في البداية دايرين تحدثنا عن أول يوم صمتو؟
والله كانت في محاولات كتيرة وفاشلة, أول واحدة الساعة عشرة والتانية 12 ظهراً وبعد داك الحكاية مشت وصمت اليوم الأول.
بتذكر اليوم الأول كان كيف؟
أيوة, كنت ساكن في العزوزاب وعديت اليوم كلو في البحر وما رجعت البيت إلا قبل دقائق من أذان المغرب.
كنت بتصوم بالدس؟
مرات كتيرة, الوالد كان تاجر كبير وعندو بقالة كبيرة فيها تلاجة مليانة عصاير, كنت كل ما القى روحي براي بمشي التلاجة وبنزل في العصاير شراب بي اهمال وبعد داك برجع البيت وبعمل فيها صائم ولي حدي ما خليت الحكاية دي ما في زول عرفني كنت بغش ناس البيت.
برنامجك شنو في رمضان؟
بصلي الصبح حاضر, بعداك بنوم وتاني ما بصحى قبل الساعة 12 ظهر, تاني بمشي على التلفزيون لي حدي صلاة الظهر ثم العصر لي حدي الإفطار.
بتفطر وين, في البيت ولا في الشارع؟
لما كنت ساكن العزوزاب كنت بفطر في الشارع لأنو ناس الحي كان عندهم لمة سمحة في الشارع, لكن لما رحلت في بيتي في الواحة أم درمان لقيت حكاية الفطور في الشارع دي ما في وبقيت مجبور على الإفطار في البيت.
ما حاولت تعمل إفطار مجموعة في الشارع في الواحة خصوصاً وانك زول اجتماعي؟
والله حاولت والموضوع مشى في البداية بشكل كويس لكن بعد شوية لقيت روحي براي في الشارع.
بعد الإفطار برنامجك شنو؟
بصلي المغرب وبتابع التلفزيون شوية وبواصل الأهل والأحباب وبمشي بقضي وقت طويل في اتحاد الفنانين.
بتصلي التراويح وين؟
ما بقدر أصلي التراويح, مرض السكري ما بخليني أصلي التراويح.
بتتعشى الساعة كم؟
تلاتة صباحاً.
وجبات بتحبها في رمضان؟
السمك واللحوم في الفطور.
مشروبك بتحبو في رمضان؟
الحلو مر والليمون.
ما ناوي تسافر في رمضان؟
إن شاء الله, بمشي أصوم العشرة الأواخر طوالي في المملكة العربية السعودية.
بتغني في رمضان؟
أيوة, نشاطي ما بقيف في رمضان وبغني في المنتديات والفنادق وفي عدد من إفطارات الشركات في رمضان.
شيء تحرص عليه في رمضان؟
التقرب إلى الله بالدعاء وصالح والأعمال.
حصل صمت رمضان بره السودان؟
والله صمت كتيير بره السودان لكن لو قلت ليك في بلد فيها احساس بي رمضان زي بلدنا اكون كضبت عليك, اي بلد ساخنة ورمضانا حار لكن زيو ما في إلا لما تمشي تصوم العشرة الأواخر في السعودية.
لما تكون عطشان شديد بتعمل شنو؟
بقضي وقت طويل في الحمام مع الموية الباردة لو العطش اتواصل ما عندي حل غير الصبر.
بتشاهد شنو في التلفزيون؟
المسلسلات والأخبار.
حصل فطرت بدون سبب؟
ربنا يغفر لينا, والله مرة كنت صايم رمضان زي العجب, فضلن يومين بس من العيد والساعة كانت اتنين ضهر والشمس مولعة نار وكنت عطشان وجيعان جاني واحد صاحبي مالي عربيتو مياه مثلجة وعصاير ولحوم قال لي ياخي ما تفطر انت تعبان, الشيطان لعب بي وقمت فطرت ولي حدي يوم الليلة أنا ندمان شديد على اليوم الفطرتو بلا سبب.
بتحب تقول شنو في آخر الحوار؟
صحيفة اليوم التالي
خ.ي
-
-
-
-
-
-
-
-
