الأكل السمح.. مافي زول بياباهو.. علا داير ليهو قُدرة ومقدّرة.. الناس القاعدين يقدمو لينا اكلات في القنوات الفضائية.. واقصد الشيفيين (جمع شيف) غايتو قدر ما صاورت أجمع كلمة (شيف) غلبني.. مرة تطلع شيفات.. اقول دا لوم فيهم.. مرة أقول شياييف.. لقيتا كعبة وما مبلوعة خاصة لو كان القياس شلاليف، وبرضو تفاديا لانو ممكن يكون في زول الجّن.. ينطق شلاليف شياييف.. تاني قلت شيايفة.. لا.. دي تنفع لي ناس مستقبلا يكون جدهم الكبير شيف.. ويكوركو ليهم الشفع “ولاد الشيف ادونا رغيف”.. فيطلق عليهم القوم اسم الشيايفة.. في النهاية قلت شيفيين.. ارجو ان تسجل باسمي في مجمع اللغة العربية.. هي و.. صفة الناس الجنهم فيسبوك (الفيساب).. وناس الواطسآب.. يقال لهم (وطاويس) على وزن مطاميس.. وصفقة ورقيص للوطاويس.. او طوساب.. وهم من يطوسون.. من حين لآخر.. طاس الرجل اي دخل الواطسآب.. وطاست المرأة اي دخلت الواطسآب.. طاست المرأة في الجلاكسي وما عاست الكسرة.. وعليها تكون كواريك رحمتات رمضان ليمونة ليمونة.. ست الجلاكسي مجنونة.. بدلا عن ست الدوكة مجنونة.. هذه محاولات مني لتعريب الوافد من ثقافة كية للخواجات وحفاظا على ثقافتنا من الاستلاب).
ارجع للشيفيين والتبيخ.. . في قنواتنا الفضائية البيشبهن ويحاكن بعض ديل.. ديل يجيبو شيف ديل هنا يتحنفشو.. ويقولو لشنو ناس القناة ديك جابو شيف هم احسن مننا بشنو؟ يجيبو شيف برضو.. الشيف يسوي حَلتو في قناة.. يشيلها بي حالها ومعاها قُفة خدارو بي باقيها و يدخل بهن قناة تانية.. صراحة التبيخ الفي القنوات دا.. وفي ظروفنا الاقتصادية دي.. مكاواة و بوبار، و يا ناس القنوات اللكل دا ما بينفعكم ، وبيدخل عليكم بالساحق،وبيدخلكم النار جت.. تتبخو تبيخ سمح زي دا، قدام ناس يا الله يلملمو حق البوش للعشا؟.. الشيف يسوي حلة ملاح.. إن قعدتّ وحسبتها تلقاها تكلف متين جنيه.. يعني في ناس، الزول نص ماهيتو يسويها في حليلة تبيخ وياكلوها هو وليداتو.. ويرجو الله في الكريبة.. مافي مشكلة اليجو ويعلمونا التبيخ.. لكن يراعو لي ظروفنا.. يعني مثلا سيقان الملوخية بدل نجدعها نحولها لي اكل.. قشر البطاطس.. واللسود برضو نستفيد منو.. كيفن؟.. وبعدين ما يعلمونا البزار والبعزقة، يقشرو التفاحة ويرمو القشر يا جماعة؟ القشر دا كان اتصدقو بيهو مالو؟.. الطماطم برضو ،داك الليلة زعلت والله.. طماطمايتين كًبااااار الشيف قشرّن ورمى القشر في الزبالة.. الطماطم دي من الله خلقنا قاعدين ناكلها بي قشرها.. نحن المنقة ما قاعدين ننقرفا، بناكلها بي قِرفا،.. وبرضو جيبو لينا خدار بنعرفو.. يعني الخدار اللليل ناس برا دا ما بنعرف ناكلو خليك لمن نتبخو.. وشابكننا جيبو زعتر”زعتر بن شداد؟”، ويانسون ومابعرفو شنو؟ يانسون دا لو سالت منو زول عامل فيها مثقف ومتفلهم ح يقول ليك”كيييييف يا مان.. دا الرئيس الامريكي رقم 22.. جيمس . ك. يانسون”.. وقايمين في حاجة اسمها الكرنب.. كرنب؟.. هو كان فيهو خير ما كان بقى ارنب راسا عديل ، عديم الفايدة مدسي ورا الـ”ك”؟!
[/JUSTIFY]الباب البجيب الريح- صحيفة اليوم التالي
