وزي الشايف إني غريبة؟
تسمع في كلماتي ظنونك…وكل أحوالي تشوفها مريبة!!
وأنا-يا فرحة عمري وحبي-أصدق وأوفى وأسمى حبيبة…
ياخ والله دي دنيا…عجيبة!
كل مانقول الفرحةاكتملت..تطلع من أعماقنا مصيبة..!
تقلب وش الصدق مظنة…وتشعل نار الحيرة لهيبا!!!
ويطلع مننا صوت الغيرة….وتصحى وساوس مُرة رهيبة
نحنا الكم رتبنا ظروفنا….واتجاوزنا ليالي عصيبة
فجأة نفكر ننسى الريدة….وحتى ظروفنا نعيد تخريبا؟؟؟
ياخ معقولة أنكد عمرك….وتطلع منك إنتا العيبة؟؟؟
كده قصتنا بتبقى شماتة…وكانت ياما..عليها الهيبة
وحدك وين؟؟؟
داير يعني تموت أحلامنا…وفي ريدتنا تضحك خلقو؟؟
نحنا الكنا نموذج نادر وقالوا الناس: (ديل ما بتلحقوا)
جينا نهد بي إيدنا صروحنا….نخلي قلوب تيمان يتفرقو!!!
وحدك وين؟؟
حدك وين في الصد والجفوة؟
عشان أسباب والله ماتسوى
ويبقى نصيبنا الشوق والقسوة!!!
نحن بلاك فاقدين المأوى
وعدمانين لا حيل لاقوة
حبك كان المن والسلوى
وهمسك كان في الليل النجوى
أشعل في أعماقنا الجذوة
ورجع لينا العز والعزوة
سيبا حكاوي المن والشكوى
واغفر ياخي مجرد هفوة
تعود أيامك زي مانهوى
وتطرى غرامنا الصافي الصفوة
واسأل شيخ الريد في عرفك
تلقى أكيد لي قلبك فتوى…وحدكوين؟؟
*تلويح:
مداك اتعدى حد الشوف
هواك اتحدى جوه الجوف!
[/JUSTIFY]إندياح – صحيفة اليوم التالي
