطلعوا ليهم (بيان مشترك).
تأجيل مباراة الهلال امام الرابطة لم تكن في مصلحة الهلال.
ناس الهلال كان يفترض يلعبوا مباراة الرابطة ويسافروا.
رحلة الهلال الى ملاوي سوف تعرضه لمتاعب ورهق كبير.
عشان كدا كان احسن يلعبوا المباراة.
لكن برضو ما كعبة معانا.
عشان ناس الاتحاد ديل يفهموا حاجة.
الهلال قال ما بيلعب.
وما لعب.
نحن لا بنعرف بيان مشترك ولا حاجة.
ولا بنقتنع بالحاجات دي.
تسجيلات مايو ..مطلوب من الهلال ان يحدث اضافات اخرى في الرديف.
خاصة ان مجلس الهلال بنظر الى الرديف على انه فريق مستقبل الهلال.
لذلك يجب تدعيم الرديف.
ماهر مهاجم ام بدة ..والمنتخب الاولمبي اشاد به زميله وليد علاءالدين وتمناه في الهلال.
يا رمضان عجب انت كمان ما تضيق ..اصبر شوية.
يعني غالبك تستحمل الجماعة ديل ايام.
………..
عاجل : امك الشركة الصينية قالوا برضو شغالة في مزارع الدواجن!!.