اشتبكوا مع (الشرطة) القومية (السودانية) وطلعوهم من الملعب ..وقالوا ناس الهلال ما عندهم وطنية
ناس المريخ فرحتهم بالتأهل من التمهيدي زي الضحك المبالغ فيه في النكتة البائخة
هسع يقوموا يعملوا ليهم (مهرجان)..تقوم الحكومة تقول كدا تتبرع ليهم بـ (6) مليارات جنيه
إعلام الهلال مع تأهل الهلال وترقيه لدور الـ (32) في ظروف صعبة – إلّا انه مع ذلك إنتقد الهلال
زمان (الطلبة) كانوا كلهم بتجرسوا ليك في إمتحان الرياضيات.
الواحد فيهم من أول (5) دقائق في الإمتحان بقول للمراقب عاوز أشرب.
من الحكم المدرسية الخالدة والتليدة ..حكمة (الرياضيات فراق الحبائب).
باعتبار ان امتحان الرياضيات بفرق بين طلاب الدفعة الواحدة – الطالب الكويس بمشي لي قدام – والطالب المستواه كعب بيركلس قبلو.
امتحان الرياضيات كانوا بتجرسوا منو حتى الطلاب الاوائل …الواحد يطلع فيهم من الامتحان زعلان.
واي واحد – البفهم والما بفهم يقول ليك جابوا لينا سؤال برة المقرر.
برة المقرر كيف؟..يعني جابوا ليك جداول ضرب (هندية).
بالمناسبة جداول الضرب في كل الدول واحدة.
موحدة.
في الهند والصين والولايات المتحدة.
لكن نحن في السودان هنا بنتميز دون غيرنا بحروف (النصب).
بشكل واضح وصريح.
ما في زول بيشكي من امتحان (الانشاء).
البعرف والما بعرف ..ما بشكي من امتحان الانشاء.
يعني ما في طالب في الدنيا مهما كان مستواه بقول ليك جابوا لينا امتحان (انشاء) مولع نار.
ما في كلام زي دا.
ولا في واحد بطلع فرحان – عشان اشتغل كويس في الانشاء.
ناس المريخ فازوا على (عزام) في دور الـ (64) – وفرحانين بالموضوع دا.
فرحانين عشان اشتغلوا كويس في امتحان (الانشاء).
الانشاء حقت دور الـ (64) دي اول مرة نسمع بيها.
واول مرة نشوف لينا بطولة ..في (التمهيدي).
اصلوا زي دا نحن ما سمعنا.
لا سمعنا ولا شفنا.
الجماعة ديل رايحة ليهم (فرحة).
في زول بضبح في دور الـ (64).
انتوا جنيتوا.
التمهيدي دا – ما عاوز ليه (خرفان).
لكن جماعتنا ديل واضح عليهم – عندهم نقص حاد في فتمينات التفريق بين البطولة والما بطولة.
بعد الفرحة دي الاتحاد الافريقي مفروض يمنح المريخ كاس البطولة الافريقية.
عشان الافراح دي ما تروح ساكت.
حالتكم دي ..زي الزول البتحكي ليه (نكتة) حلوة وجديدة وذكية – يقوم ما يفهمها – يقوم ما يضحك فيها.
تقوم تحكي ليه نكتة بائخة وقديمة ..يقوم يموت فيها من (الضحك).
يضحك لمن ينزل في الواطة.
لمن يتشنقل من الضحك.
هسع يا ناس المريخ فرحكتم بالتأهل من (التمهيدي) زي الضحك المبالغ فيه في النكتة البائخة.
وتمهيدي مع منو؟.
لا مع الاهلي المصري.
ولا مع الترجي.
ولا حتى مع سموحة.
تمهيدي مع (عزام).
فريق عمرو (7) سنوات – تقول معجون اسنان.
على العموم – يمكن يكون عندهم حق في ان يفرحوا – جماعتكم ديل متعودين يطلعوا من دور الـ (64).
المرة دي اتجاوزوا الحتة البطلعوا منها.
واتفقعوا لينا (فرح).
ما مصدقين.
يضبحوا في (الخرفان) من قبل التأهل.
خرفانهم شغالة ليها (شهر).
صنعوا ليك كمية من الاوهام.
عملوا ليهم فريق كبير من رأسهم ..صنعوا ليك فريق معجزة.
وهموا ليك جماهير المريخ ان المريخ امامه مباراة (ملحمة).
مباراة بطولة.
مباراة صعبة.
وافترضوا ليك من رأسهم (جواسيس) كدا.
قالوا في (جواسيس) بعملوا ضد المريخ.
في جواسيس بعرضوا المعلومات لفريق عزام.
طيب يا ربي باسكال دا في (عزام) كان بيسوق حافلة الترحيل.
براكم بتتكلموا عن (الجواسيس).
براكم بتجيبوا الكلام لي نفسكم.
بتقطعوا من رأسكم.
والمجلس استقال.
والخرفان دورت.
خروف وراء خروف.
عاوزين يصعبوا الحكاية.
عشان شنو؟.
عشان بس يعملوا ليهم بطولة في دور الـ (64).
عشان يثبتوا انهم اتجاوزوا ليهم فريق كبير.
هيصة بس.
اليتيم لقمتو كبيرة فعلا.
والمواضيع محسومة.
والخرفان مدورة.
ديل ناس الهلال دخلوهم ليك طرف في المعركة.
بقوا يتخيلوا ليك في (الجواسيس) ويهاجموا ليك في ناس الهلال.
لا خلوا الاعلام – لا خلوا الجماهير.
الشرطة دخلوا ليك معاها في (صراع).
ويقولوا ليك ناس الهلال ما عندهم (وطنية).
اشتبكوا مع (الشرطة) القومية (السودانية) وطلعوهم من الملعب ..وقالوا ناس الهلال ما عندهم وطنية.
الوطينة هنا وين؟.
انتوا قالوا ليكم (الشرطة) حقتنا دي ..الشرطة السودانية – قالوا ليكم شرطة (انجليزية)؟.
شرطة (صينية)؟.
انتوا ما عارفين الشرطة دي ..مؤسسة قومية.
مؤسسة وطنية.
مؤسسة اكبر من اي فريق.
غايتو (الوطنية) البقوا يوزعوها زي (تحويل الرصيد) دا – اول مرة نسمع بيها.
قبل كدا ما شفناها.
وطنية زي (الطحنية).
رغم ان الوطنية ما عندها اي علاقة بالطحنية.
على العموم انتوا في كل مرة بتثبتوا لينا ان الهلال فريق كبير.
وان الفرق عظيم بين الهلال والمريخ في كل شيء.
الهلال في جزيرة زنزبار اتأهل لدور الـ (32) في بطولة الاندية الافريقية.
والمباراة كانت منقولة على الهواء.
وما فيها اي (بسكال).
فيها (بث) مباشر.
تأهل الهلال من خارج ملعبه ..في اجواء صعبة ..وتحكيم شكا منه مدرب الهلال.
تصوروا برضو ما فرحنا.
اعتبرنا الموضوع عادي.
بل اعلام الهلال وجماهيره مشت ابعد من ذلك.
اعلام الهلال مع تأهل الهلال وترقيه لدور الـ (32) في ظروف صعبة – إلّا انه مع ذلك انتقد الهلال.
انتقدنا الهلال ..الجهاز الفني واللاعبين ..ما خلينا حاجة.
اقلام الهلال بمختلف مشاربها انتقدت الهلال.
مع ان الهلال اتأهل خارج السودان في مباراة متلفزة.
وقد تأهل الهلال باقل مجهود.
تأهل من غير قومة نفس.
المريخ عمل اي حاجة عشان يتأهل.
نفسهم قام ..واشتغلوا ليك تعبئة تقول في حرب.
حالة صعبة.
اي حاجة عملوها.
الشرطة طلعوها.
التلفزة منعوها.
عشان شنو؟.
عشان يتأهلوا من دور الـ (64).
الموضوع ما بيستاهل التعب دا كلو.
وما عاوز ليه (فرحة) قدر دي.
نحن ذاتو غلطانين.
نحن الحق علينا نحن.
الحق على الهلال.
نحن البخلينا نلعب في مرحلة زي دي شنو؟.
مرحلة (التمهيدي) دي لا بتشبهنا ولا حاجة.
ديل ناس فرحانين ساكت.
هسع يقوموا يعملوا ليهم (مهرجان).
تقوم الحكومة تقول كدا تتبرع ليهم بـ (6) مليارات جنيه.
وتطلع ليهم الشرطة برة الملعب.
انتوا قايلين الـ (6) مليارات بتاعت سيكافا بننساها ليكم.
طبعا الحكومة بتفتش ليها سبب.
هسع ما بعيدة (الخرفان) دي تكون جاءت من الولاية.
واحتمال يكون طلعوها ليهم من رسوم امتحانات الشهادة السودانية.
شبكونا ليك (الملحمة)..الملحمة ..ويضبحوا في الخرفان.
ملحمة شنو؟.
من الـلـه خلقكم يا جماعة شفتوا ليكم (ملحمة) في دور الـ (64).
غايتو (ملحمتكم) دي إلّا تكون من (الخرفان) الكتيرة الضبحتوها لي عزام.
انتوا ناس عزام ديل كانوا معزومين عندكم لحمة وإلّا كورة؟.
………
ملحوظة : الكورة البقت كلها خرفان دي – اصلو ما شفناها.
هوامش
الاخ مامون ابوشيبة الذي يشكي دائما من (الحكام) – يا ريت يعرف ان الحكام امس الاول كانوا سببا في هذه الفرحة العريضة.
ضربة الجزاء التى ارتكبها باسكال واضاعها اكرا كانت خارج خط 18.
مع ذلك الحكم تكرم واحتسبها.
ومحمد فضل الـلـه معلق المباراة – كتر خيرو كمان عاوز يعيدها.
فضل الـلـه عندما ضاعت ضربة الجزاء …قال اعادة ضربة الجزاء.
محمد فضل الـلـه من ثقتو في الحكم قال الحكم ح يعيد ضربة الجزاء.
هي اصلا ما ضربة جزاء يعيدها في شنو يا محمد فضل الـلـه؟.
غايتو إلّا يعيدها ليكم في دور الـ (32) امام الفريق الانغولي.
بالمناسبة الحكام دائما ما يتفضلوا باحتساب ضربات جزاء لاصحاب الارض كما فعل حكم مباراة الخرطوم وطني امس.
ايضا هدف وانغا جاء من مخالفة واضحة ..وانغا عاوز يكتل المدافع (باسكال) واقع في رقبتو تقول من انصار (داعش).
ويقولوا ليكم التحكيم.
الهلال لو لقى حكام زي دي كل سنة بجيب ليهم بطولة خارجية.
غير السيكافات.
بالمناسبة الهلال في ارضه ما بتحتسب ليه ضربات جزاء.
وفي الموسم الماضي اي مباراة لعبها بالخارج احتسبوا ضده ضربة جزاء.
بل ان مساوي احتسبوا ضده ضربة جزاء في الخرطوم.
نحن في بلدنا بيحسبوا ضدنا ضربات الجزاء.
وسيحة يجكيم يوم الجمعة ويقول ليك الهدف من تسلل.
في تسلل من نص الملعب.
خروج الخرطوم الوطني كان محزنا.
يا ريت يحافظ فريق الخرطوم الوطني على استقراره وجهازه الفني.
……
عاجل : بعثة المريخ المغادرة الى شندي – هذه اول بعثة للمريخ هذا الموسم تكون بدون رئاسة عبدالصمد.
-
-
-
-
-
-
-
-
