وقفت البنت قدام كشك تحويل الرصيد وملت صاحب الكشك رقمها وماسكة تلفونها السمح وغالي منتظرة إشارة وصول رسالة التحويل ووراها وقف شاب .. البنت إطمئنت علي وصول الرصيد وإتحركت نحو موقف الحافلات ..
الشاب إتحرك وراها .. ركبت الحافلة ركب معاها وقعد قريب منها .. اتحركت الحافلة بعد شوية الشاب اتنفض وبقي يصرخ ياخوانا انا اتنشلت وقعد يهبش في جيوبه ويكورك انا اتنشلت الركاب كلهم قبلوا عليهو قال ليهم عليكم الله واحد يتصل عليهو يمكن وقع مني واحد من الركاب اتطوع .. الشاب ملاهو الرقم وهو طبعا رقم البت الحفظو ..
التلفون رنة في شنطة البت وهي بي كل براءة طلعت تلفونا طوالي الشاب خطفو منها وضربها كف حاااار وقال ليها يا نشالة يا حرامية انا حسيت بيك لما دخلتي معاي الحافلة بس ما اتخيلت وحدة زيك شكلها بت ناس تكون نشالة .. البت من الخلعة والهجيمة كضمت وماعرفت تقول حاجة مع نظرات الاحتقار والاستنكار الرموها بيها الركاب …
الشاب صرخ والله العظيم كان ما شكلك بت ناس كنت خليت الحافلة دي تدور علي قسم الشرطة وقال للسواق اقيف لي هنا مع نظرات الشكر والعرفان ليهو من الركاب … البنت لما تخطت مرحلة الصدمة شرحت ليهم انها اتعرضت لي اكبر عملية سرقة ونصب واحتيال … مسافة الركاب استوعبوا القصة كان الشاب فص ملح وداب.
عشان كده بقول لي اخواتى لو عايزة تحولي رصيد اكتبي رقمك في ورقة وخليها معاك ناوليها لمحل التحويل في صمت الدنيا بقت ما مضمونة …
معاوية النور
-
-
-
-
-
-
-
-
