عمود باللغة الصينية (العدس) بالصيني (ملوخية) يعني يا باسكال شيل شيلتك

عملوا ليهم (طابق تاني).

وخصصوا ليهم نص ارباع النفط ..(قبل الانفصال).

ومع ولاة السودان عينوا ليهم (والي) بصلاحيات أكبر.

ما عملوا أي حاجة.

الطابق التاني ..راح شمار في مرقة ..زول شعر بيه مافي.

الهلال مسيطر على كل البطولات المحلية بأغلبية ساحقة.

جنسوا ليهم من سلم الطيارة …وسجلوا ليهم حارس فلسطيني ما نفع.

جابوا الحضري (44) سنة برضو ما نفع.

النونو …والنفطي …ووارغو …كمية من الناس مروا عبر المريخ …(ما عملوا أي حاجة).

جمال الوالي زعل ..وقدم استقالتوا وقال ما بقعد مع الهزائم.

الدولة حنستو ليك …جابوا ليه (16) لورد عشان يغلبوا الهلال.

جمال الوالي قال (اللوردات) ديل ما كفاية.

جيبوا لي هيثم مصطفى من الهلال.

جابوا ليه هيثم مصطفى.

عينوا لي (3) مساعدين من المريخ لمساعدة رئيس الاتحاد العام.

عينوا ليه (3) مساعدين.

رجعوا لي (كروجر).

رجعوا ليه كروجر.

برضو الجماعة برجفوا.

جيبوا لي وزير يهدد استقرار الهلال ويفقد مجلسه المنتخب شرعيته.

الدولة جابت لينا وزير..شغال بالسيول والأمطار عشان والي الخرطوم اكتر من الرياضة.

جمال الوالي قال جيبوا لي معارضة للهلال هدامة..وسفروا لي تراوري.

جابوا المعارضة ..وسفروا تراوري.

وبعد دا برجفوا.

بعد دا خايفين من مباراة القمة.

الهلال بمشاكله ..والمريخ بي لورداته …والمريخاب يرجفوا.

المريخ بمدرب اجنبي و(6) محترفين ….والهلال بالوطنيين ومدرب وطني ..وبرضو برجفوا.

مع مشاكل الهلال ولوردات المريخ الكتار ديل ..الجماعة طلعوا ليهم (بيان).

قالوا شنو في البيان؟.

قالوا في البيان …المعز محجوب يلعب براحة.

أها عليكم الله في خوف اكتر من كدا.

والله أنا خفت الاتحاد العام عشان عيون اللوردات ديل يقوم يطلعوا ليه قرار يحرم المعز محجوب من المشاركة في مباراة القمة.

لوردات المريخ ديل ما فاضل ليهم إلا يقولوا يجيبوا لينا (ايهاب زغبير) يحرس مرمى الهلال في مباراة القمة.

انتوا يا لوردات ..جايبين ليكم حارس (اجنبي) باستثناء …وعمرو (44) سنة …وكمان بتتحدثوا عن حارس الهلال الوطني (المعز محجوب).

عصام الحضري بستفز في جماهير الهلال بالتصريحات المستفزة ..وبرفع في حذائه لجماهير الهلال ..ولوردات المريخ بتكلموا عن المعز محجوب.

قالوا شنو؟.

قالوا المعز محجوب دا ضرب ليه لاعب في مريخ الفاشر.

انتوا مالكم ومال مريخ الفاشر.

عملتوها ظاهرة ..عاوزين المعز محجوب مع مريخ الفاشر ..بيلعب براحة.

المريخ وجمال الوالي تحديد …كان قد سبق مباراة قمة سابقة وتحدثوا عن (عمر بخيت)..وعن مفاوضتهم له ..قصدا منهم على اخراج عمر بخيت من جو المباراة.

بنفس الصورة التى اعدوا بها سيناريو عمر بخيت ..اعدوا سيناريو المعز محجوب.

اعتدنا هذا الاسلوب من المريخ ..فقد سبق المريخ ايضًا عبر سيناريو مطبوخ ومرتب له مهاجمة هيثم مصطفى كابتن الهلال اثناء المباراة لإخراجه من جو المباراة.

شفتوا ناس المريخ ديل بفكروا كيف؟.

وبخططوا لي شنو؟.

قبل أي مباراة قمة بستهدفوا لاعب من الهلال.

لكن في كل هذه الوقائع كان السحر بنقلب على صاحبه ..وكان ينتصر الهلال.

الهلال اليوم إن شاء الله ينتصر برباعية.

مطلوب فقط حضور جماهير الهلال والوقوف مع الفريق ..والتشجيع المستمر والمتواصل طوال زمن المباراة …والهلال سوف ينتصر بإذن الله.

اسمعوا كلامي دا وما تفوتوا المباراة ..وكونوا حضورًا في مباراة اليوم من داخل الاستاد.

فرق الـ (5) نقاط ..بجيبوا جمهور الهلال ..ومن خلال هذه المباراة وبتحقيق انتصار كبير على المريخ ممكن أن نختزل الفارق ..ونفرتق اللوردات.

ردوا على اللوردات بالتشجيع والمساندة.

ردوا على كروجر.

ردوا على عصام الحضري.

اكدوا لنا أن الهلال كبير..وأنه عظيم وأنه منصور إن شاء الله.

نحن نثق في انتصار الهلال.

هذا أمر مفروغ منه..تعالوا بدري بس.

أمس قالوا عصام الحضري قام مهجوم..جرى طوالي على التلاجة.

قالوا ليه الحاصل شنو يا الحضري؟.

قال ليهم (كابوس).

كابوس مخيف.

مالك شفت شنو يا الحضري؟.

تراوري.

تراوري مالو؟.

تروري أمس جاني في المنام.

جاك وين يا الحضري؟.

جاني في خط 18

اوعك يكون يا الحضري دخل ليك في خط 6

يا ريت لو اكتفى بي كدا.

عمل شنو يا الحضري؟.

جاب ليه (هدف)…خلى ليك استاد المريخ زي المرجل.

الحضري قام من نومو يكورك في مدير المعسكر …قال جيبوا لي (ضفر).

ضفر جا.

انت يا ضفر الزول دا بفوت منك كيف؟…انت حارس ليك حواشة ولاّ حارس ليك مدرسة.

ضفر قال للحضري : يعني عاوزني امسكو ليك في المنام …هو الزول دا في الواقع ما بتمسك ..يتمسك في المنام.

يمين تراوري دا من وصل مطار الخرطوم …(باسكال) بقى زي الزول الما حافظ القصيدة.

يقطع زي (حلة البليلة).

عارفين بكري المدينة ومدثر كاريكا وتراوري في هجوم واحد ممكن يعملوا شنو؟.

ديل ممكن يعملوا أي حاجة.

يعني عادي جداً يعملوا ليك في الحضري ما يفعله النجار في الخشب.

يعني الحضري ممكن عادي الليلة المسا يعملوه ليك دولاب من (5) ضلف.

باسكال دا فيه حلاة (ترابيز).

أما غاندي ..ما بطلع ليه حاجة غير (شماعة).

بكري المدينة ومدثر كاريكا وتراوري قالوا اجتمعوا أمس العصر ..ومنتظرين مواقفة مجلس الأمن ..عشان عاوزين يعملوا غارة جوية على دفاع المريخ.

مهند الطاهر طبعاً طلع (التصديق) من ناس المرور …قال عاوز ليه اذن عشان يرجع (التفحيط).

الليلة (التفحيط) برجع من جديد.

ح تشوفوا جنس (تفحيط).

الطاهر الحاج …ح ينزلوا بيه ..ويرجعوا بيه ..وح يطلب الغيار من أول (5) دقائق.

الباشا ..قال تعبان شوية …ما عاوز اشارك.

وعلاءالدين يوسف قال الهلال فريق كبير.

علاءالدين عارف الفرق بين الهلال والمريخ …كان بيلعب في الهلال كان زي (الأسد).

هسع في المريخ علاءالدين يوسف بقى يستعمل الكروت الملونة اكتر من استعماله للاسكراتش.

دا كلو ما بحلكم.

عاوز الليلة …اكتب ليكم العمود دا باللغة الصينية …(على كيفي اكتب باللغة البتريحني).

مالكم انتوا ..الفهم فهم والما فهم بي طريقتو.

اصلو البلد دي الواحد فيها إلا يكتب بالصيني عشان يرتاح في (عضمو) دا.

الواحد ما برتاح من نقة الناس الكتيرة دي ..إلا اذا أصبح يكتب باللغة الصينية.

زول يسألو مافي.

اتخيلوا صحيفة (قوون) دي تعمل ليها ملحق (صيني) من أربع صفحات.

أحسن الواحد يكتب بالصيني.

(رفع الدعم عن المحروقات) حاجة ما بتقدر تقول فيها أي شيء بالعربي.

ما بتقدر تقول رأيك بي صراحة إلا بالصيني.

اللغة الصينية الصراحة فيها أعلى.

قالوا ليك زمان ..(والكلام دا ما يطلع من العمود دا) ..عثمان حسين كان بقدم الأغنية حسب طبقاته الصوتية بـ (14) لغة.

هسع أغنية (شجن) المسجلة في الاذاعة دي مسجلة باللغة البرتغالية أما (الفراش الحائر) بنسمع فيها بصوت عثمان حسين وهو بغني باللغة التركية.

انتوا قايلين عثمان حسين دا ساهل.

لذلك ح اكتب ليكم العمود دا الليلة باللغة الصينية ..الفهم حقو صيني ..لكن كلماتو عربية ..زي ما كان بعمل عثمان حسين.

زي فرنسي كدا ..قالوا سمع ليك زيدان إبراهيم بغني في (الليلة ديك)..انفتح بكي وجعري.

الجماعة قالوا ليه : الببكيك شنو؟..أنت هسع فاهم حاجة…فرنسي ما عندك رأس.

الفرنسي قال ليهم ما فاهم حاجة.. لكن (الديك) الفى الليلة (ديك) فرنسي.

برضو منطق.

عندنا واحد ما بعرف يصلح الكهربة وما عندو أي فكرة في الكهربة ..مع ذلك عامل لينا فيها حافظها.

أي حاجة تضرب ..بقول ابعدوا لي بعيد ..خلوها لي أنا بصلحها.

أها مرة عندنا (مروحة) ضربت…موش مرات بقولوا ليك المروحة (قلبها) حرق.

أنا ما عارف البحرق قلوب المراوح شنو؟…كمان المراوح بتحب.

المهم الزول دا قال زحوا لي بعيد من المروحة دي ..وخلوني أصلحها.

قلنا ليه بتصلحها يا نور الشريف.

صاحبكم دور ليك في المروحة …قبل ما يفصل الكهربة …طقتو ليك كهربة ..جاء واقع من الطابق التاني.

جاء نازل زي (باقى الماهية) يوم 21.

شلناه وجرى على الدكتور…(اصلو دي نحن الحاجات المتخصصين فيها).

الدكتور عاين ليه كدا …وقال لينا الزول دا الضربو شنو؟.

قلنا ليه (مروحة).

الدكتور قال لينا المروحة ما بتعمل كدا ….الضربة دي ضربة (نسيبة)…نحن ضربات المرواح بنعرفها.

زولكم المضروب قام من النقالة ..وقال للدكتور يا دكتور أنت طبيب ولاّ مأذون…الشغل دا شغل (مروحة).

الدكتور قال ليه ..مروحة ..ولاّ خايف من مباراة الليلة.

الزول قال ليه : أنا مباراة الليلة ما خايف منها …أنا خايف من (باسكال) المباراة كلها يتكلم تقول في (ديوان الافتاء) مع عبدالحي يوسف.

الدكتور قال ليه يعني الشغل دا شغل باسكال ..ما شغل مروحة.

صاحبكم قال ليه ايوا شغل باسكال يا دكتور.

الدكتور اتلفت علينا …وقال لينا شغل باسكال دا أنا ما عندي ليه علاج ..شيلوا زولكم دا ودوه للفاتح النقر ..يمكن يشفى ليكم.

هسع الكلام البتقول فيه أنت دا …كلام صيني.

ما صيني لكن (فهمو) صيني.

صيني قاطع كمان.

زي واحد كدا …جاء من الصين …بعد (17) سنة غربة في الصين.

جاء راجع من الصين (مكشكش) شوية ..رأسو ما تمام أول ما نزل في المطار أهلو قالوا ليه عليك الله ما تلومنا مع ناس (السوتاب) ديل …من طيارتك امشى عزيهم في عمهم (ود خط ستة)….السوتاب ديل الزول لو بقى (مجنون) عديل كدا ..ما بسقطوا منو اللوم.

ما برفعوا عنو الحرج.

عمهم (ود خط ستة) بتعرفوا ..طقتو (ركشة) وهو طالع من مكتب القبول.

زولكم من المطار مشى على (السوتاب) لقى ليك الصيوان اترفع يا دوب.

صاحبكم الـ (17) سنة في الصين أثرت في ثقافتو شطبت ليه ثقافتو السودانية كلها…زادت عليه (الاندراوة).

صاحبكم رجع من الصين ..صيني إلا ملوة.

ما عرف يعزيهم كيف.

طلع في عمود الكهرباء أول ما وصل العزاء…اخوه ما عرف يتصرف كيف؟.

دا شنو الزول العاوز يفضحنا دا؟.

اخوه قعد يفكر كدا ثم قال لي اخوه انزل ..انزل من العمود خلاص تعزيتك وصلت..واتلفت على ناس السوتاب وقال ليهم (التعزية) في الصين كدا.

في الصين الواحد لو عاوز يعزيك بطلع في العمود الكهرباء.

السوتاب …قالوا ليه …طيب (الكشف) في الصين كيف؟.

أخوه قال ليهم …في الصين (أهل المتوفى) بدفعو للزول الجاهم يعزيهم.

السوتاب دفعوا ليه (100) جنيه…ومع الـ (100) جنيه أدوه شاحن موبايل جلاكسي (مشط).

على ذات الطريقة ..وبنفس الحيلة ..ح اكتب ليكم اليوم.

ح اكتب ليكم الليلة باللغة الصينية عشان ناس الحضري وامير كمال ديل ما يفهموا أي حاجة.

الحضري طبعاً بالعربي ما بفهم كلامنا دا ..(الكبر) برضو ليه احكام.

(10) بالصيني قالوا (17).

الجماعة ديل جمركوا ليهم (7).

ديل ياكلو مال اليتيم.

جوز الحمام بالصيني …معاه صابونة غسيل زيادة.

كيلو الباسطة باللغة الصينية بجيبوا ليك معاه علبة سجائر…اللغة الصينية لغة رحبة ..وواسعة.

هسع الليلة بالصيني ح نفرتك ليكم (اللوردات) ديل.

اللوردات عيشتهم تطير.

ملحوظة : بكرة إن شاءالله بعد ما ينتصر الهلال نكتب ليكم بالهندي.

هوامش

جمهور الهلال يجب أن ينصرف إلى التشجيع الكامل ..لا تستجيبوا لاستفزازات الآخرين.

شجعوا هلالكم ..تنتصروا إن شاءالله.

هذه الظروف الصعبة التى يمر بها الهلال يحتاج فيها الفريق لجمهور الهلال العظيم.

بشة عندو هدف من غير شك.

يا موسى ..اركز.

هذا إن شارك موسى الزومة.

هل سوف ينسحب المريخ اليوم من المباراة قبل أن تكتمل.

المباراة دي فيها ريحة شيلة كورة.

البشيل الكورة منو؟.

الجماعة ديل متعودين على الانسحاب من الملعب.

باسكال والحضري نقطة ضعف المريخ.

الحضري وباسكال نقطة ضعف المريخ.

ركزوا على باسكال والحضري.

واسمعوا الكلام.

مهند الطاهر برضو عندو هدف إن شاءالله زي بشة.

مهند الطاهر بعرف الطريق إلى شباك الحضري.

نتمنى ألا يظهر تأثير المساعدين التلاتة لرئيس الاتحاد في مباراة اليوم.

لكن نطمئنكم …الهلال الليلة إن شاءالله منصور ..منصور.

امشوا الاستاد من بدري …واتحكروا في المدرجات والمقصورة.

ترواري عامل هلع في المريخ.

بلة جابر قال ما بشارك لو تراوري رجع.

بكري المدينة ما في حاجة بتثبتو غير اصابته.

على الحكام الانتباه.

بكري المدينة سوف يتعرض إلى ضرب شديد.

يا الشغيل ..ألعب كورتك بس.

اوعك من الكروت.

انت في الهلال بقيت زول فنان ..ما زي زمان.

يعني الضرب والخبط ما عاوزنو.

ما عاوزين مخالفات على الهلال.

عاوزين كورة نضيفة.

عاوزين نغلب كتير.

ركزوا على باسكال ..يمكن يسجل عكسي الليلة.

الحضري ما بتم المباراة.

يا اكرم خليك قريب.

ما في حاجة سوف يفقدها الهلال.

لذلك ألعبوا بأعصاب هادئة ..ومتعوا نفسكم ..وقدموا لينا كورة صاح.

لخبطة ما عاوزين.

والكورة ما ح تقصر معاكم.

اسمعوا الكلام دا.

وابقوا متسارعين.

…..

عاجل : بكرة نتلاقى في صفحة كاملة إن شاءالله.