تعالوا …شوفوا (كسير التلج).
في موقع الزاوية جاء هذا الخبر : (خاطب الاستاذ الطيب حسن بدوري وزير الشباب والرياضة الفريق طارق عثمان الطاهر الامين العام لنادي المريخ ظهر اليوم الاحد مثمنا المجهود الكبير الذي قامت به لجنة التسيير في نادي المريخ منذ تعينيها ، وقدم الوزير الشكر للجنة على ادائها فى الفترة السابقة والاستقرار الاداري والفني فى النادي والانسجام الكبير بين الاعضاء).
عليكم الله دا يقولوا عنو شنو؟.
على طريقة (حاجة آمنة اتصبري)..نقول وينو الفحم وينو البصل؟.
اقصد يا سيادة الوزير ..يا الثمّنت المجهود ..وينها شركة المساهمة؟.
وينو الانسجام؟…وجماعتك شكلتهم (حطب).
انت قايل الكلام القالوا عبدالصمد في ابرهومة المسعودية دا ..قالوا في (الكاميرا الخفية).
وينو (النادي العائلي)؟.
وينها (المدينة الطبية)؟.
وينو المول؟.
قال ثمّن المجهود قال!!.
اما عن الاستقرار ..فحدث ولا حرج.
اين الاستقرار الذي يتحدث عنه الوزير …الزول دا (السيل) عمل ليه لخبطة.
عاذرنكم في (المطرة) دي.
نشوف اول حكاية (الاستقرار الاداري) الذي تحدث عنه الوزير…ثم نعرج على (الاستقرار الفني).
لورد اسمو عبدالصمد ( يا سيادة الوزير لو ما عارف) ..قال عن لورد اسمو ابراهومة المسعودية …(انه ما بعمل اي حاجة غير انو يكفكف جلابيتو للكتف).
شفتوا الانسجام دا كيف؟.
الكلام دا يا سيادة الوزير في (ملجة) بتسمع بيه.
انتوا ابراهومة دا (لورد) برضو.
ايوا دا لورد الكفكفة.
دا استقرار دا.
يمكن الوزير قاصد حاجة تانية بالاستقرار.
يمكن قاصد ليه استقرار انجليزي..وإلا يكون قاصد سبعتين تلاتة.
وإلا قاصد ليه (بطيخة).
وإلا يمكن دي العهد الذهبي للاغنية السودانية.
امس في موقع الكوتش (امس القريبة دي) ..جاء خبرا اخر يكذب الوزير الذي تحدث عن الاستقرار الاداري.
الخبر جاءت تفاصيله على هذا النحو : (تقدم ابراهيم ملاح مقرر دائرة الكرة بالمريخ باستقالته من منصبه رسميا وعزا ملاح الاستقالة للحرب التي تعرض لها من المنتفعين واصحاب المصالح حسب حديثه مع الكوتش وقال ان هنالك من حاربه ووضع له المتاريس حتي ينفذ اجندته ويفرض سيطرته على فريق الكرة واضاف:من حاربني صحفي مستفيد من المريخ ويحضر الى المعسكر والتدريبات يوميا من اجل البحث عن مصالحه وقد تركت له المريخ لانني اخدم باخلاص ولا افكر في مصلحتي الشخصية ولكن مصلحة الكيان).
خد ..قال استقرار قال.
يا سيادة الوزير ..(الحرب) البتكلم عنها ملاح دي في المريخ ..وليس في (ابوكرشولا).
يا سيادة الوزير ابراهيم ملاح دا ..في دائرة الكرة حقت (النسور)؟.
بنسأل بس.
بنسأل عشان نفهم.
يمكن يكون (الاستقرار) دا غيروه …ونحن ما جايبين خبر.
غايتو لو (الاستقرار) بقى زي (المواقف)..يبقى عادي …كل يوم (الاستقرار) بكون في حتة.
نخلي الاستقرار الاداري الذي تحدث عنه الوزير …(ما خفيّ كان اعظم).
ما عاوزين نحددها مع الوزير.
ونتحدث عن (الاستقرار الفني) …عشان تشوفوا العجب ..وتشوفوا كسير التلج على اصيلو.
المريخ يا سادة …هو النادي الوحيد الذي اقال مدربه بين الدورتين ..واصدر قرار الاقالة بعد مباراة المريخ والظفرة ..وعلم المدرب التونسي بالقرار وهو في ملعب المباراة من اللورد عبدالصمد.
نوع دا ..بقولوا عنو شنو في الوزارة..بقولوا عنو (استقرار) برضو.
على كدا ممكن (القرع) يبقى بطيخ ..بي قرار وزاري.
والحمام يبقى (بط).
المريخ يا سيادة الوزير …لو ما عارف ..(يمكن يكون مشغول السيول والفيضانات)…المريخ يا سيادة الوزير ..(عكتو) في دائرة الكورة …بتقول يا غربتي.
الجماعة بتخابطو عديل كدا.
حرب عديل كدا.
خالد احمد المصطفى مختلف مع محمد موسي..ومحمد موسي حولوه للرديف ..والكوكي زعلان من ابراهومة (الما لورد)..ابراهومة العادي دا..وملاح استقال من دائرة الكورة ..وبتاع الشرطة طارق مدير الكورة قدم استقالتو قال ما فاضي..واللوردات قالوا نحن فترنا من الحكاية دي عاوزين نخلي دائرة الكورة فاضية.
اها دا يا جماعة …(استقرار فني).
ويوم 12 سبتمبر ..الساعة عشرة ح يستقيل ان شاءالله (17) لورد.
اظن الوزير عارف ان المريخ عاد من الامارات مهزوم من الظفرة برباعية …(اكيد سمع بالحكاية دي).
بكون سمع بيها.
البلد كلها سمعت.
كروجر جابوه بالبرمودة من اثيوبيا …(زي بتاع الفحص) البفتشو ليه الساعة 12 بليل.
كروجر دا جابوه (حالة مستعجلة) لمباراة القمة ..وتقولوا لي (استقرار فني).
طيب لو الاستقرار الفني كدا ..يبقى عدم الاستقرار كيف؟.
الوزير بتحدث عن استقرار فني يا جماعة (والله نحن ما قايلين الفيضانات بتعمل فيكم كدا).
مدرب المريخ الجديد ..عاد من المطار الي الميدان ..ليشرف على تمرين الفريق.
عليكم الله ..من الله خلقكم ..سمعتوا ليكم بـ (استقرار فني) على هذا النحو.
دي (حمامة) ناس منو؟.
قال بثمّن المجهود قال.
يا جماعة.
يا امة.
يا شعب.
شفتوا ليكم (كسير تلج) اكتر من كدا.
على العموم الوزير ..واللوردات لو بشككوا في كلامنا دا خليهم ينتظروا يوم 12 سبتمبر ..عشان نفرتكم ليكم لورد ..لورد.
والله كل لورد نودي حتة.
نحن حالفين على اللوردات.
دي مباراة للفرتكة.
خصصنا ليها نغمة عديل كدا.
وقعدنا..بس ما تأجلوها لينا.
الوزير بعد (التثمين) دا ..تعالوا شوفوا بخطط في شنو لي ناس الهلال حسب ما جاء في موقع (الكوتش) امس.
(تمسك الطيب حسن بدوي بالقانون واللائحة والنظام الاساسي لنادي الهلال واحترامه للقرارات الصادرة من الجهات العدلية بالولاية لجنة الاستئنافات للهيئات الشبابية والرياضية ومفوضية تسجيل الهيئات الشبابية والرياضية مقدما شكره لكل الذين تقدموا بمبادرات لحل ازمة نادي الهلال ملعنا رفضه لاي حل ودي وسيحل القرار ما تبقي من مجلس ادارة نادي الهلال وتعيين لجنة تسيير لمدة اربعة اشهر من شخصيات هلالية غير خلافية للتسيير اعمال النادي الادارية والفنية والمالية والاعداد والتحضير لعقد الجمعية العمومية في او قبل انتهاء فترة التكليف. وكان لقاء الوزير سابق جمع الوزير بمكتبه بالمزاد بحري مع وفد المفوضية الولائية بحضور مدير الادارة العامة للرياضة بالوزارة مولانا محمد عثمان الخليفة استماع خلاله على تقرير شامل من المفوضية بخصوص الوضع غير القانوني للنادي بعد القرار الاخير الذي اصدرته لجنة الاستئنافات بتاريخ 21 اغسطس الجاري وقضي بتأييد قرارها الصادر بتاريخ 21 يوليو الماضي وتأييد قرار المفوضية الولائية رقم 16 لسنة 2013م المؤيد لقرارها رقم 14 لسنة 2013م).
البشوف الجماعة ديل بتكلموا عن (القانون)..يقول لجنة اللوردات دي انتخاباتها كانت مدورة للصباح.
قانون شنو؟.
قانون (الباسطة بالسمنة).
وإلا قانون الزلابية في بيت الوالي.
وإلا ..وإلا ..وإلا.
مجلس الهلال الذي جاء بالانتخاب …عند السيد الوزير مرفوض ان يشرف على الانتخابات القادمة …(على ما يبدو ان السلطة عاوزة تسيطر على عملية الانتخابات القادمة)..عشان تجيب الزول البريحها.
مرة يجيبوا ناس الاحتياطي المركزي للتصويت ..ومرة يجيبوا ناس السكة الحديد ..ومرة يقولوا الملائكة نزلت من السماء ..صوتت ورجعت.
شفتوا الكرامات دي كيف؟.
انتوا بتنسوا (ساحات الفداء).
الوزير يرفض لمجلس منتخب حقه القانوني ان يشرف على الانتخابات القادمة في الهلال ..في الوقت الذي اوكل فيه الوزير للجنة التسيير المعينة في المريخ حق الاشراف على الانتخابات القادمة في المريخ.
اشمعنا.
يا ربي عشان (لوردات).
والله شغلكم دا عاوز يونس شلبي ..وسيد زيان ..عشان يلخبطوا ليكم زي (العجين).
نحن غلبنا..غلبنا مرة واحدة كدا.
هذه هي السلطة ..متى ما دخلت في شيء افسدته.
على ما يبدو انهم يريدوا ان يتدخلوا في الرياضة بصورة سافرة ..وظالمة.
موش قالوا (الحكم) يفحصوا عليه!!.
تاني ممكن (الهدف) لو جابو الهلال يقولوا ليك الهدف دا ما قانوني..المفوضية بتقول شنو؟.
المفوضية بتقول الهدف لو جاء من كورة معكوسة ..بنسبة 30 في المية ..على انعكاس ذاتي ..للطوحال ..يبقى هدف ما شرعي ..يا مخيمر.
تدخل السلطة في المريخ مقبول.
قد تكون هذه الاشياء مقبولة في المريخ …ناس قريعتي راحت ..(ومتعودة دائما).
لكن في الهلال تدخل السلطة مرفوض ..جملة وتفصيلا …وليس هناك اي طريقة او ثغرة تسمح للسلطة بادارة الهلال.
تجيبوا ليكم (لوردات)..تجيبوا ليكم (قندرانات)…الكلام دا في الهلال ما في.
نهي قطع كدا بس.
واضح ان الهلال في اشد الاوقات صعوبة …وفي اصعب الظروف كان يرفض تدخل السلطة.
الهلال استعصى على السلطة ..حتي في ازمة (بيان الجوع)…وظل لاعبي الهلال يأكلوا (الطحنية) في معسكر الهلال بشرف وعزة ..افضل لهم من ان تتدخل السلطة ..وتقودهم بالصورة التى تقود بها المريخ الان.
خارطة الرئاسة في الهلال تثبت دوما ان (حزب المؤتمر الوطني) ظل بعيدا عن الهلال ..رغم من ان الحزب في يده السلطة …وكان يمكن ان يأكل الهلال الشهد من السلطة ..لكن كبرياء الهلال وعزته ترفض ذلك.
الانتخابات الحرة والنزيهة ..تأتي دائما بتيارات اقرب من المعارضة في الهلال …ولا يدخل المؤتمر الوطني بلاط الحكم في الهلال إلا عبر التعيين والوزير.
قاد الهلال في فترات كثيرة الزعيم الراحل الطيب عبدالله ..المحسوب لحزب الامة …ونجاحات الزعيم عبدالله الطيب ..تقصر عنها الكلمات وتعجز.
وقاد الهلال في فترات بيضاء ..الحكيم طه علي البشير المحسوب للحزب الاتحادي الاصل.
وقاد الهلال كذلك من الحزب الاتحادي صلاح ادريس …وكانت فترته مع اختلاف الاراء جيدة (فنيا) في الهلال.
كذلك قاد الهلال حسن هلال وزير البئة الحالي …والاتحادي الشهير.
اما التعيين فقد جاء بالفريق عبدالرحمن سر الختم وشيخ العرب يوسف محمد يوسف.
الامين البرير الذي يقود الهلال الان ..ليس له لونية سياسية …وان دخل في صراعات قوية مع السلطة ..وحافظ على حركة واهلية الرياضة..وابقى الهلال بعيدا عن براثين السلطة ..وبريقها الخادع.
الوزير الان يريد ان (يفرمت) الهلال …وان يصفى فيه اهلية الحركة الرياضية ..لتنسج لنا السلطة على طريقة (لوردات) المريخ ..لوردات من (باق).
الهلال غير قابل لهذه الاشياء ..افعلوا في المريخ …ما يحلوا ليكم …ان شاءالله تبقوه المريخ (الوطني)…على قرار فريق الخرطوم (الوطني).
ديل دخلوا (السياسة) في اي شيء ..حتى في تطعيم الاطفال.
الجرعة بقت بـ (السيسي).
بالسيسي يا بدوي.
المريخ ما فارقة معاه ….ديل عاوزين قروش بس.
المريخ تبقوه زي النسور راعياه (الشرطة) او زي الاهلي الخرطوم راعيه (الجيش)…ما فارقة كتير.
انتوا احرار ..نحن هلالنا دا عاوزنو ..هلال الشعب ..هلال محمد احمد ..وادروب ..وابكر ..وعيسي وخليفة وساتي.
هلال امنة وميري ..وفاطنة وحلوم.
هلال لكل الناس ..وليس لتيار واحد …او حزب معين …هو هلال السودان ..لذا قيل انه هلال الملايين.
وقيل انه (سيد البلد)..لأنه تكون من عصب هذا الشعب ..وصار جزء من وجدانياتهم.
الهلال لا يقبل القسمة على اثنين ..هو مشاع ..ومتاح للغلابة ..وللناس البسطاء ..ولكل ابناء الشعب السوداني بمختلف درجاتهم …المادية والعلمية ..والاجتماعية.
الهلال يرفض دائما (رعاية) وضع اليد …لذا هو عف عن رعاية صلاح ادريس عندما احس الهلال بالذلة …واعرض عنها عندما تجبر صاحبها..وبقى عزيزا هكذا ..يسيّر اموره من حر ماله…من شباك التذاكر ..ومن ايجار الدكاكين.
هذا هو الهلال …الذي تعرفون ..نحن شركاء فيه ..بالحب والجمال والحرية …والعيش والملاح.
ملحوظة : مسي جاب التاني ..هسع الواحد يكتب وإلا يشاهد مباراة برشلونة وفالنسيا.
هوامش
المريخاب من خوفهم من الهلال جابوا (كروجر) بي برمودتو.
شفتوا الخوف دا كيف؟.
مع ان الوزير بثبت فيهم.
ميسي ..جاب الثالث.
شكلي كدا …ح ارسل العمود بعد كدا.
اعمل ليكم شنو؟.
لكن برمودة كروجر …ما كتبت ليكم عنها.
تراوري لو رجع بفرتك ليه (17) لورد.
انا كلمتكم.
حدثتكم.
عشان بعدين ما تعملوا لي فيها ما عارفين حاجة.
الهلال اليوم يغادر الي عطبرة ..نتمنى التوفيق للهلال في مدينة الحديد والنور …والعودة بالنقاط الثلاثة ان شاءالله.
يا حافظ …شد حيلكم.
اثبت لي ناس المريخ ان شطبك وانت مصاب (جريمة).
رد على الجماعة.
واياك من الاخطاء (الحلزونية).
الاخطاء الحلزونية في البلد دي بعرفها زول واحد.
قالوا ناس المريخ ..عاوزين …يمشوا للمفوضية ..ويقولوا ليهم مشاركة بكري المدينة في مباراة القمة القادمة غير قانونية.
غير شرعية.
انتوا موش قلتوا بكري المدينة دا (عقرب).
طيب ..الغلاط في شنو؟.
يبقى اتفقنا.
فالنسيا جابت قون.
الكورة سخنت يا احمد الحاج.
خلينا ..نحضر الشوط التاني بي مزاج.
ألحق…جابوا التاني.
دي ولعت عديل.
…..
عاجل : من الله خلقكم سمعتوا ليكم بـ (مفوضية) في برشلونة ..وإلا (لجنة استئنافات) في مدريد.
وإن طال السفر – صحيفة قوون
مقالات ذات صلة
-
-
-
-
-
-
-
-
