تهاني عوض: البنت دي صعلوقة وما مربية!!

بيفتكروا انو دا تردي ورجعية وسخف وانحراف ، وانحلال!! وبالذات لما يكون الموضوع متعلق بالمرأة..أي حاجة تجي منها فهي شر..!! لأنو المرأة كان بقت فاس ما بتكسر الراس.. وكمان في ناس بتعتقد إنو المرأة صوتها..صورتها..مشيتها..أفكارها..تعليمها..شغلها ذاتووو عورة .. وعيب وحرااام.. والمرأة المؤدبة وعندها وليان يمسكوها ما بتعمل كدي!! وفي اعتقادهم أن للمرأة تلاتة خرجات..الأولى من بطن أمها..و الاتنية من بيت ابوها لبيت زوجها..والتالتة من بيت زوجها للمقابر!! وينتهي العزاء بانتهاء مراسم الدفن!!

ورغم إنو النساء في السودان اتعلمن واتثقفن منذ العشرينات في القرن الماضي ومنهن الطبيبات ، والمهندسات ، والمعلمات، والمذيعات، والصحفيات، والمترجمات ، والوزيرات، والاخصائيات والممثلات..والبرلمانيات،،

و في كل مجال المرأة السودانية لها بصمة ووجود واضح زي الشمس..وفي الشارع وفي السوق وفي المصنع وفي الشرطة وفي الجيش وفي المرور وفي الزراعة..وفي بنات معتقلات,, وكمان في مقاتلات في المجموعات المسلحة..

والمرأة بتألف كتب ، وتكتب شعر، وروايات ، وقصص، ومسلسلات، وتكتب في الفيسبوك..ودا كلو كويس لكن لم تنشر صورتها الشخصية في الفيسبوك أو الواتس أب تبقى صعلوقة وقليلة أدب وما مربية وما عندها ولي أمر بيغير عليها وبيشكمها!!!!

ولما تظهر في التلفزيون هي (مؤدبة) ومثقفة، ولما تغني في حفلة ..الحفلة بتكون رابة !! ودا كلو ما عيب!! لكن لما تكتب في الفيسبوك او تغير صورة بروفايلها تبقى صعلوقة وكايسة الاولاد عشان يتغزلوا فيها ويعاكسوها..علما بإنو المعاكسة والغزل والمشاغلة في الشارع في.. وفي السوق في.. وفي الجامعة في .. وفي محل العمل .. وفي الحدائق والسينما وبيوت الاعراس وحتى بيوت العزاء.. لكن البت البتنشر صورتها في الفيسبوك دي قليلة ادب ساااي وصعلوقة وعايزة المشاغلة.. والغزل والكلام الفارغ!!!

المشكلة أن هذه العقلية لا تزال مسيطرة على ذهنية الرجل المعرفية ونظرته للمرأة..وأن موضوع (الجنس) لا زال هو المعيار الأول في الحكم على المرأة ..!
ودا كلو هين .. لكن الحاجة المؤسفة وبتضحك وبتبكي لما تلقى واحد رسل في الخاص أسوء عبارات الغزل ، وأقبح الصور الخادشة للحياء العام ..ويصر على انو ترسلي ليهو رقمك ..ويرسل ليك الرقم حقو..

ويقول ما لم يقله مالك في (الخمر).. و أول ما يجي يشوف صورة واحدة في الفيسبوك يعلق: اتقي الله..استري نفسك..عيب عليك تنشري صورتك للرجالة !! انتي ما عندك اهل يلموك؟!!إنتي صعلوقة وما مربية !! دا حرام وربنا بيعذبك!!!!!

العيب ليس فينا ولا في صورنا ولا في في طريقة أفكارنا..إنما العيب كله في النظرة السالبة والاحكام التعسفية المسبقة..العيب في نظرة التجريم والتخوين التي يظهرها الآخر عمدا أو جهلا للمرأة ..طيب ما أحسن تدفنونا أحياء يوم ولدونا..أو تجيبوا ناس داعش يضبحونا!!!

تهاني عوض