بعد انكسر جواي مناي.. وعقد الأحاسيس انفرط!!
بعد الندم.. شال القلم.. ولوحة حياتي اتشخبطت
كل المشاريع إتلغت
الصدق بالزيف اختلط
وأوراق طموحي اتلخبطت
شاخت رؤاي.. تعبت خطاي..
وقناة هواي اتشفرت
**
جاييني بعد الليل هجد. ونجومو أطفأت السراج
جية الصباح إتأجلت
شمس الوصال غابت عديل لمت خيوطا وغربت
والقمره حفاها الخسوف.. في الظلمة راحت وما اتلقت
وجاييني بعد الإنهزام.. بعد الجروف أبت الغمام
والروعة فيني اتبددت
ضاعت سنيني ورا الرهاب.. وقضيتا في حسرة وعذاب
وعيوني جافاها المنام.. يوماتي بالدمعات همت
وجاييني من بعد الضياع.. بعد المعارك والصراع
بعد انتصر فينى الخداع.. والروح خلاص استسلمت؟
أنا كان سلاحي الطيبة والقلب الكبير.
والدنيا كانت ليل وخوف وعصف الرياح الزمهرير
ما كان في فرصة عشان أعيش.. واقع قليبي المستنير….
ومن يوم عرفتك وإنت غير…بالضحكة والألق المثير
ما بتشبه الزمن المرير
وانا بيك متيم وبستجير…
سرجت خيل اللهفة ليك…في سكة الولع الخطير
وأصبحت في محراب هواك.. عابد.. وفي قيدك أسير
وفتحت بيك باب للعشم.. أفكار وأحلام بي فهم
وانا هسه عايش في وهم.. أصلو العشم بقى مستحيل
وتجيني في الزمن الغلط
من بعد ما ضاعت سنيني…
تسكب رحيقك في دماي وتشعل مجامر من حنيني
ما عدت أملك غير هموم.. وما عدت تسمع غير أنيني
وتجيني في الزمن الغلط.. تفتح عليْ أبواب جنوني
ملكتك الروح والفؤاد.. وشلتك على راسي وعيوني
شان انت تستاهل هواي.. وانا فيك لقيت فرحي وهناي.. وكتبت ليك شعري وغناي.. يا غاية يا حلمي ومناي.. بس بدري كان مفروض تجيني
تلويح:
وأن تأتي متأخرا خير من ألا تأتي.. (بركة الجيت)
إندياح – صحيفة اليوم التالي
