أولادي بيسافروا الإجازة خارج السودان وأنا بقضي إجازتي في البادية والصيد وبادية بلدي ولا مدن أوربا.
الو منو؟
عصام
عصام أزيك وكيف حالك وكل ساعة وانت بخير معاك المستقلة؟
كل لحظة وانت بألف خير .. وأهلاً بالمستقلة.
عصام منو بالكامل؟
الأصل محمد عصام الدين .. ولطول الأسم اختصرته في كل الأوراق الثبوتية وبواسطة المحكمة في عصام فقط.. والاسم كامل عصام حسن عبد الله دفع الله الترابي.
أتولدت وين ؟ .. وما هي المراحل الدراسية؟
اتولدت في الخرطوم (2) وبديت بالروضة بالخرطوم ونسبة لظروف الوالد تنقلت في عدة مدارس مثل بيت المال الابتدائية وبري اللاماب الابتدائية والثانوية العام ببري الأميرية ثم مدرسة ود نباوي الأميرية الثانوية العامة ثم جامعة الخرطوم كلية التربية سنة أولي ثم انتقلت إلي جامعة الملك سعود بالرياض ثم عدت لجامعة الخرطوم برفض من جامعة الرياض لاختصاري سنتين في سنة واحدة وباعتبار أنني ذاهب للادني. وبرفض من جامعة الخرطوم بحساب تفوقي في السعودية وبتدخل من الأستاذة نور عبد الله وعميد الكلية ميرغني حمور واصلت وتخرجت في كلية الاقتصاد بمرتبة الشرف الأولي.
كم لديك من الأبناء؟
عندي رحمة 15 سنة وعبد الله.
بتخيل لي أن والدك الشيخ حسن الترابي تدخل في تحديد توقيت زواجك وأكثر من كده في اختيار الزوجة؟
أبداً.. أبدا ده إطلاقاً ما حصل والشيخ كافل جداً للحريات وعادة ما يترك الشأن لأهل الشأن وإن تدخل فإنه يتدخل بالتوجيه والإرشاد فقط.
بس الواضح كده أنك في جلباب أبيك؟
جلباب أبي مافيهو كارتيه.. ولا التزحلق المائي ولا الجوكية ولا لبي رياضة جلباب أبي لا علاقة لي به وأنا داخل في جلبابي براي.
وشيخ حسن ياربي قاعدين تلقوهوا في لمات أسرية؟
أولادنا أفضل حالاً مننا فانه موجود الآن أكثر بسبب قلة الحركة ونحنا حقيقة حرمنا منه في فترات طويلة بسبب الاجتماعات الدائمة والمؤتمرات والسفر.. وعن الاعتقالات حدث ولا حرج.
وفي البيت بتخاطبوه بأبوي زى ما قلت في هذه المحادثة أكثر من مرة ولا بتخاطبوه ب(بابا)؟
لا بابا ولا يابا.. بنخاطبو بأبوي وأحفاده كلهم ينادوه أبوي حسن.
يا عصام نطلع من البيت للميادين .. ونقيف شوية مع عصام الترابي الرياضي؟
عصام الترابي يا سيدي رئيس الاتحاد العام للكاراتيه ورئيس نادي العاصمة لسباق الخيل وممارس لسباق الشراع والتزحلق علي الماء.. أضف إلي ذلك الرماية.
وشايف عندك إهتمامات كبيرة بالشعر القومي والدوبيت؟
عاشق جداً للشعر القومي والدوبيت ومن صغير أنا وعبد الرحمن ود خالي الإمام الصادق المهدي كنا بنتجادع.. والحمد لله حافظ الكثير والكثير.
لكن عصام أنت زول المدينة.. وفي المدينة ود المدينة البخليك شنو تبقي ود البادية؟
أنا عاشق جداً للبادية.. وبالمناسبة أولادي بيسافروا الإجازة خارج السودان وأنا بقضي أجازتي في البادية وبستمتع جداً بحياة البادية والصيد وبادية بلادي ولا مدن أوربا.
البادية خليناها يا عصام.. أنت في أيام الإنقاذ الأولي كنت بتربح المليون في اليوم.. بما يساوي 500 ألف دولار تقريباً وقتها.. ممكن أعرف الليلة تربح كم؟
حسبي الله ونعم الوكيل.. وده اتهام باطل.. باطل.. باطل. وبالمناسبة الذين روجوا لهذه الشائعة لم يكتفوا بها فنسبوا لعصام الترابي العمارات والفلل في المنشية وقاردن ستي والرياض وحتى البواخر في النيل قالوا حقت عصام الترابي.
وبيني وبينك كده ما ح اكلم زول… رصيدك في البنوك الماليزية قدر شنو؟
كلم الدنيا كلها أني لا شفت ماليزيا ولا فكرت مجرد السفر اليها.. قدر العندي عندي في بلدي.
يا عصام بصراحة كده بقولو انت كاتل الجدادة ولا خامي البيض؟
لا كاتل الجدادة ولا خامي البيض.. والكلام عن تصاديق سكر ودقيق وسجاير.. خاصة بي دا كلام فارغ. وبالمناسبة وضعي المالي وشغلي أفضل في كل الأوقات التي كان أبوي بعيد فيها من موقع القرار.
بالمناسبة دي.. شيخ حسن كان كثير في المعتقلات وده معناهو أنك بتكون راجل البيت؟
حسب التقليد السوداني والأعراف العامة راجل البيت من بعد الأب هو الابن الأكبر وصديق أخوي بيكون هو المسؤول الأول.. وكثير من اعتقالات وغياب أبوي حصلت وأنا صغير.
يا عصام بيتكم ده عندو حماية أمنية ولو دا حاصل محمي بي منو؟
هي حراسة وليست حراسة أمنية.. وتقدر تقول حيران حارسين شيخهم. والحماية دي لا كيان عسكري ولا أمني والمسألة حماية وسكرتارية وخدمة ومحبة ومزيج من دا كله.
وبيني وبينك كده بعد المفاصلة في ناس كانوا قريبين ليكم وفتحوا ليكم وأدوكم ضهرهم؟
شوف.. الميزان في الحته دي وجود أبوي في المعتقل ووجود أبوي هناك جعل المرتبطين به مرتبطين أكثر وجعل آخرين متوقفون من زيارتنا. يداوموا علي الزيارة ويسألوا عن حالنا وأحوالنا.. وباختصار وبدون تحديد أسماء في ناس منتظمين في زيارتنا بأسرهم وبعلاقات راسخة وبارك الله في الأزمات التي كثيراً ما تري فيها وجوهاً لا نرها.
يا عصام أخوي أنا شاكر ليك كتير ونتلاقي في ساعة خير؟
شكراً ليك كتير كتير.. وكل سنة وأنت طيب.
المستقلة
ش ص
-
-
-
-
-
-
-
-
