كل أربعة تنفار يبقى عندهم باقي قريشات عاجباهم.. واللا ناوين ياكلوا ليهم بنك.. ياخدوا سلفية وبعد سنة يرفعوا ايديهم فوووووق: “اها فتشونا كان تلقو عندنا شي.. اباطانا والنجم”..
واللا دايرين يسوطو مع السايطين.. يسووا شيرينغ.. وكل زول يدفع نصيبو.. ويفتحوا قناة فضائية.. رئيس مجلس الادارة.. اعضاء مجلس الادارة.. مدير القناة.. مدير البرامج.. مدير الزرزرة.. ودا أهم مدير تنفيذي.. البرامج شنو يا جماعة؟.. غنا.. نضم.. من برامج التدقيس والفهلوة.. برنامج نسميوهو “رمتّله”.. أو “دنعة”.. زيارة لي ناس في بيتهم يكون احد أعلام المجتمع الشبه منسيين ح يفرح طبعا لأننا ازلنا الغبار عنه.. دا غايتو الله يستر ما يضبح لكم عديل كدي.. نتغدى معاهم.. ونصورهم ونتونس معاهم.. ونركب عربيتنا نجي راجعين.. أولا دي بتوفر لينا قروش ضيافة بدل ما ندردر الضيف ويجينا ويسوينا في شاي وشربات وبعدين يقول داير قروش نمشي ليهو نحن.. وتاني شي بتوفر لينا حق الغدا.. وممكن يطلع الضيف فنجري يلملم لنا باقي الغدا في اكياس ويزبل المذيع.. ويملا لينا تنك العربية بنزين..
انا اقترح البرنامج دا يكون مرتين في اليوم.. مرة ساعة الفطور ومرة ساعة الغدا..
برامج الرياضة الكورة دي زااااتا بقت كتيرة ومسيخة.. نحن نمشي ناس المصارعة مصارعة النوبة.. في الصقيعة.. نصورهم.. ونعمل حوارات مع المصارعين والمتفرجين.. هم لاقين يطلعو في قناة؟.. ونقول للحكومة دايرين دعم لانو نحن بنعمل على تعريف الشعب السوداني بثقافاتتنا المختلفة.. أو ننقل مباراة شطرنج لاتنين علل يقعدوا في القيم سنة للحول..
اها نجي لأهم برنامج في القناة.. برنامج الزرزرة اقترح نسميهو “زنقة كلب في طاحونة”.. واقترح عشان المسألة يكون فيها دهشة ومصداقية نصور البرنامج في طاحونة.. طاحونة شغالة.. ومقدم البرنامج يزنق المسعول.. ويكورك بطول حسو ويسعلو سوعال نكير.. وما يخليهو يزوغ منو كلو كلو: “السيد المسعول.. يقولون إنو لديك خمسة عمارات.. وسطاشر سيارة.. وحساب بنكي بالعملة الصعبة.. والاهم من ذلك.. الاهم من ذلك، عندك جوز نعلات واااااااااحد.. السوعال هو: ماذا تقول في بتاعين الورنيش الحايمين بدون رخص ولا رسوم ديل؟ وياكلوا في حق الشعب.. اكيد سعادتك ما بتتعامل معاهم كتير لكن نريد رأيك؟..
“حقيقتن انا نعلاتي بلاستيك.. اغسلن بالموية.. وجبغ البسن وامشي”..
اذن انت من اصحاب النعلات البلاستيك.. سوعال آخر في محور آخر: “بماذا توصي الشعب السوداني”
اقول للشعب السوداني الكريم: “يا جماعة امسكوا خشمكم عليكم وخلونا نعرف نشتغل وما تسمعوا نضم الناس البتآمروا علي البلد.. يعني واحد مسكين عندو عمارتين حاسدنو فيهن؟.. شوفوا برا بيحصل شنو.. المسعول عندو البلد كلها والشعب ضيوف عندو.. “ثم يبكي المسعول” وهو يتكلم : “يشهد الله محنني الشعب السوداني دا. ما لاقي زول يكون ضيف عندو زي ناس برا.. وسوف نعمل جاهدين ان يكون ضيف عندنا”..
ثم يبكي معاهو مقدم البرنامج.. ثم تعلن القناة الحداد لمدة أسبوع حنية علي الشعب..!!!
الباب البجيب الريح- صحيفة اليوم التالي
