مصطلح درج على تداوله شباب الزمن العلينا.. لمن لا يفقه شيئا.. في شيء يعتقد أنه يعلم فيه.. وهو مصطلح واسع الطيف.. ممكن يغطي جوانب كتيرة.. من المال إلى التفكير.. زول مفلس فعلا (كيسو فاضي) بحق وحقيقة.. زول عامل شاعر وتسمعو وما تلقى عندو شي بتعتبرو (كيسو فاضي).. كاتب يكتب يكتب.. وفي النهاية تلقى (كيسو فاضي).. سياسي ينضم وينضم في النهاية تكتشف إنو (كيسو فاضي).. وصراحة السياسيين أكتر ناس شايلين أكياس فاضية ولافين.. أسوأ حاجة أن تحبط في شخص تراه فتعجبك هيئته.. لكن لو نضم تقعد تتضارى من الدراب.. ويتجسد فيه المثل (سماحة جمل الطين).. وجمل الطين هو الجمل المعمول من طين.. شكله جميل لكن لا بيودي لا بجيب.. والمشبه بجمل الطين.. هو شخص جميل الشكل أنيق الملبس.. سماحتو تعاين ليهو وما ينضم.. وعبر المتنبئ عن الزول (الكيسو فاضي) ببيت الشعر:
أعيذها نظرات منك صادقة
أن تحسب الشحم فيمن شحمه ورم
يعني الزول الوارم دا لا شحمان ولا حاجة دا ورم ساكت.. يعني بالمختصر كده المتنبئ داير يقول لسيف الدولة الزول القدامك دا (كيسو فاضي).. الإمام أبو حنيفة النعمان.. كان بيدي في درس.. وكان عندو ألم في الركبة عشان كدا بيمد كرعيهو.. دخل عليهو راجل قيافة نضيف يسر الناظر إليه.. وجلس في المجلس.. أبو حنيفة لملم كرعيهو احتراما ليهو.. واعتقد إنو عالم جليل.. نط الزول القيافة وسأل أبو حنيفة.. يا أبو حنيفة.. متى يفطر الصائم؟.. أبو حنيفة قال ليهو عندما تغرب الشمس.. رد الراجل القيافة وخت أصبعو في صدغه وبتحد (أها.. طيب لو الشمش ما غاااااااااابت؟ يفطر متين؟).. فقال أبو حنيفة (آن لأبي حنيفه أن يمد رجليه) ومددن بعد أن اكتشف إنو الزول (كيسو فاضي).. لأنو السؤال سؤال غبي.. ويظهر الزول دا استحما ولبس سمح وقال يجي يحرج أبو حنيفة ويدخلو في ضفورو.. والنوع الزي دا كتاااااار.. في روايات أخرى أنه سأل عن صلاة الصبح ولو الشمش ما شرقت..!!
.. في الهند.. والهند أرض العجائب يعني أي حاجة يقولو ليك حصلت في الهند صدقها.. في خبر في صحيفة العرب اللندنية.. إنه في إحدى القرى الهندية عروس طلقت عريسها في نفس يوم العرس.. وهم قاعدين في الكوشة بسبب اختبار في الحساب.. قالت تختبرو.. قالت ليهو (خمسطاشر زايد ستة كم؟).. سرح وقعد يحسب.. في النهاية قال ليها (دحين مو سبعطاشر؟).. اكتشفت العروس أن العريس (كيسو فاضي) أو ربما ما عندو كيس كلو كلو.. بالرغم من أنها سألتو سؤال ساهل عشان تمشي الموضوع.. لكن هو خذلها حتى السؤال دا غلبو.. رفضت العروس إكمال الزواج.. وتدخلت الشرطة لإقناع العروس وأهل العروس.. قال والد العروس إن أهل العريس غشونا.. مسألة زي دي تلميذ في أولى ابتدائي يحلها، العريس ما قدر عليها!!.. ما عارف ليه هي يوم العرس، تنكد عليهو وتمتحنو؟.. المصيبة تكون سألتو في مكرفون الحفلة وهو جاوب برضو في الميكرفون.. في الهند العروس هي البتدفع تكاليف الزواج.. يعني فوق عديلا.!!
كيسو فاضي
