رمضان عجب الحالة : (متصل الآن)

بعدين انت يا عبدالصمد مع (الديون) دي ح تعيدوا قيد رمضان عجب كيف؟..إلّا تدفعوا ليه الدفعة الاولى من عقدو مع المريخ (حصص لغة عربية)

انتوا وكالة السفر بتاعة اسامة ومجدي لخبطت شغلكم يا معتصم…قوانين وكالة السفر بقيتوا تجيبوها الكورة ..وقوانين الكورة بقيتوا تشيلوها لي وكالة السفر

عبدالصمد محمد عثمان قال سوف نعيد تعاقد رمضان عجب في مايو.
كلامك ما كعب ..لكن برضو قول لينا (مبلغك) يا عبدالصمد.
نسمع كلامك.
قول كلمتك.
نسمع.
موش الزول وقت يكون عاوز يشتري ليه حاجة ..في سماسرة كدا زي (ورق الاربعطاشر) بقولوا ليك نسمع كلمتك.
يا عبدالصمد سمعنا كلمتك.
رمضان عجب دا نحن سمعنا فيه (5) مليار..ورمضان رفض.
قالوا شوية…رمضان (المنقذ).
هسع لو عندكم سبعة مليار ..طلعوها.
ما عندكم (اتفكك) لينا يا استاذ.
يا عبدالصمد رمضان عجب دا ..ناس الاهلي شندي دفعوا فيه خمسة مليار جنيه.
شوف الهلال بدفع كم؟.
الهلال قالوا خلاها مفتوحة.
الكاردينال ..قال ليكم الكلام – قعدتوا تتغالطوا – كلامو ما عجبكم.
الكاردينال قال ليكم لو عاوزين نجيب (ميسي) بنجيبو.
بس خايفين على (ميسي) من قطوعات الكهرباء.
خايفين عليه من قطوعات الماء الحاصلة الايامات دي في البلد.
الزول دا ما بقدر على البهدلة دي.
يمين (ميسي) يجي هنا ..الكورة الفي رأسو تطير.
عندنا حكام …اللاعب لو ضربوه بي (ساطور) بيمشوها.
وسيحة يقول ليك في اول جمعة (ما فيها حاجة).
ما فيها حاجة كيف يا سيحة ؟ ..انت اللاعب إلّا يفرشوا ليه.
إلّا جنازتو تطلع في بربر.
بعد دا كلو سيحة يقول لينا مفروض يأخد (كرت اصفر).
ولا حتى كرت احمر ما عاوزين يدوه ليه.
ميسي يلعب في ملاعبنا دي ..كورتو كلها بتمشي (الكشافات).
ميسي يقوم يبقى ليكم (بلة جابر) تو – نقوم نحرم العالم من ابداعات (ميسي).
ونحن بلة واحد عامل لينا (زغزغة) في الغدد الدرقية.
في علاقة بين العيون والغدد الدرقية؟.
اعتقد ذلك ..عندنا استاذ علوم زمان قال لينا في علاقة.
لكن كمان لو الكاردينال عملها …وجاب (ميسي) ارض النيلين ..بكون قدم خدمة العمر للريال.
ناس الريال برتاحوا في عضمهم.
وبرّد يا.
نحن ميسي مع موياتنا العكرانة دي ما عاوزين نقطع رأسو ورأس البرسا ساكت.
عندنا موية من الطين الفيها بنشربها بالملاعق.
يا الكاردنيال خليه (ميسي) بيكون حرام علينا لو جبناه يلعب في ملعب (النقعة).
يا كاردينال اتواضع ..وجيب (رمضان عجب).
الكاردينال قال ليكم قبل كدا.
كلمكم ..قال ليكم نحن القروش العندنا الحكومة ما عندها.
شوفوا قروش الحكومة دي ممكن تجيب كم رمضان عجب؟.
الكاردينال لمن قال كدا – قاصد المريخ.
لمن قال الهلال القروش العندو ..الحكومة ما عندها ..قاصد المريخاب.
اصلها قروش الحكومة كلها (مكبوبة) في المريخ.
يا مريخاب قروش الكردينال اكتر من قروش حكومتكم.
الغريبة الميزانية طلعت كلها (ديون).
شغالين بالجرورة.
انتوا فكرة (الديون) دي ما كان تدوها الموردة.
الموردة لو اشتغلت بي طريقتكم دي بتاعة الديون دي ..ما كان نزلت.
لكن الموردة عندها كرامة ..ما بتشتغل بالدين.
عبدالصمد قال ح نعيد قيد رمضان عجب في مايو..(بعيد ليكم الكلام تاني).
يا عبدالصمد …نفتح ليك اضانك لو كنت ما عارف.
لو ما ناقش حاجة ..(ظاهر عليك انت قاعد ساكت – ما فاهم اي حاجة).
يا عبدالصمد تصدق نحن بكري المدينة اعدنا قيده ..وشال من الهلال 810 مليون جنيه ..مع ذلك مشى المريخ.
يعني حكاية ح نعيد رمضان عجب في مايو ..ما بتقسم معانا.
ولا بتقنع ليها زول.
هو الزول العادو قيدو فعلا …طار ..والاتحاد العام ..عمل فيها ما فاهم حاجة ..ورفض اعتماد تسجيله في الهلال.
طيب الـ (810) مليون جنيه دي استلمها الاتحاد العام من بكري المدينة ليه؟.
معتصم جعفر قال كأمانات.
بالـلـه.
انتوا يا معتصم طلعتوا بتاعين (امانات).
امانات شنو؟.
انتوا وكالة السفر بتاعة اسامة ومجدي لخبطت ليكم شغلكم.
بقيتوا ما فاهمين حاجة.
قوانين وكالة السفر بقيتوا تجيبوها الكورة ..وقوانين الكورة بقيتوا تشيلوها لي وكالة السفر.
خلونا هسع مع عبدالصمد ..ناس الاتحاد ديل نحن ما حاسبنهم.
نحن ما قاعدين نعدهم.
ولا شغالين بيهم.
عشان ما عندهم كلمة.
ولا عندهم رأي.
ولا عندهم وزن.
ما عندهم اي حاجة ..قاعدين صور ساكت.
عبدالصمد قال سوف نعيد قيد رمضان عجب في مايو.
عشان رمضان بنتظركم.
لو الاهلي شندي ..تفتكروا الهلال بنتظر.
بعدين انت يا عبدالصمد مع (الديون) دي ح تعيدوا قيد رمضان عجب كيف؟.
إلّا تدفعوا ليه الدفعة الاولى من عقدو مع المريخ (حصص لغة عربية).
الدفعة التانية تدفعوها ليه (حصص رياضيات).
غير كدا ما عندكم حل.
رمضان عجب …الجماعة ديل غرقانين في الديون لي سور استاد المريخ.
الرد كسل ..طلع كلو ديون.
الرد كسل …طلع (الرد كسر).
يا رمضان عجب انت الجابرك على الديون دي شنو؟.
يا زول اتخارج.
الجماعة ديل ممكن يصلوا معاك لي مستوى يقولوا اي لاعب يشتري (الكدارة) حقتو من حر ماله.
يمكن المعسكرات ذاتها يعملوها ليكم مساهمة.
تبقوا زي الفريق القومي.
يا رمضان ..الجماعة الدفعوا في بكري المدينة تلاتة مليار ..لو ما دفعوا ليك (سبعة) مليار تلفونك ما تفتحو.
بكري المدينة ..القون بيجيبو في السنة مرة.
وكل مرة عامل ليه مشكلة.
مرة مع سواق هايس.
ومرة مع حكم المباراة.
وبدفعوا ليه تلاتة مليار.
انت يا رمضان عجب ..رمضان (المنقذ) ..في كل مباراة بيجيب ليه قون وينقذ المريخ يدفعوا ليك كم؟.
شفتوا يا رمضان عجب لو مشيت (مريخ الفاشر) مع فيصل العجب ..الجماعة ديل لو ما جابوا ليك السبعة ما توقع ليهم.
ما يقولوا ليك الباقى بنكملوا اقساط.
جمال الوالي ماشي ..جمال الوالي تاني ما قاعد ليكم …يعني لو اتسجلت بالدين لمن تبقى (مدير فني) ..ما بتخلص حقك.
الطريف والحاجة الما وقعت للمريخاب …ان المريخاب طلعوا في جرايدهم تصريح لي رمضان عجب.
بيطمنوا في نفسهم.
جاء في صحيفة الزعيم : (نفى نجم المريخ رمضان عجب وجود اتصالات بينه و نادي الهلال وقال أن كل ما ذكر لا أساس له من الصحة و أضاف : أنا ما فاضي للهلال أو أي ناد آخر حاليا و لدى ملف مهم مع فريقي وهو التأهل للدور الثاني من الأبطال ، و طالب رمضان جماهير فريقه في حديثه لصحيفة الزعيم الرياضية بعدم الانزعاج و التركيز في تشجيع اللاعبين و الوقوف معهم بقوة لان المريخ يحتاجهم).
شاطر يا رمضان عجب.
مفتح.
خليك مركز في الملف الافريقي.
الهلال لاحق.
لكن الغريبة ..مامون ابوشيبة وهيثم كابو الاتنين قالوا ان رمضان عجب في مباراة المريخ الاخيرة امام الخرطوم الوطني كان ما مركز.
وكان سارح.
وبالو بعيد.
يكون يا ربي بفكر في شنو؟.
يكون عاوز يشطّب البيت.
ما بفتكر…شطيب البيت ما عاوز (السرحة) دي كلها.
وبرّد يا.
طيب مالو؟.
يكون عاوز يكسر البيت من الاول ..عشان يعملو خمسة طوابق.
تلاتة مليار ما بتعمل ليها خمسة طوابق.
إلّا سبعة مليار.
الغريبة علاءالدين يوسف قبل ما يمشي من المريخ الى الهلال كان بقول نفس الشيء.
وبكري المدنية.
الشغيل ذاتو كان بقول كدا.
نحن كلمناكم ..وفتحنا ليكم اضانكم ..عندكم سبعة مليار ..مبروك عليكم.
ما عندكم سبعة مليار..انتظروا من (الغلاف للغلاف) بعد التوقيع.
…………
ملحوظة : بتخلوا الواحد يقول ليه كلام ما كان عاوز يقولو.

هوامش

انا ما عارف بتجيبوا الكلام دا من وين؟.
كلام شنو؟.
انا عارف.
انا قلت حاجة.
وبرّد يا.
اتخيلوا رمضان عجب في اليمين.
ومهند الطاهر في الشمال.
يمين وشمال.
تاني البقعد ليكم في القون منو؟.
غايتو إلّا حارس ما عندو رأس.
وما عندو اضنين.
مع (الصواريخ) دي البيثبت منو؟.
الهلال مفروض يحسم موضوع التسجيلات من بدري.
نتمنى ان يحسم الكاردينال مع مهند الطاهر من بدري ..قبل ما مهند الطاهر يطير.
الكاردينال عندو تجربة سابقة مع مهند الطاهر.
اذا اعاد الكاردينال من قبل وهو خارج المجلس مهند الطاهر ..إلا يعيده وهو رئيس الهلال.
التسجيلات تبقى ليها شهر وشوية.
الكاردينال عليه ألا يهتم بالحملة الاعلامية التى قصدت ان تصرفه عن التسجيلات.
رد عليهم بالتسجيلات.
وخلي الهلال دائما في العلالي.
حتى موضوع (الانسحاب) يجب ألا يصرف الهلال عن الملفات الساخنة التى تنتظر الهلال.
نبيل الكوكي كان (خبطة) جميلة من الكاردينال.
كمل الجميل بالتسجيلات يا الكاردينال.
ماهر لاعب ام مبدة ومهاجم المنتخب الاولمبي مكانو الهلال.
عاوزين هلال 2017م ..يكون مكتمل العناصر.
وارمي بعيد يا كاردينال.
تحية خاصة لخالد النقر الذي قدم لنا فريق (الرديف) الذي اجبر الاتحاد العام والمريخ يأجلوا دوري الرديف.
وركز في الرديف يا خالد النقر.
……….
عاجل : لو قلت ليكم عاوزين رمضان عجب للرديف بتصدقوا؟.