* تقع بالضبط مكان جامعة الأحفاد الحالية.
* الجزء البين جامعة الأحفاد وشارع المنطقة.
* شارع يوسف بدرى حالياً.
* الميادين دى كانت ستة ميادين.
* فيها عراضات حديد.
* خمسة كبار وواحد صغير.
* وسموها تمر ابونا عشان كانت مسورة بشجر المسكيت.
* ملاعب كانت بتاعت الجميع.
* وعشان الناس تحجز.
* كانوا برسلوا زول من الساعة تلاتة.
* يخت الكورة فى دائرة السنتر.
* معناها الميدان ده محجوز.
* آخر ملعب من الناحية الغربية فيهم كان فيهو قوائم فى المرمى الجنوبى.
* بدون عراضة.
* وقائم واحد فى المرمى الشمالى.
* ميادين تمر ابونا دى أى زول فى امدرمان بيعرفها.
* وكان تحت شجرة المسكيت المسور بيهو بقعد صانعى المناقد والكوانين.
* يجيبوا البال ويقيلوا فى صناعة المناقد.
* ده كان حال تمرابونا.
* وبالأمس لعب أخواننا فى ملاعب تمرابونا.
* تمر ابونا بتاع الدوحة.
* ستة ملاعب مرصوصة لعب فى واحد منهن.
* أيها الناس.
* بتعرفوا صلاة الجنازة؟
* اللهم لا ترنا مكروهاً فى عزيز لدينا.
* موش ما فيها ركوع؟
* كلها وقوف.
* أها أمس الناس الحضروا كورة أخواننا فى تمرابونا كانوا زى ناس صلاة الجنازة.
* مافى ركوع ولا سجود ولا جلوس.
* واقفين لأنو مدرجات مافى.
* ملعب تمر ابونا ساى.
* دلجة.
* زى راسى ده.
* المهم.
* زمان فى الأعياد بجيبوا الطوطحانيات فى الساحات.
* والزحلقانيات.
* وأنا الأبرة وأنت الدبوس.
* والساقية بتاعت الصناديق الكبيرة ديك.
* وبيأجروا العجلات.
* الساعة بى كدة ونص الساعة بى كدة.
* الناس القروشها بتقصر.
* يركبوا الطوطحانية.
* طوطيحة طوطيحتين.
* بتاع الطوطحانية يزقفها وينزلهم.
* قدر قروشهم.
* ويدور بالباقيين الدافعين كامل.
* أمس الكورة كانت تلت ساعة أظنها.
* ياربى يكونوا قروشهم قصرت؟
* بتاع الطوطحانية نزلكم بدرى يا روشا.
* زول يلعب فى تمرابونا ويتطوطح نص طوطيحة وجماهيره واقفة طولها.
* ده ما فريق بيجيب بطولة.
* ليكم حق تطولوا فى الصفر الدولى وتأخدوا طولة.
* المهم.
* معسكرنا يسير على قدم وساق.
* على الأقل نلاعب أعدادياً فرق مكتملة,وفى أستادات تحترم جماهيرنا.
* وبحكام لابسين وأنيقين.
* وأهم حاجة الكورة بتتم تسعين دقيقة.
* كورة تلت ساعة دى جديدة.
* لاعبين قيم واحد ولا شنو!!!
* أيها الناس.
* ناس روشا ديل كج عديل كده.
* شابكننا نادى الحركة الوطنية نادى الحركة الوطنية.
* الدولار مستقر واللحم راقد والزيتون والطحنية.
* بالله بقوا شجرة.
* الدولار فى الدقيقة يزيد كم مية.
* وفى الطلمبات وقفت مليون عربية.
* والرغيف طلع من أرض الواقع ودخل فى أمنيات النية.
* والمحروقات حرقن علينا وجابوا الأذية.
* رسوم ترحيل المدارس بعد دفعناهو دفعونا فرق للطالب تلتمية.
* يا عطا المنان.
* فك الناس ديل خليهم يرجعوا حركة وطنية.
* ويعيش الشغب عيشة هنية ورضية قبال النفس الرضية تفارق الجتت الأبية.
* أيها الناس.
* أكرر.
* رديفنا ضم لاعبين على مستوى.
* على الأقل بيشبهوا المريخ.
* مزيداً من الأهتمام والرعاية.
* وأنا مصر نمرة سبعة ده روبن عديييييييييييل كدة.
* واحد هلالابى خصص رقمى ورقم معاوية الجاك ورقم كابو ورقم مزمل ورقم حسن محجوب.
* بت الأتصالات الفى الكمبيوتر قالت ليهو عفواً لا يمكنك تخصيص أكتر من رقم عالمى.
* قام خصص روشا وفطومة ويس زفة الألوان ومحمد الأمين.
* بت الأتصالات بتاعة الكمبيوتر قالت ليهو هل من مزيد؟
* قال ليها فى طريقة كم تانى؟
* قالت ليهو محلى ده أسكت وكب.
* زى الشاى السادة مع الشوايقى.
* أها.
* نجى لى شمارات والى الخرطوم.
* أكان شفت يا والينا.
* أتنين بتاعين بحر بتونسوا.
* واحد قال للتانى البلد دى غريبة خلاص.
* التانى قال ليهو كيف؟
* الأول قال ليهو أى شى بتعمل ليهو مقدمات.
* وواصل قال ليهو لما تجى كتاحة معناها فى مطرة.
* ولما النور يقطع بالليل معناهو جاى هوا.
* ولما يقولوا ليك البرلمان يشدد.
* أعرف أنو فى ورقة حاتمر.
* ولما الحكومة تقول ليك مافى مشكلة فى الشئ الفلانى معناهو خزن الرز والعدس.
* ولما يقولوا ليك موازنة جديدة معناها المرتبات ما بتزيد.
* ولما يشح البنزين وتقيف الناس فى صفوف الرغيف…
* التانى قال ليهو معناها واضح ماتتم كلامك.
* الأول قال ليهو:طيب وكت واضح فى داعى للتلتلة كل يوم والتانى!!!!! سلك كهربا
* ننساك كيف وبقينا نفهما طايرة.
والى لقاء**********سلك
في السلك – بابكر سلك
