لعنة الموز:-
خلال الأسبوع الفائت.. أكتر من موضوع قريتو فيهو مشكلة او شي غريب.. لقيت أن الموز داخل فيهو طرف.. وفتشت في النت عن الموز.. وسر الموز.. وبرضو اتذكرت مواقف في السهلة لحاجات الموز طرف فيها.. وقد كان قبل غزو السراميك للسودان.. أي عجوز يقع يكسر مخروقتو غالبا ما يقولو ليك سببو زلقتو قشرة موزة.. وقد استلم منه السراميك مشكورا كسيّر المخاريق.. أيضا لما جا خليل إبراهيم، وحاول أن يغزو الخرطوم.. تزوّد عساكره بكميات من الموز اشتروها من السوق الشعبي امدرمان.. يفسّخو وياكلو.. اتنفخو.. وطششو.. وطشو.. وبقو يسالو زول زول.. الإذاعة بي وين؟.. واعتقد ان للموز دور في احباط تلك المحاولة.. وبالرغم من أني قبل كدا قلت انو اكتشفو إنو الموز بيساعد الزوجات على الاحتفاظ بجذوة العاطفة لدى ازواجهم.. عِترتّ فوق مقال لكاتب صومالي اسمه (احمد عثمان محمد) المقال بنفس العنوان الفرعي الفوق دا لعنة الموز”.. مقال طويل محمِّل الموز وتجارته الحرب الاهلية في الصومال.. وانو الناس الماتت دي كلها بسبب الموز….
واليكم بعضا من اخبار الموز:-
إن ربنا سهّل بي يمرق:-
حرامي في الهند سرق سلسل دهب من مرا.. لما المرا كوركت الحرامي بلع السلسل. المرا شافتو بلعو.. مشو النقطة نكر.. ناس البوليس ودوهو المستشفى.. شيعوهو.. لقو السلسل متحكر في بطنو.. عشان يمرقوهو اكلوهو ستة وتسعين موزة (مسهّل).. خلال أربعة وعشرين ساعة.. . والمدة دي كلها المرا تساسق وتسال “اها مرق؟.. ما قرب؟”.. في النهاية بحمد الله ربنا سهل والسلسل مرق من بطن الحرامي.. وقالو للحرامي تدفع حق الموز.. قال ما عندو.. ست السلسل طلعت فنجرية ودفعت حق الموز.!!!
أخدها موزة:-
في أمريكا.. سجلت كميرات.. محل تجاري.. زول سايق عربيتو واقتحم المحل بالعربية وكسر القزاز وجاط المحل.. ونزل من العربية.. وشال ليهو موزة واااااااحدة وأكلها ومرق تاني.. يعني دا ح يدخل السجن في موزاية واحدة.. غايتو جنس صغرة نفس؟!.. الغريبة قالو البوليس الأمريكي ليهو اسبوع كايس ليهو و ما لاقيهو.. وما قبضوهو.. غايتو البوليس الامريكي دا اتاريهو اشاعة ساكت، وبوليس داقس وكيسو فاضي.. زي دا لو دايرين يقبضوهو يشركو ليهو بي موزة تانية!!
موز بيرغر:-
ومن ارض السودان حيث الشعب المعلم المبدع.. ومن ابداعات فقراء بلادي…. وفي حالة الغلاء الحاصلة دي.. .شريحة كماسرة الحافلات والمواصلات.. بقو يشتركو كل اربعة في كيلو موز وكيسيّن عيش.. ويحشو الموز في العيش” ساندوتش”.. حسبوها لقوها ارخص من الفول والطعمية والطحنية واي حاجة تانية ممكن تتحشي.. . تسال الواحد منهم” اها فطرت؟” يقول ليك “ايوا”.. فطرت بي شنو؟.. يدق بطنو ويقول ليك”موزبيرغر.. يا فردة”!!!…. اوصي اي زول من زبائن (الموزبيرغر) ما يبلع سلسل.. .لانو ما ح يقعد ولا دقيقة في بطنو!!!!!
الباب البجيب الريح- صحيفة اليوم التالي
