ولدينا الإدارة العامة للتعليم المهني ، ووزارة للعمل (بتعمل شنو ما عارفة والله) ، ووزارة لتنمية الموارد البشرية (بتمني في شنو غايتو ما عارفة ) ، ووزارة للقوى العاملة ، ووزارة للتقانة ووزارة للتعليم العالي ، ووزارة للثقافة ، ووزارة للتعليم ، والمفروض كل الوزارات دي يكون هدفها تنمية الإنسان أو بمعنى آخر تنمية الموارد البشرية للدولة ..
وبدل ما نقعد نضيع الزمن في برامج (فارغة) زي نجوم الغد التي تخرج الفنانين وأشباه الفنانين ، والمقلدين ، والناس البيحاكوا في جيل أجدادنا القدماء من الرعيل الأول من جيل الفنانين العمالقة .. هسع البلد دي مشكلتها أزمة فنانين؟؟؟ ولا أزمة فنانات؟؟ الفنانين والفنانات أكتر من الحافلات والركشات والأمجاد والبصات !!! .
ومش كفاية إنو القنوات الفضائية السودانية اليوم كلو يغنوا ويصفقوا اتقول عندنا (حنة ) !!! ومش كفاية إنو بيقينا نستورد أطباء من الخارج بعد أن كنا نصدر للخليج وأوربا أعظم الخبرات الطبية !! تمشي الاسبتالية ما تلقى ليك دكتور شاطر.. وكان لقيت ليك دكتور يشيل الكلية السليمة ويخلي العيانة!! وضب يعطل كهرباء خزان سنار لمدة أسبوع!!
و بعد دا كلوا شابكننا اغاني واغاني ونحن نعاني ونعاني!! ونجوم الغد ونص البلد عائشة في الضلام .. نجوم الغد بتاعين شنو ؟ وهل الغد المشرق دا حل مشكلته بالفنانات والفنانين الشباب الما عارفين الستوت تصلى ام تصام .. وسلمنا الموسيقي خماسي ولا سباعي ولا رباعي ولا نصف تونة!! خلاص بعد نخلص من تصدير النبق والدكاترة حقو نصدر لدول الجوار فنانين ما دام عندنا فنانين بالكوم والردوم حتى اسماؤهم ذاتها بقوا الناس ما عارفنها!!!
تهاني عوض
-
-
-
-
-
-
-
-
