* ست الحبايب والمزاج وبعض الألتهابات منعتنا من التواصل.
* لكنها القحة.
* والقحة ولا صمة الخشم.
* أحر التعازى نقدمها للأخ جمال.
* وربنا يتقبل الفقيدة قبولاً حسناً.
* ويجعلها من أصحاب اليمين.
* وان يصبر ابنائها وبناتها وعموم أهلها.
* وأن لا يفتنهم بعدها.
* ولا حول ولا قوة الا بالله العلى العظيم.
* أما بعد.
* بالأمس خسر شفوت الغد من الهلال.
* بالرغم من عدم المقارنة من الفريقين.
* ألا اننا خسرنا.
* وخسرنا كعادتنا فى الخسارة بايدينا.
* اول الأسباب كانت النعرة التى دخلت نفوس شفوت الغد.
* وأظن ان متابعتهم وتشجيعهم وتركيز الأعلام عليهم قد فهموه خطأ.
* فبدأنا نسمع من البعض مطالبات بالتقييم.
* لاعب فى الأشبال.
* توفر له المدرب والنثريات والأحتكاك والأدوات.
* ويطالبك ان تقيمه.
* يعتقد انه اضحى نجماً كبيراً.
* ويستعجل المطالب.
* لذا جاءت النفوس تكسوها (طنقعة).
* فكان لابد من الهزيمة.
* ومن فريق ضعيف لا يحرز فى تمرينه هدفين.
* أنه درس.
* درس يجب ان يتعلم منه حسين ومصعب وديدا ومحمد عبدالوهاب.
* لاكبير على الكرة.
* ولا كبير على المريخ.
* ولكن يمكن ان تكون كبيرا فى المريخ بالعطاء.
* وتتدرج الى ان تصبح نجماً.
* ووقتها لن يبخل عليك المريخ.
* لكن من اسى تطالب وتتطنقع.
* بالتأكيد.
* الجابك بجيب غيرك.
* أما بعد.
* الجهاز الأدارى وأخص منه الصديق محمدموسى.
* أعجبنى جداً فى تعامله مع من طالب بالتقييم.
* ومع الهزيمة بعد المباراة.
* ألا ان هناك ملاحظات على ابوعنجة.
* ويا كوتش.
* شغلك ما بندخل فيهو.
* بس بنقول ليك نضمن الفوز وبعدين نجرب.
* نعلم انك تعمل بسياسة صناعة نجوم بصرف النظر عن النتائج.
* ولكن شايل الحكاية.
* فوز وصناعة.
* ممكن يمشن مع بعض.
* أقول قولى هذا وما بارح الأمل فى شفوت الغد النفس قيد انملة.
* المهم.
* تبقت لنا مباراة ونحتفل بالكاس.
* وصدقونى لن تكون المباراة سهلة.
* ستعمل جهات هديدة لخسارتنا.
* واولها النفاثات فى العقد.
* والتحريش.
* والتحريض السكوتى.
* وأخطاء الحكام.
* هذه المباراة بالدورى كله.
* ومع احتراماتنا للسلاطين.
* الا اننا رايناهم بشدوها لينا كيف.
* وشفناهم مع الهلال بنغلبوا من عصراً بدرى كيف.
* وفى الحالتين محسن سيد موجود.
* عشان كدة.
* لا نريد تواطؤ.
* ولا نطلب من السلاطين التواضع.
* ولا نخاف النفاثات فى العقد.
* فلدينا رب يحمينا.
* ولا نهاب أخطاء الحكام.
* فالشفوت يعرفون كيف يجبرون التحكيم على التقليل من الأخطاء.
* برة وبعيد.
* ما قريب للخط.
* نستطيع بأولادنا وجماهيرنا ان نهزم اعتى الفرق.
* الكتمة فى استادنا.
* والربة حاصلة.
* والدعوة عامة.
* حت شديد.
* وتصديق الحقلة طلعناهو.
* أيها الناس.
* اى تهاون او استسلام يبقى بنديها الطير.
* وبعد لبنت.
* يسمك فيها يا الطير.
* ولا طيرة ما تعشم فى حبة عيش من قندولنا العاتى.
* فليذهب الطير الى اسوار زرائب العيش.
* عله يقتات من سواقط الورتاب.
* لكن بعد لبنت.
* ولا ود ابرق ما بيشمها.
* ما بنديها الطير.
* أيها الناس.
* سيدا لاعب.
* يعنى حايقود الفريق.
* يبقى بأذن الله منتصرين.
* ويا حلاوة لو كان لسيدا قون.
* فى المرمى الشمالى.
* قريب للجماعة.
* عشان المابشوف يشوف.
* تمنية الدينارى كرت نص.
* ونحنا قافلين عليها.
* والغافلين دايرين يجلونا وجدعوها لينا.
* وخمسيييييييييييين.
* أيها الناس.
* سيدا لازم يتصور بالكاس براااااااااااااااااااااهو.
* ونطبع الصورة فى بوستر كبيييييييييييييييييييييييييييير.
* النسخة بى عشرة.
* نبيع اتنين مليون نسخة فى عشرة الف جنيه.
* العائد دحين ما بسجل لينا سطاشر محترف للموسم الجديد؟؟؟
* سيدا والأستثمار.
* سيدا والتوزيع والتسويق.
* أحجز نسختك من الآن.
* الفرص محدودة.
* أما بعد.
* أتمنى ان يكون الجهاز الفنى قد توصل للمطلوب.
* نحن نطالبه بكاس جوية فى الموسم الجديد.
* طبعاً ده بعد جوية الدمازين.
* أسلام سألت خالتى.
* قالت ليها كاس الدمازين كيف؟
* خالتى قالت ليها نومى فى الخيرة.
* لو الكاس جا بالطيارة بشيلوا المريخ.
* ولو شفتى فى النوم الكاس جاى بالبص يبقى شى تانى .
* أسلام قالت ليها الأسبوع الفات كلو بحلم بالكاس جا بالطيارة.
* ومرة احلم بطيارة فى استاد المريخ سايقها سيدا.
* ومرة احلم بهيثم نازل من هليكوبتر.
* ومرة اشوفا لهيلكوبتر فى المقصورة.
* خالتى قالت ليها أكان كدى جماعتك ديك اخير ما يسافروا.
* أها.
* نجى لى شمارات والى الخرتوم.
* أكان شفت يا والينا.
* الناس ضعف هموقلوبينا.
* وطلع بياض علينا.
* طبعاً من الحالة الفينا.
* سيد اللحمة يكورك.
* اللحم اللحم.
* نقول ليهو ابينا.
* سيد اللبن يكورك اللبن اللبن.
* نقول ليهو ابينا.
* سيد الحافلة ينادينا.
* نكحلو ونحن ماشين بى رجلينا.
* سيد الركشة حالو يحنن وحن علينا.
* لا بنقدر نركب ركشة لا بيمرق حق بنزينا.
* سيد العيش ينادينا.
* كأنو ما بنادينا.
* وسيد الموز يغرى فينا.
* الكيلو بى تلاتة الف.
* اتنين بى خمسة يا مواطنينا.
* وزول بعبرو مافى يا والينا.
* يرجع يكورك لينا.
* بالف يا الخليتو الأكل.
* مجانى يا النسيتو الأكل. سلك كهربا
*ننساك كيف والناس خشومها لا تاكل ولا بتنضم,حفر ساى قاعدة فى الوشوش.
واللللللللللللللللللى لقاء
سللللللللللللللللللللللك
في السلك – بابكر سلك
